საქართველოს 19-წლამდე ნაკრები ევროპის 2013 წლის ელიტრაუნდში გავიდა. ხორვატიაში დასრულებული ტურნირი 2 ნოემბერს გამართულ პრესკონფერენციაზე გუნდის მთავარმა მწვრთნელმა კახა კაჭარავამ ფეხბურთელებთან, ნიკა ჭანტურიასთან და ნიკა სანდოხაძესთან ერთად შეაფასა.კახა კაჭარავა:
- ჩვენი სუსტი წერტილი ხორვატიასთან მატჩის შემდეგ გამოჩნდა. მინდვრის გამო, აზერბაიჯანთან თამაში წყალბურთს უფრო ჰგავდა. სამწუხაროდ, გოლის შემდეგ მომენტები ვერ გამოვიყენეთ და ანგარიში გავითანაბრეს.
ისლანდიასთან ბიჭებმა მონდომებით ითამაშეს, გავიმარჯვეთ და მიმაჩნია, რომ ჯგუფიდან ხორვატიისა და ჩვენი გასვლა ლოგიკური იყო.
- სამივე მატჩში ფეხბურთელი გაგვიძევეს. ეს უდისციპლინობის ბრალია თუ ზედმეტად მკაცრი
- ეს გამარჯვება ყველა იმ მწვრთნელის და კლუბის დამსახურებაა, ვინც ფეხბურთელები მოგვიმზადა, თუმცა დისციპლინასა და მოთამაშეთა განათლებაზე ბევრი უნდა ვიმუშაოთ - სამწუხაროდ, ეს მთელი ქართული ფეხბურთის პრობლემაა.
ფანცულაიამ პირველი ყვითელი ბარათი სასტვენის შემდეგ ბურთის დარტყმისთვის მიიღო, მეორე - სიმულაციისთვის. აზერბაიჯანთან სანდოხაძე გაგვიძევეს, თუმცა, მსაჯი თავდაპირველად ყვითელი ბარათის ამოღებას აპირებდა, მაგრამ წითელი აუფრიალა.
სანდოხაძე ნერვიულობდა, მაგრამ მეტოქე რომ არ გაეჩერებინა, შესაძლოა, გოლი გაგვეშვა. ამიტომ ვუთხარი, ამ წითლით ელიტრაუნდში გავალთ-მეთქი და ასე მოხდა.
მესამე გაძევება მაშინ მივიღეთ, როდესაც ისლანდიას 2:0 ვუგებდით. არაბულს ძალიან ეუხეშნენ, მაგრამ მსაჯს ყვითელი ბარათიც არ ამოუღია.
ბაჩანას ბიჭები გამოექომაგნენ და ვითარება ისე დაიძაბა, ფეხბურთელებს რომ არ ეჩხუბათ, მოედანზე შევედი, რისი უფლებაც არ მქონდა და მსაჯმა წითელი ბარათი მოგვცა. მაგრამ ვითარების განეიტრალების გარდა, მაშინ არაფერზე ვფიქრობდი.
მოედნიდან ჩემს გასვლამდე, მსაჯმა გეგეჭკორი გააფრთხილა, აუტი არ ჩამოეწოდებინა, თუმცა ენის უცოდინრობის გამო, მან ყვითელი ორჯერ მიიღო - შეუფერებელი საქციელისთვის არ გაუძევებინათ.
საერთოდ, გუნდში დისციპლინა მნიშვნელოვანი საკითხია და უდისციპლინოს არ გავაჩერებ.
- ნაკრებში გამოიძახეთ სათამაშო პრაქტიკის არმქონე თქვენი შვილი, როდესაც არ მიიწვიეთ ლოკომოტიველი ჯიქია, რომელიც თამაშობს და ბევრი გოლიც გააქვს...
