უმაღლესი ლიგის XVIII ტურის მიმოხილვა და სიმბოლური ნაკრები

გასული ტურით აშკარად არასაფეხბურთო თებერვალიც სამუდამოდ გავაცილეთ და საერთოდ, ზამთარიც: ამიერიდან ჩვენი ჩემპიონატი ხომ "გაზაფხული-შემოდგომის" სისტემაზე გადადის და 2017 წლიდან სეზონი ამჯერად უკვე მარტში განახლდება.

გასულ თვეს მალე შევაჯამებთ, მანამდე კი XVIII ტურის გამორჩეული ფაქტები თუ მოვლენები ვახსენოთ, მით უფრო, რომ მეტ-ნაკლებად გამოსარჩევი საფეხბურთო ამბები მართლაც მოხდა ჩვენს ჩემპიონატში.

ოღონდ იმაზე აღარ გავამახვილებთ ყურადღებას, რომ ტურის ერთი მატჩი უჩვეულოდ ადრე, 12 საათზე (!) დაიწყო! ჯერ ერთი, მსგავსი ფაქტი 90-იანი წლების დასაწყისში ადრეც მომხდარა უმაღლეს ლიგაში, აი, ქვედა ლიგებსა თუ დუბლების ჩემპიონატში კი... ამაზე ადრეც დაწყებულა ოფიციალური შეხვედრები!..

დიდ ლიგებში, მაგალითად - პრიმერა დივიზიონსა და პრემიერლიგაში, ეს ჩვეულებრივი ამბავია კვირაობით, მაგრამ იქ ეს ტელერეპორტაჟებზეა დამოკიდებული, ჩვენთან კი...

მეორე წრის დაწყებიდან ერთადერთი გუნდი თბილისის "დინამოა", სამივე მატჩი რომ მოიგო, თანაც "საბურთალოსთან" გამარჯვება ჩვენი ყველაზე ტიტულიანი კლუბისათვის ზედიზედ მეათე იყო! მერე, როცა გაირკვა, რომ "დინამოს" უპირველესმა მდევარმა "დილამ" მარცხი იწვნია, პირველ და მეორე ადგილებს შორის სხვაობა უკვე 10 ქულა გახდა!

მოკლედ, ძალიან ძნელი წარმოსადგენია, რომ სეზონის ბოლომდე თბილისის "დინამომ" ამხელა უპირატესობა გაანიავოს. მით უფრო, რომ "დინამო" ნელ-ნელა შედის ოპტიმალურ ფორმაში და წინა ორი მატჩისაგან განსხვავებით, გუნდის თამაშში დადებითი ბევრად სჭარბობდა უარყოფითს.

აღარაფერს ვამბობთ იმ ფუფუნებაზე, რითაც "დინამოს" ყველა დანარჩენ გუნდისაგან განასხვავებს: მთავარი მწვრთნელის, იურაი იარაბეკის განკარგულებაში ხომ, ფაქტობრივად, 2 სრულფასოვანი შემადგენლობაა და სლოვაკი სპეციალისტიც თავისუფლად და უმტკივნეულოდ ახდენს ძირითად შემადგენლობაში როტაციას.

ახლაც, "საბურთალოს" წინააღმდეგ, წინა მატჩისაგან აშკარად გადახალისებული შემადგენლობა ვიხილეთ, მაგრამ "დინამომ" მართლაც იოლად გაიმარჯვა დედაქალაქურ დერბიში და თუ ასე გაგრძელდა, დიდი შანსია, საჩემპიონო ზეიმი... აპრილში მოაწყოს!..

მას შემდეგ, რაც ჩემპიონატი "გახურდა", საუკეთესო ბომბარდირთა დავაში, ძალიან ხშირად, ორ ან სამ ფეხბურთელს ჰქონდა ხოლმე ერთნაირი შედეგი. ამ ტურის მერე კი კონკრეტული ფეხბურთელი დაწინაურდა: 22 წლის გიორგი ქვილითაია 15 გოლით ბომბარდირთა სიას სათავეში ჩაუდგა და დიდი ალბათობით, სწორედ ეს ახალგაზრდა ცენტრფორვარდი უნდა მივიჩნიოთ საუკეთესო ბომბარდირთა შორის უპირველეს კანდიდატად, მით უფრო, რომ მისი უპირველესი კონკურენტი ნიკა კაჭარავა ამიერიდან რუსეთის პრემიერლიგაში ("როსტოვში") იასპარეზებს.

