აუცილებლად მოსაგები პლეი-ოფი - რატომ არ თამაშობს სომხეთის ნაკრები "რაზდანზე"?

საქართველოს ნაკრებმა ერთა ლიგის გათამაშება იმდენად კარგად დაიწყო, რომ ძნელი წარმოსადგენი იყო, B დივიზიონის დატოვების საშიშროების წინაშე თუ აღმოჩნდებოდა, მაგრამ მოხდა ის, რაც მოხდა - ბოლო 4 მატჩში მხოლოდ 1 ქულა აიღო (2 გოლი გაიტანა) და იმისათვის, რათა C დივიზიონში არ დაქვეითდეს, სომხეთის ეროვნულ გუნდთან პლეი-ოფში ბრძოლა მოუწევს.

მეტოქის კლასის გათვალისწინებით, გულშემატკივართა დიდი ნაწილი გამარჯვებაში აბსოლუტურად დარწმუნებულია, თუმცა უნდა გავითვალისწინოთ, რომ ხანდახან „ჯვაროსნებს“ არასასიამოვნო სიურპრიზების შემოთავაზებაც შეუძლიათ. ამის დასტური ბოლო შეხვედრებია და მიუხედავად იმისა, რომ ობიექტურად ჩვენი გუნდი უკეთესი ფეხბურთელებითაა დაკომპლექტებული, ზედმეტმა თავდაჯერებამ შეიძლება ცუდი სამსახური გაუწიოთ. ისიც ნუ დაგვავიწყდება, რომ მეზობლებს 2020 წლის შემოდგომაზე ორჯერ დაუპირისპდნენ და სასურველ შედეგს ვერ მიაღწიეს - კვიპროსში 2:2 და თბილისში 1:2. რა თქმა უნდა, მას შემდეგ სიტუაცია შეიცვალა, ახლა ჩვენი ფეხბურთელები გაცილებით უკეთეს კლუბებში ასპარეზობენ, ევროპის ჩემპიონატის მერვედფინალში გავიდნენ, მაგრამ სიფრთხილეს თავი არ სტკივა. მით უმეტეს ერევანში გურამ კაშიას და ხვიჩა კვარაცხელიას გარეშე მოუწევთ ფონს გასვლა. ნაკრების მწვრთნელმა ვილი სანიოლმა სწორად აღნიშნა, რომ A ლიგისთვის მზად არ არიან, მაგრამ არც C ლიგაა მათი შესაფერისი.

ქომაგების ნაწილს მიაჩნია, რომ C ლიგიდან ევრო 2028-ის პლეი-ოფის საგზურის მოპოვება უფრო იოლია, რაც არასწორია, რამეთუ რადგან მომავალი ევროპირველობა ოთხ ქვეყანაში გაიმართება და მასპინძლები ავტომატურად დაიშვებიან ტურნირზე, C ლიგიდან შეიძლება პლეი-ოფში არცერთი გუნდი არ დაუშვან, ან უკეთეს შემთხვევაში საგზურები მინიმუმამდე შემცირდეს. ვიყოთ ობიექტური, პირდაპირ შესარჩევი ტურნირიდან ჩვენს გუნდს ევროპის ჩემპიონატზე გასვლის შანსი ჯერ ნაკლებად აქვს, ამიტომ ერთა ლიგის ქვედა დივიზიონში დაქვეითება დაუშვებელია. რაც შეეხება მსოფლიოს ჩემპიონატს, „ჯვაროსნების“ ერთა ლიგიდან მოხვედრა უკვე გამორიცხულია.



ბევრი სვამს კითხვას, რატომ არ თამაშობს სომხეთის ნაკრები „რაზდანზე“. ეს სტადიონი თავიდან 75 ათას მაყურებელს იტევდა. უნდოდათ მეორე იარუსი აღმოსავლეთ ტრიბუნაზეც აეშენებინათ, მაგრამ მაშინ „ლუჟნიკებზე“ დიდი ტევადობის იქნებოდა, რისი უფლებაც მოსკოვმა არ მისცა. ნაწილობრივი რეკონსტრუქციის და ინდივიდუალური სავარძლების დამონტაჟების შედეგად, მისი ტევადობა 54 ათასამდე შემცირდა. არენა ამჟამად ამორტიზებულია და როგორც რამდენიმე წლის წინ სომხეთის ფეხბურთის ფედერაციის მაშინდელმა პრეზიდენტმა რუბენ აირაპეტიანმა (მეტსახელად გერმანელი რუბო, რომლის მიმართ 2024 წელს სისხლის სამართლის საქმე თაღლითობის მუხლით ხელახლა აღიძრა) განაცხადა, არენა საფრთხეს წარმოადგენდა მიმდებარე ტერიტორიაზე განლაგებულ ბაზრობაზე ადამიანებისთვის, ვინაიდან მეორე იარუსი შეიძლებოდა ჩამონგრეულიყო. მას შემდეგ სიტუაცია არ შეიცვალა, რამეთუ აღდგენითი სამუშაოებისთვის საჭირო თანხა ვერ გამოინახა და ამიტომ თამაშობს მათი ნაკრები 14 935-იან ვაზგენ სარგსიანზე, რომელიც ფედერაციის ბალანსზეა.