5 სექტემბერს, ზუსტად იმ დროს, როცა საქართველოს ნაკრები "ბასაზე" ვარჯიშობდა, საფრანგეთის ეროვნული გუნდის მთავარმა მწვრთნელმა დიდიე დეშამმა "დინამო არენაზე" პრესკონფერენცია გამართა...ლორისის მატჩამდელი ტაიმი
ყველაფერი ცოტა უჩვეულოდ დაიწყო. დიდიე დეშამს პრესკონფერენციაზე უგო ლორისი ახლდა.
ეს ჩვეულებრივი ამბავი იქნებოდა, რომ არა ერთი გარემოება - ფრანგების მეკარემ, რომელიც ორი კვირის წინაც იყო თბილისში ("დინამო"-"ტოტენჰემის" მატჩში ლონდონელთა კარს იცავდა), ლამის ცალკე პრესკონფერენცია მოაწყო:
- გასვლითი შეხვედრა იოლი არასოდეს არის და არც საქართველოს ნაკრებთან მატჩი იქნება გამონაკლისი. თუმცა ჩვენ გვაქვს რესურსი და შესაძლებლობა, რომ
- პარიზული შეხვედრიდან რომელ ქართველ ფეხბურთელს გამოარჩევდით?- კონკრეტულად არ შემიძლია დავასახელო, მაგრამ საქართველოს ნაკრები სახიფათო მომენტებს ხშირად გვიქმნიდა, საინტერესო გუნდია და საშინაო შეხვედრაში, ალბათ, უფრო აქტიურიც იქნება.
- პარიზში საქართველოსგან გოლი მოულოდნელი იყო?
- ფეხბურთში გამორიცხული არაფერია, მაგრამ ვეცდებით, ხვალ კარი "მშრალად" შევინახოთ.
- რა შედეგს ელით საქართველოსა და ბელორუსთან მატჩებისგან?
- ჩვენი მიზანი მაქსიმუმია - 6 ქულის აღება გვინდა. კარგად მოვემზადეთ და მჯერა, ამ ამოცანის გადაჭრა შეგვიძლია.
- ესპანეთთან შედარებით, ალბათ, უფრო იოლ თამაშს ელით...
- ასე არ ვიტყოდი. მართალია, საქართველო ესპანეთზე სუსტია, მაგრამ დღეს ეს არაფერს ნიშნავს.
- გუნდში რიბერის ყოფნა რამდენად გიწყობთ ხელს, რომ კიდევ უფრო გაძლიერდეთ?
- ჩვენს გუნდში ყველა ძლიერი ფეხბურთელია და არ მსურს, რომელიმე ცალკე გამოვყო.
- საქართველოსთან პარიზულ შეხვედრაში დაშვებული შეცდომები თუ გააანალიზეთ?
- დიახ, რადგან მაშინ საკმაოდ ბევრი შეცდომა დავუშვით. ანალიზის შედეგად გაკეთებული დასკვნები პარასკევის შეხვედრაში უნდა დაგვეხმაროს.
- ქართველებთან შემტევ ფეხბურთს ითამაშებთ?
- რა თქმა უნდა. საერთოდ, ამ მატჩის შედეგს ჩვენთვის დიდი მნიშვნელობა ექნება.
- საფრანგეთის ნაკრებში ბოლოდროინდელ ცვლილებებს როგორ შეაფასებდით?
- საერთოდ, სტაბილურობა გუნდისთვის კარგია, მაგრამ გარკვეული ცვლილებებიც ბუნებრივია. იმედია, ჩვენს შემთხვევაში ეს დადებით შედეგს გამოიღებს.
- რადგან გარანტირებული გაქვთ ჯგუფში მეორე ადგილი, ეს ხომ არ მოგადუნებთ?
- არავითარ შემთხვევაში! ჩვენ მაქსიმალური შედეგისთვის ვიბრძოლებთ.
