უმაღლესი ლიგის IV ტურის მიმოხილვა და სიმბოლური ნაკრები

უმაღლესი ლიგის გათამაშება მართლაც საინტერესოდ განახლდა: პარასკევსა და შაბათს გამართულ თითქმის ყველა მატჩს არც დაძაბულობა აკლდა და არც ინტრიგა;

ჩვენს ფეხბურთელებს შედეგიანობაც არ დაეწუნებოდათ (ერთ მატჩში, საშუალოდ, თითქმის 2 გოლი), ოთხმა მოთამაშემ დუბლი შეასრულა, იყო კურიოზულიც და რამდენიმე მართლაც ეფექტური გოლიც.

ამას გარდა, საკმარისზე მეტი გადაადგილება მოხდა სატურნირო ცხრილშიც: ყველაფერს თავი რომ დავანებოთ, ჩემპიონატში ერთადერთი გუნდიღა დარჩა, ქულათა მაქსიმუმით რომ აგრძელებს ასპარეზობას და გასული ტურის მიმოხილვაც სწორედ თბილისის "დინამოს" ჩინებული სტარტით გვინდა დავიწყოთ...

თბილისის "დინამომ" არც ამჯერად უღალატა "ტრადიციას" და მეტოქის კარში კვლავაც 4 გოლი გაიტანა!

ვერაფერს ვიტყვით, მართლაც მშვენიერ ფორმაშია გია გეგუჩაძის დამოძღვრილი "დინამო", უდანაკარგოდ რომ აგრძელებს ასპარეზობას და, შინ თუ გარეთ, არავის ინდობს. "დინამომ" ზედიზედ მეოთხე მატჩი მოიგო დიდი ანგარიშით და საერთოდაც, მსგავსი სტარტი ჩვენს ყველაზე ტიტულიან კლუბს უკანასკნელად 2012-13 წლების სეზონის სტარტზე ჰქონდა; შეგახსენებთ, რომ ის სეზონი "დინამოს" საჩემპიონო ტრიუმფით დასრულდა, ხოლო გუნდის მთავარი მწვრთნელი დუშან უჰრინი-უმცროსი გახლდათ.

უფრო შთამბეჭდავი სტარტი კი "დინამოს" უფროსი უჰრინის ხელმძღვანელობის დროს ჰქონდა: 2007/08 წლების სეზონში გუნდმა ზედიზედ 8 მატჩი მოიგო, მერე კი ჩემპიონიც გახდა. სარეკორდო მაჩვენებელი კი სეზონის სტარტზე 11 ზედიზედ მოგებული შეხვედრაა: ასეთ მიღწევას "დინამომ" ჯერ გივი ნოდიას მწვრთნელობის დროს (1993-94) მიაღწია, მერე კი - დავით ყიფიანის დროს (1996-97).

...ისევ მიმდინარე სეზონსა და გასულ ტურს დავუბრუნდეთ და ისიც ვთქვათ, რომ "დინამოს" შემადგენლობაში კვლავაც გაიბრწყინა მართლაც უბერებელმა ალექსანდრე იაშვილმა, რომელმაც ორი საგოლე პასი გააკეთა. ასევე ცალკე აღნიშვნის ღირსია გიორგი ქვილითაიაც: 21 წლის ცენტრფორვარდმა ზედიზედ მეორე შეხვედრაში გამოიჩინა თავი, თანაც, ამჯერად დუბლი შეასრულა.

დინამოელთა კიდევ ორი ფეხბურთელის შედეგიანი თამაშიც არ უნდა გამოგვრჩეს: 23 წლის ჯაბა ჯიღაურმა სეზონის სტარტზე უკვე 4 გოლი გაიტანა, 20 წლის მათე ცინცაძემ კი - 3, არადა, ამპლუით ორივე ნახევარმცველია...

გასული ტურის შემდეგ სატურნირო ცხრილში რამდენიმე გადაადგილება მოხდა და, უპირველეს ყოვლისა, "დილას" მეორე ადგილამდე აღზევება გვინდა აღვნიშნოთ; ერთი მხრივ, ამაში მოულოდნელი არაფერია: თბილისის "დინამოს" ამ სეზონში თუ რომელიმე გუნდი გაუწევს კონკურენციას, ასეთად ხომ სწორედ "დილა" გვესახება.

უჩა სოსიაშვილის გუნდი დაუმარცხებლადაც ასპარეზობს, "გზადაგზა" გამოცდილ ახლწვეულებსაც იმატებს (ამ ტურში გულვერდ თომაშვილი გამოჩნდა, უახლოეს ტურებში გოგიტა გოგუას ველოდებით), გასულ ტურში კი არცთუ ხელწამოსაკრავი მეტოქე ("ცხინვალი") დიდი ანგარიშით 3:0 დაამარცხა.

ჩემპიონატში კიდევ ერთი დაუმარცხებელი გუნდია: ვარლამ კილასონიას დამოძღვრილი "სიონი". აი, "მერანი" კი ერთადერთია, სეზონის სტარტზე ოთხივე მატჩი რომ წააგო. არადა, ამ ტურამდე სხვა გუნდებიც იმავე სიტუაციაში იყვნენ, მაგრამ "კოლხეთმა" და "ლოკომოტივმა" პირველი მატჩები მოიგეს, "საპოვნელამ" კი პირველი ქულა მოიპოვა.

