არჩილ არველაძე: საქართველოს ამ ტურნირისთვის ხარჯი ნამდვილად უღირს

ფოტოზე: კახა კალაძე და არჩილ არველაძე
2017 წელს, საქართველო ევროპის 19-წლამდელთა ჩემპიონატს უმასპინძლებს. მატჩები "მიხეილ მესხზე", გორის "თენგიზ ბურჯანაძეზე", "მცხეთა პარკსა" და რუსთავის "ფოლადზე" გაიმართება.

დასკვნითი ეტაპის ფორმატი უცვლელია. საქართველოს 7 ნაკრები ესტუმრება. ჩვენი 19-წლამდელები კი, როგორც მასპინძლები, ევროფინალში ავტომატურად დაიშვებიან.


სფფ-ის სპორტული დირექტორი არჩილ არველაძე იმედოვნებს, რომ 19-წლამდელთა ევროპის ჩემპიონატის წარმატებით მასპინძლობის შემთხვევაში, ჩნდება წინაპირობა, რომ მსოფლიოს ჩემპიონატსაც ვუმასპინძლოთ.

"19-წლამდელთა ევროპის ჩემპიონატი სერიოზული ტურნირია. მისი მასპინძლობის სურვილი დიდ ქვეყნებს ჰქონდათ - ინგლისს, ესპანეთს, გერმანიას... მგონი, ბელგიასაც. ასეთ კონკურენტებთან გამარჯვება შემთხვევითი ვერ იქნებოდა.

ფედერაცია ამაზე ორი წლის განმავლობაში მუშაობდა და უეფაში ყოველი ვიზიტი ამ საკითხის საჩვენოდ მოგვარებას ემსახურებოდა.

უეფას გადაწყვეტილება თბილისში ასაკობრივი ნაკრებების შესარჩევი ეტაპების კარგმა მასპინძლობამაც განაპირობა და ამ ტურნირებში ჩვენი გუნდების ღირსეულმა და სტაბილურად კარგმა შედეგებმაც.

ეს ყველაფერი იმის წინაპირობა უნდა გახდეს, რომ საქართველომ მსოფლიოს ჩემპიონატსაც უმასპინძლოს", - ამბობს არველაძე.

მისივე თქმით, საქართველო არა მხოლოდ საიმედო და მშვიდი ქვეყნის სახელს განიმტკიცებს, არამედ ფინანსურადაც მოიგებს:

"ახლა ზუსტად ძნელი სათქმელია, რა შემოსავლები ექნება საქართველოს ტურნირიდან, მაგრამ თავისთავად ესეც უნდა ვიგულისხმოთ, რადგან 7 გუნდს გულშემატკივრები, მედია, დაინტერესებული სელექციონერები ჩამოჰყვებიან.

კიდევ ერთს დავამატებ - მოგების კუთხით, სასურველი იქნება, ფინალურ ეტაპზე რაც შეიძლება მეტი ჩვენი მეზობელი ქვეყნის ნაკრები რომ გავიდეს: უკრაინა, თურქეთი, აზერბაიჯანი, რუსეთი, სომხეთი...

ასეთ შემთხვევაში, ტურისტების რაოდენობა საგრძნობლად გაიზრდება".

სპორტული დირექტორის თქმით, ტურნირისთვის სტადიონების მშენებლობას მხოლოდ სახელმწიფო დააფინანსებს:

"ჩემპიონატისთვის საჭირო სტადიონებს სახელმწიფო ააშენებს. ამის შესახებ ფეხბურთის ფედერაცია მთავრობას წინასწარ შეუთანხმდა. ასეთი ტურნირისთვის ხარჯების გაღება კი ქვეყანას ნამდვილად უღირს".

(იბეჭდება მცირე ცვლილებით)
ყოველდღიური სპორტული გაზეთი "ლელო"