* * *
ლორისის წასვლის შემდეგ დეშამი ქართული მედიის პირისპირ მარტო დარჩა. პირველი კითხვა ასეთი იყო:
- თქვენმა გუნდმა ბოლოს საქართველოსთან მოიგო. მას მერე ოთხ შეხვედრაში წარმატებას ვერ მიაღწიეთ. თავდასხმას უჭირს. 12 მატჩია, ბენზემას ვერ გააქვს. რატომ არ იწვევთ "მონაკოს" თავდამსხმელ ემანუილ რივიერს, რომელმაც სეზონი ჩინებულად დაიწყო?- თქვენ ფრანგი ხომ არ ხართ?! რივიერი ჩვენთან ძალიან უყვართ. მე არჩევანი უკვე გავაკეთე, მაგრამ ის მშვენიერი თავდამსხმელია და აქვს შანსი, რომ უახლოეს პერიოდში ნაკრებში გამოვიძახოთ.
- პარიზული მატჩის შემდეგ საქართველოზე რა შთაბეჭდილება დაგრჩათ, ან რომელიმე ფეხბურთელი ხომ არ დაგამახსოვრდათ?
- რა თქმა უნდა, საქართველო ესპანეთის მსგავსად ძლიერი გუნდი არ არის, მაგრამ სიურპრიზების შემოთავაზება შეუძლია. კარგი შთაბეჭდილება დატოვეს ოქრიაშვილმა, თარგამაძემ და ტექნიკურმა ანანიძემ.
- საქართველოსთვის ყაზახეთთან წაგება კატასტროფა იყო. რომ მოხდეს საოცრება და საქართველოსთან დამარცხდეთ, ეს თქვენთვის რა იქნება?
- ყაზახეთთან საქართველოს ნაკრების მატჩი ვნახე და, რა თქმა უნდა, თქვენი გუნდი კარგად არ გამოიყურებოდა, მაგრამ დარწმუნებული ვარ, პარასკევს სულ სხვაგვარად ითამაშებს და საჩუქრებს არ გაგვიკეთებს.
მიუხედავად ამისა, მაინც 3 ქულის აღებას ვგეგმავთ, რადგან ეს მატჩი საფრანგეთის ნაკრებისთვის ძალიან მნიშვნელოვანია.
- წარმატებულ თამაშს ადრეც ჰპირდებოდით საფრანგეთის ნაკრების ქომაგებს, მაგრამ თქვენი გუნდი ვერ იგებს...
- შესაძლოა, შეფასებებში უზუსტობები დავუშვი და ვერც გუნდი აჩვენებს საუკეთესო ფეხბურთს, თუმცა მდგომარეობის გამოსწორების სურვილი ნამდვილად არის.
- ხომ არ მიგაჩნიათ, რომ წარუმატებელი მატჩების შემდეგ ნდობა დაკარგეთ?
- ცუდია, თუ მართლაც ასეა, მაგრამ წინა მატჩებში პოზიტიური მომენტებიც იყო.
- ბენზემას ამჟამინდელ მდგომარეობაზე რას იტყვით?
- უკეთესად თამაში ყველას შეუძლია და ამას ვცდილობთ. თუმცა ვერ ვიტყვი, რომ ბენზემა ვინმეზე ნაკლებს მუშაობს.
- ბელგიასთან ნათამაშებ შემადგენლობაში ცვლილებებს ხომ არ გეგმავთ?
- ამაზე პასუხს საქართველოსთან მატჩის წინ მიიღებთ.
- გუნდში ფავორიტები არ გყავთ?
- ჩემ მიერ გამოძახებულმა ფეხბურთელებმა კლუბებში დაამტკიცეს, რომ ნდობას იმსახურებენ.
* * *
აქვე ვიტყვით, რომ მატჩის გამო 6 სექტემბერს თბილისის მეტროპოლიტენი ღამის 01:30 საათამდე იმუშავებს. თავად შეხვედრა კი "დინამო არენაზე" 22:15 საათზე დაიწყება.
ყოველდღიური სპორტული გაზეთი "ლელო"
ასევე იხილეთ:
თემურ ქეცბაია: ჩვენ ახლა ლანძღვა-გინება კი არა, თანადგომა გვჭირდება
