სამშაბათს ლანჩხუთში სპორტის მინისტრი ლევან ყიფიანი იმყოფებოდა, რომელმაც მაჟორიტარ დეპუტატ თემურ ჩხაიძესთან, გამგებელ ზაზა ურუშაძესა და საკრებულოს სპორტის კომისიის თავმჯდომარე გოჩა ჯანაშიასთან სამუშაო შეხვედრა გამართა. შეხვედრის დასრულების შემდეგ ლევან ყიფიანს რამდენიმე შეკითხვა დავუსვით:
- ბატონო ლევან, რა არის დღევანდელი ვიზიტის მიზანი?
- ჩვენ დავიწყეთ რეგიონებში ვიზიტები და ადგილზე ვეცნობით ვითარებას. სპორტთან დაკავშირებულ საკითხებსა და პრობლემებზე ვისაუბრეთ. რა თქმა უნდა, საუბარი გვქონდა "გურიაზეც", რომელიც უმაღლეს ლიგაში გადავიდა. ჩვენმა ჯგუფებმა გურიის რეგიონში ინფრასტრუქტურის მდგომარეობა უკვე შეისწავლა. ამას ვაკეთებთ ქვეყნის მასშტაბით. მალე გვექნება
- გაჟღერდა ინფორმაცია, რომ უმაღლესლიგელ გუნდებს სახელმწიფო დაეხმარება...
- არასწორი ინფორმაციაა, სახელმწიფო ისედაც აფინანსებს მუნიციპალურ კლუბებს, მათ შორის - "გურიას". უბრალოდ, რეკომენდაცია მივეცით ადგილობრივ ხელისუფლებას, რომ გამოინახოს სამართლებრივი ფორმა, რაც უფრო კომფორტულს გახდის გუნდების ყოფას. ეს ეხება უმაღლეს, პირველ ლიგას და ბავშვთა ფეხბურთსაც.
- ლანჩხუთის სტადიონთან დაკავშირებით რისი თქმა შეგიძლიათ?
- როგორც ვიცით, ფეხბურთის ფედერაციის პროექტით, დაგებულია მოედანი, რომელიც კარგ მდგომარეობაშია, თუმცა მას მოვლა სჭირდება, თორემ მოკლე ხანში გაფუჭდება და ის ფულიც გადაყრილი იქნება, რომელიც ჩაიდო. ლანჩხუთის სტადიონი ყოველთვის იყო ერთ-ერთი გამორჩეული არენა, გამომდინარე იმ პროცესებიდან, რაც აქ ხდებოდა და იმ პოპულარობიდან, რაც "გურიას" მაშინ ჰქონდა.
კლუბის წარმატებების პარალელურად, რა თქმა უნდა, სტადიონის რეკონსტრუქციაც დღის წესრიგში დადგება. მთავარია, ყველაფერი გავაკეთოთ იმისთვის, რომ კლუბი იყოს მიმზიდველი ინვესტორებისთვის, თუმცა ეს არ უნდა ხდებოდეს ძალდატანებით, არამედ - შეთანხმებით.
ჯერჯერობით "გურია" არის მუნიციპალური კლუბი და ჩვენ ყველანაირად უნდა შევუწყოთ ხელი მის განვითარებას.
- ბატონო ლევან, კერძო კლუბების პრეტენზიებზეც გკითხავთ. "ზესტაფონის" შემდეგ თითქმის ანალოგიური ინფორმაცია გაჟღერდა "ტორპედოსთან" დაკავშირებითაც...
- არ ვიცი, რა პრეტენზიებზეა ლაპარაკი.
- თანაბარ პირობებში ჩაგვაყენონ, ანუ ჩვენც დაგვაფინანსონო...
- არავინ არავის აფინანსებს, მუნიციპალიტეტი როგორც აფინანსებდა, ისე აფინანსებს. თვითონ სისტემა ისე უნდა შეიქმნას, რომ თანაბარ პირობებში იყოს როგორც მუნიციპალური, ასევე კერძო კლუბები.
