U19. ევრო 2017: რას მოითხოვს უეფა საქართველოსგან?

2017 წელს საქართველო 19-წლამდელთა ევროპის ჩემპიონატის ფინალურ ეტაპს რომ უმასპინძლებს, ეს დიდად გასახარი ამბავი მკითხველმა უკვე იცის. უეფას დაწესებული აქვს ამ ტურნირის ჩატარებისთვის აუცილებელი რეგულაციები და მასპინძელ ქვეყანას მკაცრ მოთხოვნებს უყენებს.

თუ რა რეგულაციებსა და კრიტერიუმებზეა საუბარი, ამაზე ინფორმაცია საქართველოს ფეხბურთის ფედერაციის პრესსამსახურმა გაავრცელა.

უეფას კომისია საქართველოში პირველ შემოწმებას 2015 წლის შემოდგომაზე, ანუ ჩემპიონატამდე 20 თვით ადრე გეგმავს. მეორე ვიზიტი იქნება 8 თვით ადრე, ხოლო მესამე - ფინალური ეტაპის წილისყრის დროს.

სასტუმროების შერჩევა ხდება უეფას პირველსავე ვიზიტზე (20 თვით ადრე). ორი სასტუმრო - 132 ოთახით (გუნდები, უეფა, ოფიციალური პირები) - ოთხი გუნდი თითო სასტუმროში. ერთი სასტუმრო - 30 ოთახით (მსაჯები).

ოთახების ზუსტი რაოდენობა: საჭიროა რამდენიმე ორადგილიანი და რამდენიმე ერთადგილიანი ოთახი.

სავარჯიშო მოედნები სასტუმროდან დაშორებული უნდა იყოს არაუმეტეს 15-30 წუთის სავალ გზაზე. მანძილი სასტუმროდან სათამაშო სტადიონამდე უნდა იყოს არაუმეტეს 1 საათის სავალზე.

სათამაშო - 4 ძირითადი და 1 სარეზერვო სტადიონი, უეფას მე-2 ან მე-3 კატეგორიის. ჩემპიონატის მონაწილე 8 გუნდს უნდა ჰქონდეს ინდივიდუალური სავარჯიშო მოედანი.

უსაფრთხოების ზომებისა და ქალაქის გაფორმების ზუსტი მოთხოვნები კი უეფას პირველი ვიზიტის შემდეგ დაზუსტდება.

ყოველდღიური სპორტული გაზეთი "ლელო"