უჩა სოსიაშვილი: ბრაზილიელ ნახევარმცველს ველით, რომელიც იტალიაში თამაშობს

გორის "დილა" ახალ რეალობაში ცხოვრობს. ებრაელი ინვესტორების მოსვლის შემდეგ, ტრადიციული ქართული კლუბი ძველ პრობლემებში აღარ არის ჩაფლული. თუმცა გუნდის სატურნირო მდგომარეობა, რბილად რომ ვთქვათ, უკეთესის სურვილს ტოვებს.

საინტერესოა, რას აპირებს "დილა" ოქტომბრის ბოლოს, როცა სამი დღით გაიხსნება სატრანსფერო ფანჯარა. ამ და სხვა კითხვებით გუნდის მთავარ მწვრთნელს უჩა სოსიაშვილს მივმართეთ...

- მას შემდეგ, რაც კლუბში ახალი ინვესტორი მოვიდა, "დილასთვის" ახალი ცხოვრება დაიწყო, - გვითხრა სოსიაშვილმა საუბრის დასაწყისში, - აღარ არის ის დრო, როცა მოსაძიებელი იყო ფეხბურთელების ხელფასები და სხვა თანხები ელემენტარული არსებობისთვის. უკვე არის გრაფიკი და ეტაპობრივად ხდება დავალიანებების გასტუმრება.

მჯერა, "დილა" აუცილებლად შეინარჩუნებს ადგილს საქართველოს ჩემპიონატის უმაღლეს ლიგაში. ჩემპიონატის მსვლელობისას ვაწყდებოდით ყველასთვის ცნობილ პრობლემებს და ამ ეტაპზე სწორედ ლიგაში ადგილის შენარჩუნება იქნება "დილას" მთავარი მიზანი.

- როგორ მიდის გუნდში ლეგიონერების ადაპტაციის პროცესი?
- ისინი თანდათან ეგუებიან გუნდს. უნდა გითხრათ, რომ მათი თამაშითა და საქმისადმი მიდგომით კმაყოფილი ვარ. არ უნდა დავივიწყოთ, რომ ეს ფეხბურთელები დავიმატეთ მაშინ, როცა ყველა ქვეყანაში დაწყებული იყო ჩემპიონატი, ყველა გუნდი დაკომპლექტებული იყო.

- მალე სატრანსფერო ფანჯარა გაიხსნება. ახალი ფეხბურთელების დამატებას ხომ არ აპირებთ?
- მიდის მუშაობა ბრაზილიელი ცენტრალური ნახევარმცველის დამატებაზე. თუ მოხერხდა ამ ტრანსფერის განხორციელება, ძალიან კარგი იქნება.

- ბრაზილიელის ვინაობას და კლუბს ვერ დაასახელებთ?
- ახლა მხოლოდ იმას გეტყვით, რომ ეს ფეხბურთელი იტალიაში თამაშობს. როცა უფრო რეალური იქნება ყველაფერი, მერე დაწვრილებით ვისაუბროთ ამ თემაზე.

- ცხადია, "დილა" მომავალ სეზონში უფრო მაღალ მიზნებს დაისახავს...
- რა თქმა უნდა, ასე იქნება. მომავალ სეზონში "დილას" მიზანი ევროტურნირების საგზურის მოპოვება და იქ წარმატებით თამაში იქნება.

(იბეჭდება მცირე ცვლილებით)
ყოველდღიური სპორტული გაზეთი "ლელო"