- 7 ივნისს საქართველოს ნაკრები სენტ კიტსსა და ნევისს ეთამაშება, წავიდეთ? - განგებ ვკითხე მეზობელს, რომელიც ფეხბურთის დიდი გულშემატკივარია, თუმცა "ამერის" დაშლის შემდეგ სტადიონზე აღარ მინახავს. რეაქცია მაინტერესებდა.- ვის ვეთამაშებით?
- სენტ კიტსსა და ნევისს.
- ერთ გუნდს როცა ვხვდებით, ხომ ვიგებთ, ახლა ორს უნდა ვაჯობოთ?
- მოვიგებთ!
- ვინ არიან, საიდან მოდიან ეგ კიდსი და... რაო, ვისიო?
- "ეგ კიდსი და ვისი" კი არა, სენტ კიტსი და ნევისი. კარიბის ზღვაში პატარა კუნძულებია...
- ჯეკ ბეღურა და რამე?
-
- როგორი ნაკრები ჰყავთ?
- ვერაფერს გეტყვი, მათი თამაში არასოდეს მინახავს. სენტ კიტსსა და ნევისზე მხოლოდ ორი რამ ვიცი: დროშა რა ფერებშია...
- რა ფერებშია?
- 7 ივნისს რომ ჩამოკიდებენ, ნახავ.
- მეორე?
- კიდევ ის ვიცი, რომ სენტკიტსელები წინადადების ბოლო სიტყვას აორმაგებენ. სადღაც მაქვს ამოკითხული.
- ვერ გავიგე. ასე? - აბა, ბიჭებო, წავედით საქართველოში, მოვიგოთ, მოვიგოთ!
- კარგად გაგიგია. სწორედ ასე ლაპარაკობენ.
- საინტერესო ხალხი ყოფილა, ყოფილა. შენ ინგლისური იცი, დაგუგლე ერთი, რა ნაკრები ჰყავს, იქნებ მართლა წამოვიდე, წამოვიდე.
* * *
ჩემი მეზობლის ხათრით კი ღირს ინტერნეტში "შეძრომა". "ვიკიპედია" გვეუბნება, რომ ქარელის მუნიციპელიტეტი გაცილებით დიდია ჩვენს მომავალ სტუმარზე:ქარელი - 1092.1 კვ.კმ.
სენტ კიტსი და ნევისი - 261 კმ.კვ.
კუნძულოვანი ქვეყანა არც მოსახლეობის სიმჭიდროვით გამოირჩევა. 49.9 ათასი ადამიანი ცხოვრობს. კარიბის ზღვის აუზის ქვეყნებს შორის ყველაზე მაღალია კრიმინალის მაჩვენებელი. მხოლოდ მძარცველების გამო არა, უკეთესი ცხოვრების საძიებლად სენტკიტსელები მსოფლიოს სხვადასხვა ქვეყნებს არიან მოდებულნი.
თუმცა ზოგიერთი შესაძლოა სულაც არ იყოს ნამყოფი თავის სამშობლოში. მაგალითად: რუსული სოცქსელის, "ვკონტაქტეს" დამაარსებელი პაველ დუროვი სენტ კიტსი და ნევისის მოქალაქეა. მან იქაური, ლამაზი თევზებით გაფორმებული პასპორტი 250-ათასდოლარიანი ინვესტიციის საფასურად მიიღო. კიტსელთა მთავრობას აქვს ასეთი პროექტი: "მოქალაქეობა ინვესტიციის სანაცვლოდ". ოღონდ მინიმუმ 250 ათასი დოლარი უნდა ჩადოთ.
შეგიძლიათ მოქალაქეობა სხვა გზითაც მიიღოთ: 400-ათასდოლარიან კერძო ქონებას თუ შეიძენთ. ოთხი წლის შემდეგ გაყიდვა რომ მოისურვოთ, პასპორტს აღარავინ წაგართმევთ... სენტ კიტსისა და ნევისის პასპორტით კი თავისუფლად შეხვალთ შენგენის ქვეყნებში, ამერიკაში, დიდ ბრიტანეთში, კანადაში...
ცისფერი მთებისა არ იყოს, რად უნდა ერთ ქვეყანას ორი "სათაური"? თურმე, უნდა! - სენტ კიტსი (სენტ კრისტოფერი) ერთი კუნძულია, ნევისი - მეორე. მოსახლეობა ტკბილად თანაცხოვრობს. მაგრამ, როდესაც საქმე სპორტს ეხება, იქ ნაციონალიზმიც იღვიძებს: ნევისელს ურჩევნია უცხოტომელთან დამარცხდეს, ვიდრე სენტკიტსელთან. ...და პირიქით - სენტკიტსელს - ნევისელთან. საფეხბურთო ნაკრებში მოხვედრა დიდი პატივია.
თუ ნევისელი თვლის, რომ ეროვნულ გუნდში თამაშს იმსახურებს და მწვრთნელმა განაცხადში არ შეიყვანა, მთელს კარიბეთს შეძრავს. 50-ათასიან ქვეყანაში არც ნაცნობი პოლიტიკოსის მოძებნა გაუჭირდება ("სახურავად"), იქ ხომ პარტიები თავზე საყრელია. თან როგორი დასახელებები აქვთ: ლეიბორისტული პარტია, შეწუხებული მოქალაქეების მოძრაობა, ნევისელი რეფორმატორები, მოძრაობა სახალხო მოქმედება, გაერთიანებული ნაციონალური მოძრაობა (ნევისზე)...
ასე რომ, საქართველო-სენტ კიტსი და ნევისის მატჩის შემდეგ, პრესკონფერენციაზე, მეტოქე გუნდის მწვრთნელის მისამართით ერთ დამატებითი შეკითხვა გამოიკვეთა: ძირითადის 11 ფეხბურთელიდან რამდენია ნევისელი?
ამ ქვეყნის საფეხბურთო ასოციაცია ფიფა-ში 1992 წელს გაწევრდა და სულაც არ ჰყავს ხელწამოსაკრავი ნაკრები. 2016 წელს ზედიზედ 5 მატჩი მოიგო: ბერმუდასთან, არუბასთან, სურინამთან და ანტიგუა და ბარბუდასთან. ბოლოს 2016 წლის 19 ნოემბერს ამხანაგურად ესტონეთთან ითამაშა და ფრეს მიაღწია - 1:1.
4 ივნისს ჩვენი მომავალი მეტოქე სომხეთს დაუპირისპირდება, სამი დღის შემდეგ კი ჩვენ გამოვცდით.
ბოლოს, კიდევ ერთი საინტერესო შტრიხი: კიტსელ-ნევისელები ლაპარაკისას ასობგერა ვ-ს ყლაპავენ. სულაც არ გაუკვირდებათ, თუ აფიშაზე წაიკითხავენ: 7 ინისი, საქართელო-სენტ კიტსი და ნეისი.
ჩვენი კორექტორი კი, პუბლიკაციის ავტორის სახელ-გვარს ვ-ს გარეშე რომ ნახავს, აუცილებლად მკითხავს - აჟა როდიდან გახდიო.
აჟა სიმონიშილი
ყოველდღიური სპორტული გაზეთი "ლელო"
