"საქართველოს ჩემპიონატის დონე გაიზარდა და უკრაინელებს აქაურობა მოეწონებათ"

თბილისის "დინამოს" უკრაინელმა მეკარემ სერგეი ლიტოვჩენკომ უკრაინულ საიტ Football.ua-ს ინტერვიუ მისცა.

- უკრაინის ჩემპიონატს თვალს ადევნებ?
- შეძლებისდაგვარად, ინტერნეტით ვუყურებ ჩემპიონატის მატჩებს და ტურის მიმოხილვებსაც ვნახულობ. ძალიან მახარებს დონეცკის "ოლიმპიკის" წარმატება, ისინი ახლა კარგ ფეხბურთს თამაშობენ. კარგად მახსენდება ამ კლუბში გატარებული პერიოდი, ყველაზე მეტად კი - თემურ ფარცვანიასთან ერთად.

- გულშემატკივრის სტადიონზე მოსვლა უკრაინაში პრობლემად იქცა. შენი აზრით, ეს რისი ბრალია?
- ვფიქრობ, სტადიონზე მათი არმოსლის მიზეზი ბევრია. პირველ რიგში კი, ქვეყანაში შექმნილი რთული ვითარება...

- რას იტყვი უკრაინის ეროვნულ

ნაკრებსა და მის მთავარ მწვრთნელ ანდრეი შევჩენკოზე?
- შევჩენკოს მუშაობა მომწონს, ის ახალაგზრდა ფეხბურთელებს ენდობა. მისი ევროპული გამოცდილება ფეხბურთელებს წინსვლაში ძალიან ეხმარება.

- უკრაინის ჩემპიონატში დაბრუნება არ გსურს?
- მინდა! სჯობს, მშობლიურ ქვეყანაში ვთამაშობდე, მაგრამ ახლა მანდ ისეთი მდგომარეობაა, ფეხბურთელთა დიდი ნაწილისთვის უფრო პრიორიტეტული სხვა ქვეყნების ჩემპიონატებია.

- თბილისის "დინამოს" ვარიანტი როგორ გაჩნდა? გქონდა სხვა შემოთავაზებები?
- შემოდგომა "ზუგდიდში" გავატარე, სეზონის მიწურულს კი "დინამოსთან" კონტრაქტის გაფორმება შემომთავაზეს. მას მერე, რაც ამ კლუბის ინფრასტრუქტურა ვნახე, სხვა ვარიანტები აღარც განმიხილავს. ასეთ ტიტულოვან კლუბში თამაში პატივია.

- რას გვეტყვი საქართველოს ჩემპიონატზე?
- ის უკრაინულ ფეხბურთთან შედარებით ბევრად ტექნიკურია. ახლა საქართველოში ახალი ფორმატია და გუნდებიც თანაბარი დონის არიან, გამოკვეთილი ფავორიტები და აუტსაიდერები არ არიან.

- გუნდელებს როგორ ესაუბრები? მატჩის დროს რუსულად ყვირი თუ ქართული ისწავლე?
- რამდენიმე მოთამაშემ რუსული იცის. ცოტა ქართულიც ვიცი, ასე რომ, ამ მხრივ პრობლემა არ მაქვს.

- ჩვენს ახალგაზრდა ფეხბურთელებს საქართველოს ჩემპიონატში თამაშს ურჩევდი?
- კი. საქართველოს ჩემპიონატის დონე გაიზარდა და უკრაინელ ფეხბურთელებს აქაურობა მოეწონებათ.

- ამბობენ, საქართველოში საგზაო მოძრაობის წესები არ არსებობს. ავარიაში ჯერ არ მოხვედრილხარ?
- მანქანას ცუდად არ ვატარებ და ნელ-ნელა ვეჩვევი აქაურობას.

- ქართული კერძების მომზადება ისწავლე? ყველაზე მეტად რა მოგწონს?
- საჭმელს ჩემი მეუღლე ამზადებს. ყველაზე მეტად აჭარული ხაჭაპური და ხინკალი მომწონს.

- ქართველებს სმა უყვართ. მართალია, რომ ფეხბურთელებს თამაშამდე ღვინის დალევა შეუძლიათ?
- არა, აქ მკაცრი დისციპლინაა და წესების დარღვევისთვის ჯარიმებია დაწესებული.

- საქართველო ერთ-ერთ ყველაზე ლამაზ ქვეყანად ითვლება. მართლა ასეა?
- კი. საქართველო ძალიან ლამაზი ქვეყანაა, თბილისი კი ერთ-ერთი ყველაზე ლამაზი ქალაქი, რომელიც კი მინახავს. ვფიქრობ, ცხოვრების რიტმი აქ ბევრად მშვიდია, ვიდრე უკრაინაში.