ეროვნული ლიგა. XIV ტურის წინ: სურვილების ტური

წინა ტურის დასკვნითი მატჩები კვირა-დღეს გაიმართა, დღეს და ხვალ კი უკვე მომდევნო ტურის მატჩები გველოდება!

აი, ასეთი გრაფიკით უწევთ ასპარეზობა ეროვნული ლიგის მონაწილეებს და ალბათ, სწორედ შემჭიდროებულ კალენდარსაც უნდა მივაწეროთ ის ფაქტი, რომ წინა ტურში ერთობ დაბალი შედეგიანობის მაჩვენებელი (8 გოლი ხუთ მატჩში) იყო...

თუმცა, კიდევ ერთი "გასამართლებელი მიზეზიც" უნდა ვახსენოთ: კლიმატურ პირობებს ვგულისხმობთ, გარკვეული პრობლემები რომ შექმნა წინა ტურის რამდენიმე მატჩის მსვლელობისას;

ისე, დღესაც და ხვალაც უნდა ველოდოთ წვიმიან ამინდს, თუმცა, უამინდობა ყველა გუნდს რომ არ უშლის ხელს, გასული ტურის მართლაც გამორჩეულმა მატჩმაც დაამტკიცა!

ხვდებით, ალბათ, რომ ეროვნული ლიგის ლიდერისა და მოქმედი ჩემპიონის დაპირისპირებაზე ვსაუბრობთ: თბილისის "დინამოსა" და "სამტრედიას" შორის ჩატარებული მატჩი ხომ, უდავოდ, საუკეთესო იყო მიმდინარე სეზონში და ამ შემთხვევაში, მხოლოდ მოვლენების ცვალებადობასა თუ მეტოქეთა გარდამავალ უპირატესობას არ ვგულისხმობთ...

"დინამოსა" და "სამტრედიას" შორის ჩატარებული მატჩი მართლაც ისეთი გამოდგა, ძალიან დიდი ხნის განმავლობაში რომ ემახსოვრება გულშემატკივარს; ვისურვებდით, რომ ასეთი ხარისხიანი ფეხბურთი ამ ტურშიც გვენახოს და აღარაფერს ვამბობთ უმთავრეს სურვილზეც, რასაც ჩვენს სტადიონებზე (მეტადრე - დედაქალაქში) გულშემატკივართა რაოდენობის მატება ჰქვია.

დაბოლოს, კიდევ ერთ სურვილზეც; უშეცდომო არავინ არის და ამ მხრივ გამონაკლისი არც ჩვენი არბიტრები არიან. თუმცა, ბოლო ორ ტურში ნამეტნავად თვალშისაცემი იყო ეს შეცდომები: ჯერ ბათუმის "დინამოს" არ ჩაუთვალეს, ჩვენი აზრით, ნაღდი გოლი, შემდეგ კი, "ტორპედოს" გაუუქმეს ასევე 100-პროცენტიანი გოლი!..



ოთხწრიან ჩემპიონატს "ერთი ამოსუნთქვით" ვერავინ გაივლის და მცირე (გნებავთ, დროებითი) ჩავარდნას, ძალიან დიდი ალბათობით, ფაქტობრივად, ყველა გუნდისგან უნდა ველოდოთ; თუმცა, ამ ყველაფრის მიუხედავად, ცოტა არ იყოს, "ზედმეტად" გვეჩვენა "ლოკომოტივის" ბოლოდროინდელი წარუმატებელი ასპარეზობა: გიორგი დევდარიანის დამოძღვრილი გუნდი ზედიზედ სამი წაგების შემდეგ ზედა სამეულს ჩამოშორდა; არადა, სულ რაღაც ორი კვირის წინათ "ლოკომოტივი" ეროვნული ლიგის ყველაზე შედეგიანი გუნდი იყო და ჩემპიონატის ლიდერ თბილისის "დინამოსაც" მხოლოდ და მხოლოდ 3 ქულით ჩამორჩებოდა.

კიდევ ვიმეორებთ: ყველა თამაშს ვერც ერთი გუნდი ვერ მოიგებს, მაგრამ ისიც ფაქტია, რომ "ლოკომოტივს" აშკარად მართებს შედეგის გაუმჯობესება, აღარაფერს ვამბობთ იმ ფაქტზე, რომ ბოლო სამ მატჩში გუნდმა მხოლოდ 1 გოლი გაიტანა მეტოქეთა კარში. არადა, პირველ წრეში "ლოკომოტივისათვის" ხომ მართლაც ჩვეულებრივი ამბავი იყო კონკრეტულ მატჩში ... 5 გოლის გატანა და ასე მოხდა "კოლხეთთან" "სტუმრად" ჩატარებულ მატჩში, როცა მამია გავაშელიშვილმა ჰეთ თრიკი შეასრულა, ირაკლი სიხარულიძემ კი - "დუბლი"! თუმცა, ამ ყველაფრის მიუხედავად, მაინც ძნელია იმის თქმა, რომ ერთ-ერთ აუტსაიდერთან მატჩის წინ "ლოკომოტივი" უპირობო ფავორიტია: "კოლხეთმა" ხომ მიმდინარე სეზონში არაერთი სიურპრიზი შემოგვთავაზა და არც ის დაგვავიწყდეს, რომ უამრავი პრობლემის მიუხედავად, გელა სანაიას გუნდი ხშირად ახერხებს პროგნოზების "ამოტრიალებას"...

