[ექსკლუზივი] ბაჩანა არაბულის სიხარული, ტკივილი და დაბრუნებული რწმენა

...ის ჯერ კიდევ 16 წლის იყო, გულშემატკივარმა რომ გაიცნო და "ქართული ფეხბურთის მომავლად" შერაცხა: 2010 წელს, თბილისში გამართული შესარჩევი ციკლის შეხვედრებში, ნიჭიერი შემტევი კობა ჟორჟიკაშვილის 17-წლამდელთა ნაკრებში თამაშობდა. გუნდი ელიტრაუნდში გავიდა, ბაჩანა კი ლიდერი იყო - პეტრ ზელინსკის პოლონეთსაც გაუტანა და რაჰიმ სტერლინგის ინგლისსაც...

ვერ იტანს ბურთის უაზრო გადაგდება-გადმოგდებას, რასაც ბევრი ქართული გუნდი მისდევს და დაცვიდან შიშით თამაშობს...

...მერე 19-წლამდელთა ნაკრებში გია ცეცაძის ხელმძღვანელობით გამოჩნდა და ევროპის ჩემპიონატზე ითამაშა. ამის შემდეგ ქართველი თავდამსხმელით ინგლისის პრემიერლიგის "მანჩესტერ სიტი" და კიევის "დინამო" დაინტერესდნენ. ინგლისში სინჯებზეც იყო, მაგრამ საბოლოოდ სეგუნდა დივიზიონის ბინადარ "ალკორკორნში" ჩაირიცხა. იურიდიული პრობლემების გამო ვერ თამაშობდა, შემდეგ კი დაშავდა და საქართველოში დაბრუნდა...



მას შემდეგ მთელი სამი წელი ბაჩანა არაბული თითქმის არ ჩანდა. ბევრმა, ვისაც მასზე წარმოდგენა არ ჰქონდა, ჩათვალა, რომ მოზარდობის პერიოდის წარმატება თავში აუვარდა და შრომა ეზარებოდა. არადა, არაბული საკუთარ თავს, კლუბებსა და მწვრთნელს ეძებდა გორის "დილაშიც", "ცხინვალშიც", თბილისის "დინამოშიც" და მხოლოდ "სამტრედიაში" მიაგნო. აქ გამოჩნდა კიდეც, რომ არც შრომა დაზარებია და არც "ვარსკვლავური ავადმყოფობა" დამართნია.

თუ ვინმეზე ვიტყვით, რომ იმერული გუნდის წარმატება განაპირობა, ერთ-ერთი მათგანი, უდავოდ, არაბულია. "სამტრედიის" თამაში 22 წლის ტექნიკურ, აზრიან და არაორდინარულ შემტევზე იყო აწყობილი: ის, ბუდუ ზივზივაძე, დავით ჯიქია და დავით რაჟამაშვილი სწრაფი და ტექნიკური თამაშით მეტოქის მცველებს ნამდვილ ჯოჯოხეთს უწყობდნენ. პირადად არაბულმა 13 შეხვედრაში 7 გოლი გაიტანა და 6 საგოლე გადაცემა გააკეთა.

სეზონის ერთ-ერთ გმირს "ლელომ" ინტერვიუ ჩამოართვა, რადგან მისი ტრანსფერი თბილისის "დინამოს" ეკუთვნის და, შესაძლოა, მალე დიღმის ბაზას დაუბრუნდეს. არაბული ემოციებითა და წარსულზე გულისტკივილით ლაპარაკობს...

- "სამტრედია" ჩემპიონი გახდა, თქვენ კი საუკეთესო სეზონი ჩაატარეთ. საქმე მოსალოცად გაქვთ...
- ეს ჩემთვის საუკეთესო სეზონი იყო. საერთოდ, უმაღლეს ლიგაში პირველად ვითამაშე, რასაც თამაში ჰქვია. აქამდე შეცვლებზე შევდიოდი და მეორეხარისხოვან როლში ყოფნა მიწევდა. ასე მე კი არა, ვერავინ გაიხსნებოდა. სეზონი დასრულდა და ისეთი შინაგანი განცდა მაქვს, რომ ფეხბურთს ხელახლა დავუბრუნდი. გარდამავალი ჩემპიონატის შემდეგ თავადაც დავინახე და სპეციალისტებმაც, რაღაც შემიძლია თუ არა. "სამტრედიაში" თამაშმა საკუთარი თავის რწმენა დამიბრუნა. ეს ჩემპიონობაზე არანაკლებ მახარებს.