თუმცა სეზონის დასრულებამდე კიდევ 12 ტურია დარჩენილი და მოვლენების სხვაგვარად განვითარებასაც ნუ გამოვრიცხავთ; თანაც, დარწმუნებულნი ვართ, რომ საუკეთესო ბომბარდირობისათვის ისეთი გამოცდილი ფორვარდებიც იბრძოლებენ, როგორებიც არიან ოთარ მარცვალაძე ("დილა") და დიმიტრი ტატანაშვილი ("სიონი").

აქვე, ერთ კონკრეტულ ფეხბურთელზეც: "სამტრედიის" 21 წლის თავდამსხმელმა ბუდუ ზივზივაძემ მეორე წრეში ჩატარებულ სამივე მატჩში შეძლო თავის გამოჩენა და 10 გოლით საუკეთესო ბომბარდირთა დავაშიც ჩაერთო.

ბომბარდირების თემას შევეხეთ და ისიც სათქმელია, რომ მეორე წრის დასაწყისში შედეგიანობის საშუალო მაჩვენებელმა საგრძნობლად მოიკლო; ეგ კი არა, გასულ ტურში, საერთოდაც, შედეგიანობის ანტირეკორდი დამყარდა: რვა მატჩში 16 გოლი გავიდა! აქამდე ყველაზე დაბალი მაჩვენებელი XII ტურში იყო, როცა 17 გოლი გავიდა.

გასული ტური იმითაც იყო აღსანიშნავი, რომ რვა შეხვედრიდან მხოლოდ ერთში გაიმარჯვეს მასპინძლებმა: 5 მატჩი სტუმრებმა მოიგეს, 2 კი ფრედ დასრულდა.

თუმცა ეს არ არის სტუმართა ზეობის სარეკორდო მაჩვენებელი ამ სეზონში: პირველი წრის ბოლო ტურში, 2015 წლის 11-12 დეკემბერს რომ ჩატარდა, მასპინძლებმა, საერთოდ, ვერც ერთი მატჩი ვერ მოიგეს (3 შეხვედრა ფრედ დამთავრდა, 5 დაპირისპირება კი სტუმართა გამარჯვებით დასრულდა).

ზემოთაც აღვნიშნეთ, რომ თბილისის "დინამომ" ზედიზედ მეათე მოგებით დიდი ნაბიჯი გადადგა მორიგი ტიტულის მოსაპოვებლად; ანუ, ძალიან დიდი ალბათობით, ამჯერად მთავარი ინტრიგა - საჩემპიონო რბოლა კი არა, ევროპის ლიგის საგზურებისთვის ბრძოლა უნდა იყოს, მით უფრო, რომ პირველი წრის შემდეგ სატურნირო ცხრილში სერიოზული გადაადგილებები მოხდა და დღევანდელი მონაცემებით, სულ მცირე, შვიდ გუნდს უნდა ჰქონდეს ევროპალიგის საგზურის მოსაპოვებლად პრეტენზია - "დილას", "სამტრედიას", "ცხინვალს", ბათუმის "დინამოს", "ჩიხურას", "სიონს" და "ტორპედოს".

თანაც, ამათგან ორი გუნდი ("ჩიხურა", "სიონი") თასის ნახევარფინალშია გასული და ამ გათამაშებიდანაც შეეცდება ევროტურნირის საგზურის მოპოვებას.

სეზონის დაწყებიდან დღემდე უმაღლეს ლიგაში 6 შემთხვევა იყო, როცა კონკრეტულმა ფეხბურთელმა შეძლო ერთ მატჩში სამი გოლის გატანა: ოთარ მარცვალაძემ ("დილა"), გიორგი ქვილითაიამ ("დინამო", თბილისი), გიორგი ბერიაშვილმა ("დინამო", ბათუმი), დიმიტრი ტატანაშვილმა ("სიონი"), ირაკლი სიხარულიძემ ("სამტრედია") და ნიკა კაჭარავამ ("ცხინვალი").

ყველა ეს ჰეთ-თრიკი პირველ წრეში შესრულდა, აი, მეორეში კი უკვე 3 ტური გავიდა და მსგავსი შედეგი ჯერჯერობით არც ერთ ფეხბურთელს არ უჩვენებია.

