მაშინ, როცა აღარც ველოდი... პაპუნა ფონიავა ახალგაზრდულ ნაკრებში გამოიძახეს

23 მარტს, საქართველოს ახალგაზრდული ნაკრები ევროპის ჩემპიონატის შესარჩევ მატჩში სან მარინოს უმასპინძლებს, ხოლო 28 მარტს, ზესტაფონში, ამხანაგურად დაუპირისპირდება უკრაინელ თანატოლებს. ბათუმის "დინამოს" პრესსამსახურის ცნობით, ნაკრების მთავარმა მწვრთნელმა გია გეგუჩაძემ ამ თამაშებისთვის გუნდის ნახევარმცველი პაპუნა ფონიავა გამოიძახა.

ეს მოულოდნელიც იყო და სასიამოვნოც. მოულოდნელი იმიტომ, რომ ფონიავა, რომელიც უმაღლეს ლიგაში მე-5 სეზონს ატარებს, ყურადღებას ადრეც იმსახურებდა.

უმაღლეს ლიგაში მან ჯერ კიდევ სკოლის მოსწავლემ ითამაშა. მარტვილის "მერანის" აღზრდილმა, 17 წლისამ ამ გუნდის ფორმით სადებიუტო სეზონში 11 მატჩი ჩაატარა და 2 გოლი გაიტანა. სპეციალისტები სწორედ იმ დროიდან აღიარებდნენ, რომ საქართველოს ნიჭიერი საყრდენი ნახევარმცველი ეზრდებოდა.

მალე ის "მერანის" ლიდერად მოგვევლინა, ბათუმის "დინამომდე" კი მისი ტრანსფერით დაინტერესებულები იყვნენ "ზესტაფონი" და თბილისის "დინამო". იყო კობა ჟორჟიკაშვილის (17-წლამდელები), კახა კაჭარავასა და გია ცეცაძის (19-წლამდელებში) ფორმაციის ასაკობრივი ნაკრებების წევრი.

"წლეულს, ახალგაზრდული ნაკრები ევროპის ჩემპიონატის შესარჩევ ციკლს ამთავრებს. სულ 4 მატჩია დარჩენილი. ჩვენს გუნდს ფინალურ ეტაპზე გასვლის შანსი დაკარგული აქვს.

ადრე, ასეთ დროს, ნაკრების გაახალგაზრდავებას იწყებდნენ და იმიზეზებდნენ, რომ მოთამაშეებს ახალი ციკლისთვის ამზადებდნენ... რა დასამალია და, ახალგაზრდულ ნაკრებში მიწვევის იმედი ნამდვილად აღარ მქონდა, რადგან მეგონა, ისევ ძველებურ საკადრო პოლიტიკას გაატარებდნენ.

ისე, რამდენჯერმე მოვხვდი ნაკრებში, მაგრამ ბოლო მომენტში შემადგენლობიდან, რატომღაც, ყოველთვის მე გამოვირიცხებოდი, ან ხელს ტრავმა მიშლიდა... ამიტომ, მიხარია, რომ გეგუჩაძე ჩემით დაინტერესდა და მიმიწვია.

მეორე მომენტია, რომ გეგუჩაძეს ფეხბურთელები კარგად ახასიათებენ და მისი ხელმძღვანელობით ვარჯიშიც საინტერესო იქნება", - ამბობს ფონიავა.

ყოველდღიური სპორტული გაზეთი "ლელო"