პირველი მარცხი იწვნია "სამტრედიამ", თუმცა გია ცეცაძის გაწვრთნილ გუნდზე ენა ვის უნდა მოუბრუნდეს": გასული ტურის, უდავოდ, ერთ-ერთ გამორჩეულ მატჩში ("საბურთალო"-"სამტრედია") კოპლიმენტებს ხომ ერთნაირი დოზით იმსახურებდა როგორც გამარჯვებული, ასევე - დამარცხებულიც.

ზემოთაც აღვნიშნეთ, რომ გასულ ტურში ჩვენს ფეხბურთელებს ურიგო შედეგიანობა ნამდვილად არ უჩვენებიათ; განსაკუთრებით კი ოთხი თავდამსხმელის გარჯა გვინდა გამოვყოთ, დუბლი ვინც შეასრულა. თბილისის "დინამოს" ცენტრფორვარდზე, გიორგი ქვილითაიაზე ზემოთ უკვე ვისაუბრეთ.

ჩინებული მატჩი ჩაატარა "დილას" 31 წლის შემტევმა ოთარ მარცვალაძემ, რომელმაც "ცხინვალის" კარში 2 ოსტატური გოლიც გაიტანა და საგოლე გადაცემაც მიითვალა! ასევე ჩინებულად გაისარჯნენ "ჩიხურას" ფორვარდებიც: 23 წლის თორნიკე მუმლაძემაც 2 გოლი გაიტანა "ზუგდიდის" კარში და მოედანზე მის ნაცვლად შემოსულმა მისმა თანატოლმა ლაშა კუჭუხიძემ.

აღსანიშნავია, რომ კუჭუხიძე მოედანზე მატჩის დასრულებამდე 10 წუთით ადრე გამოვიდა, თუმცა მაინც მოასწრო "დუბლის": შესრულება.

ასევე შეცვლაზე შემოსულმა კიდევ ერთმა ფეხბურთელმა შეძლო თავის გამოჩენა: "ლოკომოტივის" 25 წლის შემტევმა ზვიად ქანთარიამ.

გასულ ტურში რამდენიმე ფეხბურთელმა სადებიუტო მატჩი ჩაატარა უმაღლეს ლიგაში, ზოგმაც სადებიუტო გოლი გაიტანა. ასე მაგალითად, პირველად ითამაშეს უმაღლეს ლიგაში 19 წლის გივი შალამბერიძემ ("მერანი"), 18 წლის ანრი ჭიჭინაძემ ("ტორპედო") და 16 წლის ლუკა სანიკიძემ ("საბურთალო").

განსაკუთრებით, ამ უკანასკნელის აღნიშვნა გვინდა: სანიკიძემ ტრავმირებული თანაგუნდელი, ასევე ახალგაზრდა, 18 წლის ბექა ქურდაძე შეცვალა და ამ ჭაბუკი მეკარის ჩინებული თამაშიც იყო ერთ-ერთი მთავარი მიზეზი, "საბურთალომ" სეზონში პირველი მარცხი რომ აწვნია "სამტრედიას".

ასევე სადებიუტო მატჩები ჩაატარეს საქართველოს ჩემპიონატში ახალმა ლეგიონერებმა: ანდრეი ნიკონოვმა, პიოტრ სევასტიანენკომ (ორივე - რუსეთი), ალექსანდროს პაპადოპულოსმა (საბერძნეთი).

რაც შეეხება სადებიუტო გოლებს, პირველად იყოჩაღეს: ბიძინა ცინცაძემ ("სამტრედია"), გაგი მარგველაშვილმა ("საბურთალო"), ლევან ნონიკაშვილმა ("დილა"), დემურ ჩიხლაძემ ("ლოკომოტივი") და ზვიად ქანთარიამ ("ლოკომოტივი").

ისე, რახან ლეგიონერები ვახსენეთ, ბარემ ისიც ვთქვათ, რომ საქართველოს ჩემპიონატს ორწლიანი პაუზის მერე ბოტი გოა დემელი (კოტ დ"ივუარი) დაუბრუნდა: "ზესტაფონის" ყოფილი ფორვარდი ამჯერად "გურიაში" აგრძელებს კარიერას.

არ უნდა გამოგვრჩეს მერაბ ურიდიაც, რომელსაც საქართველოს ჩემპიონატში წინა ტურში ჰქონდა დებიუტი: ყაზანის "რუბინის" ყოფილი ფორვარდი არასტაბილურად მოასპარეზე "შუქურაში" ჩაირიცხა.

გასულ ტურში რამდენიმე ფეხბურთელმა თავისი ახალი გუნდის მაისურით პირველი გოლი გაიტანა: 21 წლის დაჩი ცნობილაძემ ("სამტრედია"), 23 წლის გიორგი ქიმაძემ ("ტორპედო"), 20 წლის ცოტნე ქებურიამ ("კოლხეთი").

რამდენიმე ფეხბურთელმა კი ამ სეზონში ახალი გუნდის მაისურით პირველი მატჩები ჩაატარეს: 31 წლის მიხეილ მუჯრიშვილმა ("დილა"), 29 წლის გიგა ბეჭვაიამ ("ცხინვალი"), 23 წლის თორნიკე თუხარელმა ("ზუგდიდი"), 24 წლის ნიკოლოზ საბანაძემ ("საბურთალო").

(იბეჭდება მცირე ცვლილებით)
ყოველდღიური სპორტული გაზეთი "ლელო"