ლევან გეგეჭკორი გულშემატკივარმა ჯერ კიდევ პატარა ასაკიდან გაიცნო. მარტვილის "მერანში" გაზრდილმა უნივერსალმა, რომელსაც მცველადაც შეუძლია თამაში და ნახევარმცველადაც, საქართველოს ყველა ასაკობრივი ნაკრების მაისურა მოირგო, 2013 წელს კი, გია ცეცაძის ხელმძღვანელობით, 19-წლამდელთა ევროპის ჩემპიონატზეც ითამაშა. ახლახან დასრულებულ ციკლშიც, ალექსანდრე ჩივაძე და გია გეგუჩაძე სისტემატურად იწვევდნენ ახალგაზრდული ნაკრებში."მერანის" შემდეგ გეგეჭკორი ქობულეთის "შუქურაში" თამაშობდა, წლეულს კი ბათუმის "დინამოს" მაისურა მოირგო. მან ჩინებულად ითამაშა ბოლო უქმეებზე - "ზუგდიდთან" (5:0) დუბლი შეასრულა და გუნდის წარმატებაში თავისი სოლიდური წვლილი შეიტანა.
"ლელომ" 22 წლის ლევან გეგეჭკორთან
- ბათუმის "დინამოს" იოლად შეეწყვეთ და ძირითად შემადგენლობაშიც დაიმკვიდრეთ ადგილი...
- ადაპტაცია არ გამჭირვებია და გუნდს მალე შევეგუე, რადგან ბევრთან ნათამაშებიც მქონდა, პაპუნა ფონიავასთან ერთად კი მარტვილის "მერანში" ვიზრდებოდი და ბავშვობიდან ვმეგობრობ.
- ბოლო ტურის შეხვედრა "ზუგდიდთან" გუნდმაც ძალიან კარგად ჩაატარა და პირადად თქვენც...
- თავმდაბლობა არ მალაპარაკებს - "ზუგდიდთან" მხოლოდ საკუთარ თავს ვერ გამოვყოფ და დუბლი რომ შევასრულე, ეს მთლიანად გუნდის დამსახურება იყო. მარტო თავს ვერავინ გამოიჩენს, გუნდი ხელს თუ არ შეუწყობს. ბათუმის "დინამომ" გამართულად ითამაშა და გამარჯვება დამსახურებულად მოიპოვა.
- საერთოდ, ბოლო წლებში სულ ყურადღების ცენტრში ხართ და საინტერესოა, ბათუმის "დინამოს" გარდა, სხვა გუნდები არ გიწვევდნენ?
- სხვა ვარიანტებიც მქონდა. მაგრამ მიზეზთა გამო, დეკემბრამდე ბათუმის "დინამოში" თამაში ვამჯობინე და ვეცდები, გუნდს წარმატების მიღწევაში დავეხმარო. ძალიან კარგი გუნდია და აქ გადმოსვლას სულაც არ ვნანობ.
- ბათუმის "დინამო" წლეულს არასტაბილურად თამაშობს. კარგ მატჩებს ჩავარდნები მოსდევს ხოლმე. ეს რას უნდა მივაწეროთ?
- სამწუხაროდ, ჩავარდნები გვქონდა და პრობლემებიც იყო. ასეთი რამ ყველა გუნდს შეიძლება მოუვიდეს, მაგრამ რა იყო ამის მიზეზი, არ ვიცი, ამაზე ლაპარაკი მიჭირს. ყველაფრის მიუხედავად, გუნდში მეგობრული ვითარებაა და დარჩენილ თამაშებში ქულათა მაქსიმუმის აღებას შევეცდებით.
- იანვარში სანკტ-პეტერბურგის "ზენიტში" გასინჯვაზე იყავით, მაგრამ უკან გამობრუნდით. უცხოელთაგან ინტერესი ამით ამოიწურა?
- წინადადებები იყო და ახლაც არის, მაგრამ წინასწარ ამაზე ლაპარაკი არ მინდა. სეზონი მორჩება და აუცილებლად გაიგებთ, ბათუმის "დინამოში" დავრჩები თუ სხვაგან ვითამაშებ...
- ყველა ასაკობრივ ნაკრებში გითამაშიათ და, ალბათ, ეროვნულ ნაკრებში მოხვედრის ამბიციაც გაქვთ...
- ამბიციის რა გითხრათ და, სურვილი ნამდვილად მაქვს.
- თქვენი აზრით, ბათუმის "დინამოში" თამაშით, ეროვნული ჩემპიონატის დონისა და ჩვენი პირობების გათვალისწინებით, რეალურად მიგაჩნიათ ნაკრების მოთხოვნები რომ დააკმაყოფილოთ?
- ეს ის კითხვაა, რომელსაც ყველაზე მეტად ველოდი. ყველა ასაკობრივ ნაკრებში მითამაშია და განმიცდია ის სიამოვნება და პასუხისმგებლობა, როცა შენი ქვეყნის სახელით გამოდიხარ.
ეროვნულ ნაკრებში მოხვედრა ყველა ფეხბურთელის ოცნებაა და იმედია, ადრე თუ გვიან ამის შანსი მომეცემა. ესაა ჩემთვის ყველაზე მთავარი მიზანი, თუმცა ძნელი სათქმელია, რეალურია თუ არა. დრო გვიჩვენებს, რა გამოვა ჩემი შრომიდან.
(იბეჭდება მცირე ცვლილებით)
ყოველდღიური სპორტული გაზეთი "ლელო"
