"ბორჯღალოსნები" | იაპონია თბილისში მოდის

2025 წლის შემოდგომის ტესტ-მატჩებს "ბორჯღალოსნები" საქართველოში, საკუთარი გულშემატკივრის წინაშე გამართავენ. სამიდან ერთ-ერთი მეტოქე, რომელსაც 22 ნოემბერს ვუმასპინძლებთ, ტიერ1-ის იაპონია იქნება, რომელსაც შარშან სტუმრად მოვუგეთ და ახლა რევანში სწყურიათ.

"საქართველო მსოფლიო რაგბში ყველაზე განვითარებადი ქვეყანაა. ისტორიულად ძლიერი ქართველი მორკინალები, ახლა დიდ დახმარებას იღებენ ინდივიდუალიზმით გამორჩეული ხაზის მოთამაშეებისგან. საქართველოსთან თამაში ევროპული ტურის შესანიშნავი დასასრული იქნება და ის მოთამაშეებს არასდროს დაავიწყდებათ", - განაცხადა იაპონიის ნაკრების ავსტრალიელმა დამრიგებელმა ედი ჯონსმა.

იაპონიასთან აქამდე 7-ჯერ გვითამაშია და მიუხედავად იმისა, რომ მეტოქე შარშან სტუმრად დავამარცხეთ, მათთან ჯერაც უარყოფითი ბალანსი გვაქვს. განვლილი თამაშებიდან სამი თბილისში, "მიხეილ მესხზე" გაიმართა, სამჯერ იაპონელებმა გვიმასპინძლეს, ერთი შეხვედრა კი ნეიტრალურ მოედანზე შედგა. მათგან ორი "ბორჯღალოსნების" გამარჯვებით დასრულდა, 5-ში კი მეტოქემ იმარჯვა.

იაპონიას პირველად 2006 წელს ოსაკაში ვეთამაშეთ და მასპინძლებმა 32:7 მოიგეს. 2012 წელს აზიელები "მიხეილ მესხზე" გვეწვივნენ და ბოლო წუთზე აღებული 3 ქულით 25:22 მოიგეს. 2014 წელს იაპონელებს კვლავ "მესხზე" დავუხვდით და ამჯერად 35:24 გავიმარჯვეთ.

მომდევნო წელს იაპონელებს ინგლისში, გლოსთერში მსოფლიო თასის წინ შევხვდით (10:13), 2016-ში კი მესამედ ვუმასპინძლეთ თბილისში (22:28). 2018 წელს მასპინძლებმა იაპონიაში მშრალი ანგარიშით, 28:0 გვაჯობეს, შარშან ზაფხულში კი მათ სენდაიში ვეწვიეთ და 25:23 დავამარცხეთ.