ამ ტურის ერთ-ერთი ყველაზე საინტრიგო მატჩი, სადაც ერთმანეთს უნდა დაუპირისპირდეს მართლაც მშვენიერ ფორმაში მყოფი გუნდები: "დილაც" და "ტორპედოც" ამ ტურს ოთხმატჩიანი წაუგებელი სერიით ხვდებიან!

მოკლედ, აშკარად უფავორიტო წყვილია და სხვათა შორის, იმავეს ვიტყოდით იმ შემთხვევაშიც, "დილას" ეს მატჩი საკუთარ ქალაქში რომ ჩაეტარებინა...

მოგეხსენებათ, რომ თვეზე ოდნავ მეტიღა რჩება ევროპის 19-წლამდელთა ჩემპიონატის დაწყებამდე, რომლის გახსნით მატჩსაც სწორედ გორის თენგიზ ბურჯანაძის სახელობის სტადიონმა უნდა უმასპინძლოს; ანუ, ვიდრე გორის სტადიონზე სერიოზული სარეკონსტრუქციო სამუშაოები მიმდინარეობს, "დილა" თავის "საშინაო" მატჩებს სხვაგან ჩაატარებს და ამჯერად თავისთვის აშკარად იღბლიანი მიხეილ მესხის სტადიონიც შეარჩია!

შეგახსენებთ, რომ ზივ არიეს გუნდმა სულ რაღაც სამი დღის წინ ამავე არენაზე მოუგო "სამტრედიას", წინა თვეში კი (VII ტურში), "ლოკომოტივთან" დრამატულ მატჩში (3:3) უმნიშვნელოვანესი ქულა მოიპოვა.

ზედიზედ სამი მოგების წყალობით "ტორპედო" მეორე ადგილზეა და თუ გავითვალისწინებთ მეორე წრის დარჩენილი მატჩების კალენდარს, უნდა ვივარაუდოთ, რომ კახა ჩხეტიანის გუნდი ყველაფერს გააკეთებს ამ წარმატებული სერიის გასაგრძელებლად.

აქვე, ისიც უნდა ვთქვათ, რომ "ტორპედოსა" და საქართველოს ნაკრების მეკარე როინ კვასხვაძე ზედიზედ 4 ტურია გოლს არ უშვებს...

შარშან, 15 ოქტომბერს, გარდამავალ ჩემპიონატში "ჩიხურამ" რომ უმასპინძლა ივანწმინდაში "შუქურას", აი, იმის შემდეგ მხოლოდ ახლაღა ბრუნდება საკუთარ არენაზე სოსო ფრუიძის გუნდი!

თანაც, როგორ მეტოქესთან მატჩში: თბილისის "დინამოს" ხომ უკვე ათმატჩიანი წაუგებელი სერია აქვს და კახა კაჭარავას გუნდიც აბსოლუტურად დამსახურებულად იმყოფება სატურნირო ცხრილის სათავეში!

სხვა საკითხია, თუ რამდენად მალე შეძლებს ეროვნული ლიგის ერთ-ერთი ყველაზე ახალგაზრდული გუნდი ძალების აღდგენას "სამტრედიასთან" უმძიმესი მატჩიდან უმოკლეს დროში...

ბოლო ერთი თვის განმავლობაში უკვე არაერთხელ ითქვა მიმდინარე სეზონში "ჩიხურას" არასტაბილურ ასპარეზობაზე; ჩვენი აზრით, ამ ყველაფერს სხვადასხვა მიზეზი აქვს და ერთ-ერთი, ალბათ, ისიც უნდა იყოს, რომ ეროვნულ ლიგაში ყველაზე გამოცდილი ფეხბურთელებით დაკომპლექტებული გუნდი სეზონის სტარტიდან მოყოლებული, ვერაფრით ახერხებდა საშინაო მატჩების ჩატარებას საკუთარ სტადიონზე. თუმცა ეს, ალბათ, მხოლოდ ერთ-ერთი მიზეზია და არა - ერთადერთი...

ამ გუნდებს შორის ურთიერთდაპირისპირებათა ისტორიაში "დინამოს" აშკარა უპირატესობა აქვს, თუმცა ისიც უნდა ვთქვათ, რომ ივანწმინდაში ჩატარებული ბოლო ოთხი მატჩიდან "ჩიხურამ" ორი მოიგო და ორჯერაც ფრედ ითამაშა ჩვენი ქვეყნის ყველაზე ტიტულიან გუნდთან; ისე, მართლაც საინტერესო პაექრობა გველოდება: ეროვნული ლიგის ყველაზე "ასაკოვანი" გუნდი ყველაზე ახალგაზრდულის წინააღმდეგ!