სამაგიეროდ, ტური არ გავა, ამა თუ იმ ფეხბურთელმა "დუბლი" არ შეასრულოს და ასე მოხდა ახლაც: გიორგი ქვილითაიამ და ნიკა საბანაძემ ("მერანი") მეტოქეთა კარში ორ-ორი გოლი გაიტანეს.

ჩემპიონატის საუკეთესო ბომბარდირზე, გიორგი ქვილითაიაზე ზემოთ უკვე ვისაუბრეთ და ამჯერად მხოლოდ იმას დავამატებთ, რომ თბილისის "დინამოს" ცენტრფორვარდმა ამ ჩემპიონატში უკვე მესამე დუბლი შეასრულა, მარტვილელთა გუნდის ახალწვეულმა ნიკა საბანაძემ კი - პირველი.

აღსანიშნავია, რომ 24 წლის საბანაძე მიმდინარე ჩემპიონატში პირველი ფეხბურთელი გახდა, ვინც შეძლო და ორი გუნდის მაისურით გაიტანა გოლ(ებ)ი: პირველ წრეში "საბურთალოს" შემადგენლობაში ორჯერ გამოიჩინა თავი, ახლა კი "მერანს" დაეხმარა წყვილი გოლით.

ისე კი, ყველაზე მეტი დუბლი ამ სეზონში ნიკა კაჭარავამ შეასრულა: პირველ წრეში, "ცხინვალის" მაისურით ოთხჯერ გაიტანა "წყვილი" გოლი.

არავის გაუკვირდეს, სულ მალე ჩვენს ჩემპიონატში ლეგიონერებზე...ლიმიტიც რომ დაწესდეს! ნამდვილად არაფერი გვაქვს საწინააღმდეგო ჩვენს ჩემპიონატში ისეთი უცხოელი ფეხბურთელების გამოჩენაზე, რომლებიც სათამაშო კლასით აქაურებს თუ ვერ სჯობნიან, არც არაფრით ჩამოუვარდებიან!

მოკლედ, იმის თქმა გვსურს, რომ, ძალიან ხშირ შემთხვევაში, აქ ჩამოსული უცხოელი ფეხბურთელების რაოდენობა აშკარა შეუსაბამობაშია ხოლმე ხარისხთან, ანუ მათ ოსტატობასთან.

თუმცა სასიამოვნო გამონაკლისებიც არაერთი გვახსოვს და მათ შორის, რაღა თქმა უნდა, მიკელ ალვარო უნდა ვახსენოთ: ბასკი ნახევარმცველი საქართველოს ჩემპიონატს ორწელიწადნახევრიანი პაუზის მერე დაუბრუნდა და კვლავაც თბილისის "დინამოს" მაისურა მოირგო.

ალვარო ამ ტურში შეცვლაზე შემოვიდა და ამ ჯერზე "დრო არ ეყო" თავის გამოსაჩენად; სამაგიეროდ, სხვა ლეგიონერებმა იყოჩაღეს და საქართველოს ჩემპიონატში სადებიუტო გოლები გაიტანეს: 23 წლის უკრაინელმა ევგენი კოვალენკომ ("ზუგდიდი"), 23 წლის ფრანგმა ბონგ პანებენგ-ფოდოუპ ჟუნიორმა და 19 წლის უკრაინელმა ვასილი შტანდერმა (ორივე - "გურია").

ზემოთ დასახელებული სამი ლეგიონერის მსგავსად, უმაღლეს ლიგაში სადებიუტო გოლი გაიტანა "მერანის" 19 წლის ახალწვეულმა ზაურ გოგუაძემ, თანაც, შეცვლაზე შემოსულმა.

ასევე შეცვლაზე შემოსულმა შეძლო გოლის გატანა "ცხინვალის" 24 წლის გარემარბმა ირაკლი ლექვთაძემ და "გურიის" მრავალრიცხოვან ლეგიონერთაგან ერთ-ერთმა, დონეცკის "შახტარის" დუბლშემადგენლობისა და უკრაინის 19-წლამდელთა ნაკრების ყოფილმა ნახევარმცველმა ვასილი შტანდერმა.

ყოველდღიური სპორტული გაზეთი "ლელო"