დილა-იაგელონია 1:1 - ამხანაგური ჩხუბი და ზავი [VIDEO]

"დილამ" თურქულ შეკრებაზე პირველი სპარინგი გამართა და პოლონურ "იაგელონიას" (სადაც 23 წლის ქართველი შემტევი ნახევარმცველი ნიკა ძალამიძე ირიცხება, თუმცა მას ამ სპარინგში არ უთამაშია) დაუზავდა - 1:1.

გორელთა პირველი მეტოქე, აქამდე ცნობილი განრიგით, სომხური "შირაქი" უნდა ყოფილიყო, თუმცა უჩა სოსიაშვილის გუნდს სპარინგ-პარტნიორის შეცვლით არაფერი წაუგია - "იაგელონია" გაცილებით ძლიერია, ვიდრე "შირაქი" და ამით მწვრთნელი თავისი გუნდის შესაძლებლობებსაც უკეთ დაინახავდა.

"დილამ" პოლონელებს ტოლი არც ორთაბრძოლებში დაუდო და არც სახიფათო მომენტებში. გატანილი გოლის გარდა, სოსიაშვილის შეგირდებმა კიდევ ოთხი საგოლე შანსი ვერ გამოიყენეს. თავის გამოჩენა შეეძლოთ მოდებაძეს, თექთურმანიძეს და ორჯერ ფალავანდიშვილს.

ანგარიში სწორედ "დილამ" გახსნა. 32-ე წუთზე მეტოქის მეკარის არაზუსტი პასი გიორგი ერისთავმა ჩაჭრა, საჯარიმოში შევიდა და ქართული გუნდი დააწინაურა.

პოლონელებმა წონასწორობა ტაიმის მიწურულს, კაროლ სვიდერსკის გოლით აღადგინეს.
63-ე წუთზე "იაგელონიას" ფეხბურთელი უხეშობის გამო მსაჯმა მინდვრიდან გააძევა, თუმცა ურთიერთშეთანხმების საფუძველზე, პოლონელებმა თამაში კვლავ 11 კაცით გააგრძელეს.

მოხდა ინციდენტიც - ერთ ეპიზოდში ფეხბურთელები ერთმანეთს წაეკიდნენ, თუმცა ორივე მხარის ჩარევით პრობლემა მალევე მოგვარდა. გუნდებმა ასეთი შემადგენლობებით ითამაშეს:
დილა: მიგინეიშვილი, კვახაძე, ქარქუზაშვილი, ჯაფარიძე, ხურცილავა, რაზმაძე, ფალავანდიშვილი, თექთურმანიძე, კვეკვესკირი, ერისთავი, მოდებაძე; შეცვლაზე: სომხიშვილი, ხიდეშელი, გვალია, მელქაძე, სეთურიძე, გორელიშვილი, ახალკაცი.

იაგელონია: ბარანი, შტრაუსი, პავლიკი, პაინოვსკი, ტიმინსკი, პრუსაჩიკი, აუგუსტინიაკი, სვიდერსკი, გაიკო, მაცკევიჩი, პიატკოვსკი; შეცვლაზე: მატიშევსკი, კაზმარჩიკი, კონცევიჩი, ტუზინსკი, პიხნიაკი.

მორიგ ამხანაგურ მატჩს "დილა" 3 თებერვალს, გერმანიის რეგიონული ლიგის ერთ-ერთი კლუბის წინააღმდეგ გამართავს.

(იბეჭდება მცირე ცვლილებით)
ყოველდღიური სპორტული გაზეთი "ლელო"