უმაღლესი ლიგა. XI ტურის წინ: ჩემპიონის გასვლა და აჭარული დერბი

დღეს, 7 ნოემბერს, საქართველოს ეროვნული საფეხბურთო ჩემპიონატის XI ტურის სამი შეხვედრა გაიმართება.

ქუთაისში თერჯოლის "საპოვნელასთან" სათამაშოდ ჩავა გორის "დილა", ქობულეთში "შუქურა" ბათუმის"დინამოს" უმასპინძლებს, ხოლო თბილისში "ბენდელაზე" "საბურთალო" მარტვილის "მერანს" მიიღებს. სამივე მატჩი 14:00 სთ-ზე დაიწყება.

შეგახსენებთ, რომ ტური 6 ნოემბერს, თბილისში, "ლოკომოტივისა" და "ზუგდიდის" მატჩით გაიხსნა, რომელშიც გამარჯვება მასპინძლებს დარჩათ - 3:0 (იხილეთ ვრცლად). ტური ხვალ, 8 ნოემბერს დასრულდება.

გასული თვე თერჯოლელთა გუნდისათვის აშკარად წარმატებულად უნდა მივიჩნიოთ: მირიან გეწაძის გუნდმა ორი მატჩის მოგებით რამდენიმე კონკურენტი ჩამოიტოვა.

აი, "დილაზე" კი ნამდვილად ვერავინ იტყვის, ოქტომბერში ჩვეულ დონეზე იასპარეზაო: ჩემპიონატში ორ მტკივნეულ მარცხს თასიდან გამოვარდნაც მოჰყვა.

არც ის იქნება უმნიშვნელო ამბავი, რომ ხვალინდელ მატჩში "დილას" ერთ-ერთი საკვანძო ფეხბურთელი გიორგი ნავალოვსკი და მთავარი მწვრთნელი უჩა სოსიაშვილი არ ეყოლება: ორივე დისკვალიფიცირებულია.

აღსანიშნავია ის ფაქტიც, რომ "საპოვნელა" და "დილა" უმაღლეს ლიგაში ერთმანეთს 21-წლიანი პაუზის მერე ხვდებიან.

სეზონის დაწყების წინ ცოტა თუ წარმოიდგენდა მოვლენების ასეთ განვითარებას: 10 ტურის შემდეგ "შუქურა" პირველ სამეულს სულ მცირედით ჩამორჩება და, ამას გარდა, 6 ქულით უსწრებს ბათუმის "დინამოს"!

აჭარული დერბის მონაწილენი აშკარად სხვადასხვა განწყობით ხვდებიან ხვალინდელ დაპირისპირებას: თემურ შალამბერიძის გაწვრთნილ "შუქურას" მართლაც შთამბეჭდავი სერია (ზედიზედ 4 მოგება, 8 წაუგებელი შეხვედრა) აქვს.

აი, საკადრო პრობლემებმოძალებულმა ბათუმის "დინამომ" კი ჩემპიონატსა და თასზე ჩატარებულ ბოლო 9 შეხვედრაში მხოლოდ ერთხელ გაიმარჯვა...

ალბათ, სწორედ ამას უნდა დავაბრალოთ "საბურთალოს" არასტაბილური ასპარეზობაც, თუმცა ბევრად კი არა, მართლაც კატასტროფული ეთქმის "მერანის" სატურნირო მდგომარეობას: მარტვილელთა გუნდი ზედიზედ ოთხი წაგების შემდეგ კვლავაც უიმედო აუტსაიდერად რჩება და დღევანდელი გადმოსახედიდან, ცოტა არ იყოს, ძნელი წარმოსადგენიც არის, თუ როგორ უნდა დაიძლიოს ეს კრიზისი.