- შეგიძლიათ, თქვათ, რომ აქეთ-იქით წარუმატებელი სიარულის შემდეგ საკუთარი გუნდი იპოვეთ?
- რომ იცოდეთ, "სამტრედიაში" სწორედ ამიტომაც გადავედი. ყველამ იცის, გია ცეცაძესთან რა ურთიერთობაც მაქვს. მან ჩემს გაზრდაში დიდი როლი ითამაშა - 13 წლის ვიყავი, მასთან "ოლიმპში" რომ გადავედი, შემდეგ კი "საბურთალოში" გავყევი. ტრავმის დროსაც გვერდში დამიდგა და ამ წარმატებასაც მას ვუმადლი. იცით, გვერდში თუ დაგიყენა, არ გიღალატებს და შენ დასახმარებლად ყველაფერს გააკეთებს. მე ვიცოდი, სად და ვისთან მივდიოდი - გიას ისეთი ფეხბურთი უყვარს, რომელიც ჩემზეა მორგებული და მეც ძალიან მიყვარს. ვერ იტანს ბურთის უაზრო გადაგდება-გადმოგდებას, რასაც ბევრი ქართული გუნდი მისდევს და დაცვიდან შიშით თამაშობს. მეც შემტევი და სანახაობრივი თამაში მიზიდავს.

- მაგრამ ასეთი ფეხბურთის თამაში ძნელი და, გარკვეულწილად, სარისკოც არის...
- მაგრამ ამ რისკმა გაამართლა, რაც ფინალში აშკარა იყო. ანუ ცეცაძე მართალი ყოფილა. ფეხბურთში რისკი ფასდება.

- ფინალზე რას იტყვით?
- მე მგონია, რომ ჩვენი ფეხბურთის უპირატესობა განსაკუთრებით ფინალში გამოჩნდა. ორივე შეხვედრაში მეტოქეზე უკეთ ვითამაშეთ. არადა, "ჩიხურა" ძალიან ძლიერი გუნდია და ეს თავის ჯგუფშიც დაამტკიცა, სადაც თბილისის "დინამო", ქუთაისის "ტორპედო" და "ლოკომოტივი" ჩამოიტოვა. ჩვენ სხვა ფეხბურთის თამაში არ გვიყვარს. ეს მხოლოდ ევროპის ლიგაზე "გაბალასთან" არ გამოგვივიდა. ვეცადეთ, მაგრამ ძლიერი და გამოცდილი მოთამაშეები ჰყავდათ და შეცდომები არ გვაპატიეს.

- სამტრედიაში რომ გეთამაშათ, ეს რამეს შეცვლიდა?
- "გაბალა" მაშინ ნაღდად გვჯობდა, მაგრამ სამტრედიაში ნებისმიერ მეტოქეს მოვუგებთ - გუნდიც კარგია და გულშემატკივრის თანადგომაც ძალას გვმატებს. სხვათა შორის, ეს დიდი პლუსი იყო, ჩვენ სამტრედიაში რომ ვითამაშეთ, "ჩიხურამ" კი თავის სტადიონზე ვერ გვიმასპინძლა. პირველი შეხვედრა ჩანაწერში ვნახე და პირველ ტაიმში ნაჩვენები ჩვენი ფეხბურთი ძალიან მომეწონა. მიმაჩნია, რომ ასეთი გამართული ფეხბურთი არასოდეს გვითამაშია.

იცით, რა მგონია? შუქი აანთე, მეორე მხარეს ტრიბუნები დაუმატე და ტელემაყურებელი ევროპულ თამაშს ნახავდა, დაახლოებით ისეთს, ჰოლანდია-ბელგიაში რომ უყურებენ. მაგრამ თამაშების კარგად შეფუთვა ნამდვილად გვაკლია.

- თქვენი ტრანსფერი თბილისის "დინამოს" ეკუთვნის და დიდი ალბათობით, გუნდს დაუბრუნდებით...
- ალბათ, ასე იქნება, რადგან "დინამოსთან" კონტრაქტი ზაფხულამდე მაკავშირებს. თუმცა, ჯერ არავინ დამკავშირებია და არ ვიცი, რა მოხდება...

- ფინალებში გამოჩნდა, რომ თქვენ და ბუდუ ზივზივაძე ერთმანეთს თვალდახუჭულები უგებთ...
- მის გვერდით თამაში სიამოვნებაა, იცი, რომ აუცილებლად გაგიგებს და ჩემს ჩანაფიქრსაც მიხვდება.

- მაგრამ ახალი სეზონიდან ერთად აღარ იქნებით, მსგავსი პარტნიორი კი საქართველოში სანატრელია...
- ეს მართლაც სამწუხარო ამბავია, მაგრამ ჯერ ახალგაზრდები ვართ და იმედია, გვერდიგვერდ კიდევ ვითამაშებთ.

- ...თუნდაც ეროვნულ ნაკრებში? წლევანდელი სეზონი ამის საფუძვლიან ამბიციას გაგიჩენდათ...
- მეც ამის იმედი მაქვს.

- თქვენი წასვლა "სამტრედიას" საგრძნობლად დაასუსტებს...
- მთავარია, გუნდში ცეცაძე დარჩეს და ის ჩვენს შემცვლელებსაც აუცილებლად მოძებნის და უფრო ძლიერ გუნდსაც ჩამოაყალიბებს.