- სწორედ ამას ითხოვენ...
- ეს ნათქვამი იყო კონკრეტულ პიროვნებებზე, ეს არის თითიდან გამოწოვილი რაღაც ვაჭრობის ტიპის ამბავი. ეს წინადადება ისედაც არსებობდა, მოლაპარაკებული ვიყავი, შეთანხმებულიც.
- ილია კოკაიასთანაც?
- კი, მასთანაც დალაპარაკებული ვიყავი, რომ მზადდება პროექტი, რომელიც მისაღები უნდა იყოს როგორც მუნიციპალური, ასევე კერძო კლუბებისთვის. ამასთან, გეტყვით, რომ ის ფორმა, რაც დღესაც არსებობს, ანუ კერძო და მუნიციპალური კლუბები, ანალოგიურად არსებობს წამყვან საფეხბურთო ქვეყნებშიც. მე შემიძლია დავასახელო მაგალითად თურქეთი, სადაც მუნიციპალური დაფინანსება ჯერ კიდევ არსებობს. ასევე, იქ არის კერძო კლუბებიც.
ეს არ არის ახალი და თუ კერძო ინვესტიციისთვის იქნება საინტერესო კონკრეტული კლუბი, ეს იქნება ფეხბურთის, კალათბურთის თუ სხვა, ეს უნდა მოხდეს შესაბამისი ბაზრის განვითარების პირობებში. თუ ბაზარი არ დარჩა, ვიღაცისთვის ამის ძალდატანებით მიბმა იქნება შეუძლებელი და იწვევს იმ პროცესებს, რაც მოხდა გორში. ანუ ჩვენ ყველანაირად უნდა ვიყოთ მზად, ავიცილოთ ის პროცესები, რაც "დილასთან" დაკავშირებით მოხდა.
* * *
ლანჩხუთის მაჟორიტარმა, თემურ ჩხაიძემ აღნიშნა, რომ ამ ეტაპზე ქართული ფეხბურთი რომ გადარჩეს, სახელმწიფო გვერდით უნდა დაუდგეს მას და ასეც მოხდება.
გამგებელი ზაზა ურუშაძე მინისტრთან შეხვედრით კმაყოფილი იყო:
"ბატონმა ლევანმა მოგვილოცა უმაღლეს ლიგაში გადასვლა. საუბარი სპორტის სხვა სახეობებზეც გვქონდა, მაგრამ პრიორიტეტი ფეხბურთი და "გურიაა".
სახელმწიფო დაეხმარება მუნიციპალურ კლუბებს, თუმცა მხოლოდ ამის იმედზე არ ვიქნებით, ჩვენ სხვა ვარიანტებსაც ვცდით. ყველაფერი კარგად იქნება - "გურია" დაიბრუნებს თავის სახელს".
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
"გურია" მაჩანჩალა არც უმაღლესში იქნება, თასის ფინალს კი აქედანვე ვუმიზნებთ!
დომინოს პრინციპი - ილია კოკაია "ზესტაფონს" არ მიატოვებსო...
ფრიდონ ინჯია: ბატონო ფეხბურთის ფედერაციის პრეზიდენტო, გაგვეცით პასუხი!
ზვიად სიჭინავა: ილია კოკაიას მეგობრულად ვთხოვ, არ მიატოვოს "ზესტაფონი"
ილია კოკაიამ მუნიციპალიტეტს "ზესტაფონის" გადაცემის წერილით მიმართა
ისევ ილია კოკაია და მორიგი ნაღმი: ამას ვერც წარმოვიდგენდი...
რომან ფიფია: პირდაპირ ვიტყვი - აქ დიდი სიბინძურე ტრიალებს!
დიდი სკანდალის მოლოდინში: გარიგებული მატჩები, ვერსიები, გამოჟონილი ამბები