- ნაკრებში ყველა ჩემი შვილია! ნიკა შვეიცარიულ "ვანდიში" თამაშობდა, თუმცა, პროფესიონალური კონტრაქტის არქონის გამო, იქ აღარ გააჩერეს და ბოლოს "გაგრაში" ვარჯიშობდა. "დინამოში" რამდენიმე წელი ვიმუშავე და დაუმსახურებლად მეგობრების შვილები გუნდში არ დამიტოვებია.
საკუთარი თავის მტერი კი არ ვარ - ვერც თქვენ და ვერც გულშემატკივარს ვერ მოვატყუებ.
ჯიქიას მიუწვევლობის მიზეზი სხვა რამ არის: ეს 1994-წლიანების ტურნირია და თავის დროზე, ეროვნულ ნაკრებში დაშვებული შეცდომის გამეორება არ მსურდა, როდესაც ახალგაზრდები ნაადრევად დააწინაურეს და, ფაქტობრივად, კარიერა დაასრულებინეს. გუნდში არა - ნაცნობობით, არამედ, საუკეთესოებს ვიძახებ.
- ასეთ ტურნირებს სელექციონერები ესწრებიან და რომელიმე ფეხბურთელით ხომ არ დაინტერესდნენ? რას იტყვით ბაჩანა არაბულსა და ლუკას ჰუფნაგელზე?
- ნაკრები სავაჭრო ცენტრი არ არის და სელექციონერებთან ურთიერთობა ჩემი საქმე არ არის. თუმცა, ინტერესი იქნებოდა. დიდი ხანია, რაც არაბულს ვიცნობ. საინტერესოა, რატომ არავის იკითხა, ერთი წლის უთამაშებელი ნაკრებში რატომ მივიწვიე. იმიტომ, რომ აქცენტს ნიჭიერებზე ვაკეთებთ და ყველა ასეთი გვჭირდება. არაბული შეკრებაზე ნელ-ნელა შედიოდა ფორმაში. რამდენიმე ტურნირზე მისი წაყვანა-არწაყვანაზე ვფიქრობდით, მაგრამ საბოლოოდ, მაინც ვენდე და ნდობა გაგვიმართა.
ნიკა ჭანტურია:
"ჩვენ მიზანს მივაღწიეთ და შემდეგ ეტაპზე გავედით. მასპინძელ ხორვატიასთან მატჩის ფრედ დასრულებაც შეგვეძლო.
აზერბაიჯანთან უპირატესობას ვფლობდით, მაგრამ მოედანმა ფეხბურთის თამაშის საშუალება მოგვისპო. ამავე დროს, რამდენიმე რეალური საგოლე მომენტითაც ვერ ვისარგებლეთ და მეტოქემ დაგვსაჯა.
ისლანდიასთან ჩვენი კაპიტანი და ლიდერი სანდოხაძე გვაკლდა, მაგრამ ბიჭებმა მოედანზე გული დავდეთ და ელიტ რაუნდში გავედით".
ნიკა სანდოხაძე:
"ჩემი მისამართით ნათქვამი სიტყვებისთვის თანაგუნდელებს და მთავარ მწვრთნელს მადლობას ვუხდი.
სამი ურთულესი შეხვედრა ჩავატარეთ. მართლაც შეგვეძლო, ხორვატიასთან არ წაგვეგო. აზერბაიჯანს კი ვჯობდით, მაგრამ მხოლოდ ფრეს დავჯერდით.
ისლანდიასთან ურთულესი მატჩი გვქონდა, რადგან მოგების გარდა, არაფერი გვაწყობდა".
ყოველდღიური სპორტული გაზეთი "ლელო"
ასევე იხილეთ:
საქართველო-ისლანდია 2:0 - საქართველო ევროპის ჩემპიონატის ელიტრაუნდშია!
საქართველო-აზერბაიჯანი 1:1 - ფრე და დარჩენილი იმედი
ხორვატია-საქართველო 2:0 - საქართველოს 19-წლამდელთა ნაკრები მასპინძლებთან დამარცხდა
კახა კაჭარავა: ჩვენი მიზანი ელიტრაუნდში მოხვედრაა!