- თქვენნაირ შეთამაშებულ წყვილს სად მოძებნის?
- გია ისეთი მწვრთნელია, რაღაცას მოიფიქრებს. ბუდუს ინტერვიუს ვკითხულობდი და მართალი თქვა. ჟურნალისტმა ჰკითხა - ამდენი თუ შეგეძლო, აქამდე რატომ არ ჩანდიო? ბიჭს არ ენდობოდნენ, მის ნაცვლად მესამეხარისხოვანი უცხოელები ჩამოჰყავდათ და თავი სად უნდა გამოეჩინა, უბანში?! ეს ჩვენი ფეხბურთის დიდი პრობლემაა.

გაიხსენეთ, სეზონის დასაწყისში "სამტრედიაში" ცეცაძემ რა ფეხბურთელები აიყვანა: მეც, ბუდუც და ჩვენი 15 მოთამაშიდან 10 - სხვა გუნდებმა დაგვიწუნეს. ყველა დაინტერესდეს, თითოეული ჩვენგანი რატომ გაიხსნა "სამტრედიაში" და არა რომელიმე სხვა გუნდში?

- საქართველოში ნიჭიერ მოთამაშეებს ვერ ამჩნევენ?
- არ ვიცი. შესაძლოა, მწვრთნელებს ნიჭიერი ქართველები არ აინტერესებთ. გია გვიცნობდა, გვენდობოდა და ჩვენი შესაძლებლობების გამოვლენა სურდა.

- სხვაგან ეს არ სურდათ?
- ფაქტია, რომ ჩვენი გუნდების ლიდერების უმრავლესობას თავის გამოჩენის შანსი ისეთ გუნდებში არ მიეცათ, ახლა უკან რომ მიჩანჩალებდნენ. ბევრჯერ მიფიქრია, რომ ქართული ფეხბურთი ამ ტალახში იმიტომაც არის, რომ ასეთი მიდგომა ბევრ გუნდშია. ფულს უაზროდ ყრიან, წინ კი ვერ მივდივართ.

რაღაც რომ უნდა შეიცვალოს, ეს საკამათო არ არის. ამ ფედერაციაში პატიოსანი ხალხია და მათი იმედი მაქვს. გია კი ფეხბურთში სიხარულს ეძებს და არა - ფინანსურ მოგებას. მისი წარმატებული მუშაობის ერთ-ერთი საიდუმლო ესეც არის.

- ევროპალიგის შემდეგ "სამტრედია" საგრძნობლად გაიზარდა, მაგრამ ევროპულ დონემდე ჩვენს გუნდებს კიდევ ბევრი აკლიათ. თქვენი აზრით, ფინალში ნაჩვენები ტემპით გუნდი ევროპაში უკეთ ითამაშებს?
- იცით, რომ გიას არც ერთი ვარჯიში მეორეს არ ჰგავს? ის სულ ფიქრობს, თავად როგორ განვითარდეს და გუნდიც რა გზით გაზარდოს, ამ ვითარებაში როგორ დავეწიოთ ევროპელებს და მათ საწინააღმდეგოდ რა სქემები გამოვიყენოთ. დარწმუნებული ვარ, ახლაც თავის ოთახში ზის, სქემებს ხაზავს და მომავალ სეზონსა და თამაშებზე ფიქრში ღამეებს ათენებს. სიახლეების მოყვარულია და სულ რაღაცას იგონებს. რამდენ მწვრთნელთან მიმუშავია, მაგრამ საკუთარ თავზე ასე რომ მუშაობდეს, სულ სწავლობდეს და წინსვლაზე ფიქრობდეს, ჯერ მსგავსი არ მახსენდება.

- ფაქტია, სადაც უმუშავია, შედეგი ყველგან ჰქონდა...
- ეს მეც კარგად მახსოვს. გორის "დილა" პირველი ლიგიდან უმაღლესში გადაიყვანა და ისეთი ფეხბურთელებით აათამაშა, სხვები ზედ რომ არ უყურებდნენ. "დილა" მაშინდელ ლიდერებს - თბილისის "დინამოსა" და "ზესტაფონს" სისხლს უშრობდა. დანიშნეს 19-წლამდელთა ნაკრებში და ბევრი ამბობდა, რომ სუსტი თაობა ვიყავით და ჩვენგან არაფერი გამოვიდოდა, მაგრამ ბელგიაში გამართულ ელიტრაუნდში, მასპინძლების გარდა, ინგლისი და შოტლანდია ჩავტოვეთ და ევროპის ჩემპიონატზე გავედით. "სამტრედია" ჩაიბარა და ჩემპიონები გავხდით. ქართველმა მწვრთნელმა მეტი რა უნდა გააკეთოს, რომ დაფასდეს?

დიდი ალბათობით, ახლა მე და გია ერთად აღარ ვიმუშავებთ და ასე ამიტომაც ვლაპარაკობ. ისეთი ადამიანი და მწვრთნელია, მიმაჩნია, რომ მსგავსი ხალხი უნდა დააწინაურონ და მერე თქვან, ქართულ ფეხბურთს რა პოტენციალი გააჩნია.



(იბეჭდება მცირე ცვლილებით)
ყოველდღიური სპორტული გაზეთი "ლელო"