აჭარული დერბის მონაწილე ორივე გუნდს ნამდვილად არა აქვს კარგი პერიოდი: "შუქურა" კვლავაც რჩება ეროვნულ ლიგაში ერთადერთ მოუგებელ გუნდად, წინა სეზონის ბრინჯაოსპრიზიორი ბათუმის "დინამო" კი ზედიზეედ ოთხმატჩიანი მოუგებელი სერიის შემდეგ სახიფათო ზონაში იმყოფება!

საკადრო პრობლემებიც უნდა ვახსენოთ, ორივე გუნდს თან რომ სდევს ამ სეზონის სტარტიდანვე. აღარაფერს ვამბობთ მწვრთნელების ხშირ ჩანაცვლებაზეც: ეროვნულ ლიგაში გასული 13 ტურის განმავლობაში ხომ მხოლოდ "შუქურასა" და ბათუმის "დინამოში" მოხდა სამწვრთნელო გადაადგილებები.

თანაც, ქობულეთელთა გუნდში უკვე მესამედ გამოიცვალა მთავარი მწვრთნელი, არ არის გამორიცხული, რომ იგივე სიტუაცია მოხდეს ბათუმის "დინამოშიც". მოკლედ, ამ აჭარულ დერბის უდიდესი სატურნირო ინტერესი აქვს და წინდაწინ ძალიან ძნელი სათქმელია, თუ რომელი გუნდი უფრო მალე მოახერხებს ამ კრიზისიდან უფრო მალე გამოსვლას.

ამ ტურის კიდევ ერთი გამორჩეული დაპირისპირება სამტრედიაში უნდა გაიმართოს: მოქმედი ჩემპიონისა და "საბურთალოს" ყველა დაპირისპირება ხომ უხვგოლიანი და საინტერესოა ხოლმე და, ვფიქრობთ, გამონაკლისი არც ეს მატჩი იქნება.

თანაც, წინა ტურში ორივე გუნდმა მარცხი იგემა და "სამტრედიაც" და "საბურთალოც" ამჯერად ყველა ვარიანტში შეეცდებიან სატურნირო მდგომარეობის გამოსწორებას. ძალიან დიდ ინტერესს იწვევს მწვრთნელთა ტაქტიკური დუელიც - მასპინძელთა თავკაცი გია ცეცაძეც და მისი კოლეგა გიორგი ჭიაბრიშვილიც ხომ შემტევ ფეხბურთს ანიჭებენ უპირატესობას.

რაღა შორს მივდივართ: გასულ ტურში, "სამტრედიამ" კინაღამ "შემოატრიალა" თბილისის "დინამოსთან" თამაში, როცა ორბურთიანი ჩამორჩენა აღმოფხვრა და ტყუპისცალივით მსგავსი (და, აშკარად დამუშავებული) ორი მშვენიერი კომბინაციით ჯერ ანგარიში გაათანაბრა, მერე კი... მოსაგებადაც გაიწია.

საბოლოოდ, ისე მოხდა, რომ არბიტრის მიერ კომპენსირებულ დროში "სამტრედიამ" თავის კარში მიიღო გოლი და სულაც უქულოდ დარჩა, მაგრამ, ვფიქრობთ, ნეიტრალური ქომაგებიც ვერ დარჩებოდნენ გულგრილნი ჩვენი ჩემპიონის თამაშის შემხედვარე "დინამოსთან" მატჩის მეორე ტაიმში...

ეროვნული ლიგა. XIV ტური
23 მაისი
თბილისი. "მიხეილ მესხი" (სათ). 18:00
ლოკომოტივი-კოლხეთი
ურთიერთშეხვედრები
27: +15 =4 -9, 48-39
პირველი წრე 5:0

თბილისი. "მიხეილ მესხი". 20:00
დილა-ტორპედო
ურთიერთშეხვედრები
54: +17 =7 -30, 64-99
პირველი წრე 1:1

24 მაისი
ივანწმინდა. ცენტრალური. 16:00
ჩიხურა-დინამო (თბ)
ურთიერთშეხვედრები
15: +2 =3 -10, 11-39
პირველი წრე 1:2

ქობულეთი. "ჩელე არენა". 18:00
შუქურა-დინამო (ბთ)
ურთიერთშეხვედრები
7: +1 =2 -4, 5-12
პირველი წრე 0:2

სამტრედია. "ერ. მანჯგალაძე". 18:00
სამტრედია-საბურთალო
ურთიერთშეხვედრები
5: +3 =1 -1, 17-8
პირველი წრე 2:1

ბომბარდირები
ი. სიხარულიძე (ლოკომოტივი) 11
ბ. არაბული (დინამო თბ) 8
მ. გავაშელიშვილი (ლოკომოტივი) 8
მ. კოვტალიუკი (კოლხეთი) 7

(იბეჭდება მცირე ცვლილებით)
ყოველდღიური სპორტული გაზეთი "ლელო"