საქართველოს ახალგაზრდული ნაკრები 15 აგვისტოს ევროპის ჩემპიონატის შესარჩევი ციკლის მატჩში ხორვატიას უმასპინძლებს. ამ შეხვედრისთვის მზადებას ჩვენი 21-წლამდელები 12 აგვისტოს, სფფ-ის ტექნიკურ ცენტრ "ბასაზე" დაიწყებენ.
საქართველოს ნაკრების მთავარმა მწვრთნელმა ალექსანდრე ჩივაძემ ამ შეხვედრისთვის შემდეგი ფეხბურთელები გამოიძახა:
მეკარეები: გიორგი ნადირაძე (სპარტაკი), კახაბერ მეშველიანი (ზესტაფონი), გიორგი ბეგაშვილი (გაგრა);
მცველები: მამუკა კობახიძე, თედო გრიგალაშვილი, თორნიკე გრიგალაშვილი (ყველა - ზესტაფონი), საბა კვირკველია (ნეფტეხიმიკი, რუსეთი), არჩილ ტვილდიანი (დინამო), დავით კოხია (ვოლგა, რუსეთი), ნიკოლოზ აფაქიძე (ზუგდიდი);
ნახევარმცველები: ნიკოლოზ კვეკვესკირი, ჯაბა ჯიღაური, გიორგი პაპავა, ლაშა ჩაფიძე, ლაშა პარუნაშვილი
თავდამსხმელები: გიორგი ჭანტურია (ვიტესი, ჰოლანდია), დავით სხირტლაძე (ორჰუსი, დანია), კონსტანტინე გაბაშვილი (დინამო), ნიკოლოზ საბანაძე (ტორპედო).
საქართველოს ფეხბურთის ფედერაციის ოფიციალური ვებგვერდის ცნობით, ახალგაზრდულ ნაკრებში გამოძახებული ფეხბურთელები საწვრთნელ ბაზაზე შეკრებას 12 აგვისტოს, საღამოს 17 საათიდან დაიწყებენ.
ლეგიონერების ნაწილი გუნდს 13 აგვისტოს შეუერთდება. სრული შემადგენლობით გუნდი პირველად 14 აგვისტოს ივარჯიშებს.
ნაკრების სამწვრთნელო შტაბის გადაწყვეტილებით, ბაზაზე გამართული ვარჯიშები დახურული იქნება. 14 აგვისტოს კი ახალგაზრდული ნაკრები მატჩისწინა ვარჯიშს "მიხეილ მესხის" სახელობის სტადიონზე გამართავს და იგი მედიისთვის თავიდან ბოლომდე ღია იქნება.
ვარჯიშის დაწყებამდე სტადიონის საპრესკონფერენციო დარბაზში მატჩისწინა პრესკონფერენციას ალექსანდრე ჩივაძე გამართავს.
რაკი "მიხეილ მესხის" რეკონსტრუქცია ჯერ არ დასრულებულა, ამ შეხვედრაზე დასასწრები მხოლოდ 5 ათასი ბილეთი გაიყიდება. ბილეთების შეძენა ამავე სტადიონის სალაროში 5 ლარად იქნება შესაძლებელი.
მატჩი 15 აგვისტოს 20 საათზე დაიწყება.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
ჩივაძე VS შუშაკი - ყველა შეტევა და ინიციატივა მომზადებული უნდა იყოს!
