როდის ეყოლება საქართველოს ნაკრებს ახალი მთავარი მწვრთნელი? ეს კითხვა ახლა ყველაზე მეტად აღელვებს ქართველ გულშემატკივარს. თემურ ქეცბაიას გადადგომის შემდეგ ეროვნული გუნდის დამრიგებლის პოსტი ვაკანტურია...ქართული ფეხბურთისთვის ამ უმძიმეს ჟამს გადაწყვეტილება საქართველოს ფეხბურთის ფედერაციამ უნდა მიიღოს. ამ გადაწყვეტილებაზე ძალიან ბევრი რამ იქნება დამოკიდებული. ბუნებრივია, დაგვაინტერესა ფედერაციის პოზიციამ.
ამ დროისთვის, ჟენევაში, უეფას კომიტეტის სხდომაზე იმყოფებიან საქართველოს ფეხბურთის ფედერაციის პრეზიდენტი ზვიად სიჭინავა და გენერალური მდივანი რევაზ არველაძე. სამაგიეროდ, თბილისშია ფედერაციის სპორტული დირექტორი არჩილ არველაძე, ვის კომპეტენციაში შედის კიდეც სანაკრებო საკითხები...
"მომავალი წლის 29
სწორედ იქამდე უნდა შეირჩეს ახალი მწვრთნელი საქართველოს ნაკრებისთვის. ალბათ, ოპტიმალური იქნება, მწვრთნელი ახალი წლიდან დაინიშნოს", - გვითხრა არჩილ არველაძემ.
იქმნება შთაბეჭდილება, რომ ეროვნული გუნდის გაწვრთნას დღეს ყველა ერიდება. ერთი შეხედვით, საქართველოს ნაკრების დამრიგებლობაზე დათანხმება ახალი მწვრთნელის მხრიდან პროფესიულ ჰარაკირს ჰგავს. თუმცა არველაძე მთლად ასე არ ფიქრობს:
"თემურ ქეცბაიას ბოლო მატჩმა ძალიან დამწყვიტა გული. ეს არ იყო თამაში, რომელიც 0:4 უნდა წაგვეგო. მეტიც, სულ კრიტიკულად ვუყურებ საქართველოს ნაკრებს, მაგრამ პირველი ტაიმის შემდეგ ასეთ შედეგს, უბრალოდ, ვერ წარმოვიდგენდი.
ფაქტია, ვითარება რთულია, თუმცა ნუ დავხატავთ უიმედო ფონს. ბუნებით ოპტიმისტი ვარ და ურყევად მჯერა უკეთესობის. თუ უფსკრულში ვართ, მაშინ დავიკრიფოთ ხელები და მხოლოდ სასწაულის იმედზე ვიყოთ.
მჯერა, გამოსწორდება სიტუაცია. არ მგონია, გილიოტინაზე ასვლას ჰგავდეს ახალი მწვრთნელის მოსვლა".
რომელ კანდიდატურებს განიხილავს საქართველოს ფეხბურთის ფედერაცია? ცხადია, ვარაუდები არის და მოსაზრებებიც, თუმცა ამ ეტაპზე რომელიმე კანდიდატი გამოკვეთილად არ ჩანს.
"თამაშის მერე სულ სამი დღე გავიდა. ორი დღის განმავლობაში თემურ ქეცბაია თბილისში იყო და მას ვემშვიდობებოდით. დღეს პირველი სამუშაო დღეა თამაშის შემდეგ.
საქართველოს ფეხბურთის ფედერაციის პრეზიდენტი და გენერალური მდივანი უეფაში არიან კომიტეტის სხდომაზე. თბილისში დარჩენილნი ვართ მე და ვიცე-პრეზიდენტები.
ჩამოვლენ პრეზიდენტი და გენერალური მდივანი, რის შემდეგაც უფრო მეტი კონკრეტიკის შეტანა იქნება შესაძლებელი ამ საკითხში", - გვეუბნება არველაძე.
უცხოელი გამორიცხული არ არის
სადღეისოდ, საქართველოში უცხოელი მწვრთნელის იდეა თითქოს გაკოტრებულია. არჩილ არველაძე არც იმას გამორიცხავს, რომ საქართველოს ნაკრები სწორედ უცხოელმა ჩაიბაროს."როგორც ქართველი, ისე უცხოელი შეიძლება ვიხილოთ საქართველოს ნაკრების სათავეში. ამ ეტაპზე მხოლოდ ეს შემიძლია გითხრათ. კონკრეტული კანდიდატები კი ჯერ არ არის გამოკვეთილი".
მოგეხსენებათ, თემურ ქეცბაიამ ხელშეკრულებით გათვალისწინებულ ვადაზე ადრე დატოვა ეროვნული გუნდი. საინტერესოა, ხომ არ მოუწევს საქართველოს ფეხბურთის ფედერაციას ექსმწვრთნელისთვის საკომპენსაციო თანხის გადახდა?
"აქ ყველა კითხვის ნიშანი მოხსნილია. როცა მწვრთნელი თავისი სურვილით ტოვებს თანამდებობას, მასთან ხელშეკრულება ავტომატურად უქმდება. ასე რომ, თემურ ქეცბაიასათვის საქართველოს ფეხბურთის ფედერაციას არ მოუწევს არანაირი საკომპენსაციო თანხის გადახდა...
როცა თემური გავაცილე, ერთადერთი რამ ვუსურვე - რაც შეიძლება კარგად დაისვენე-მეთქი. მწვრთნელის ბედს წინასწარ ვერ განსაზღვრავ - შეიძლება, ხუთ დღეში გამოუჩნდეს ახალი საქმე.
მინდა, თქვენი გაზეთის საშუალებით მადლობა გადავუხადო მას იმისთვის, რაც გააკეთა საქართველოს ნაკრებში და სამომავლოდ წარმატება ვუსურვო", - ამბობს ფედერაციის ტექნიკური დირექტორი.
შესაძლოა, საქართველოს ნაკრებმა, ახალი მწვრთნელის ხელმძღვანელობით, პირველი მატჩი გერმანიასთან დაპირისპირებამდე, ანუ 29 მარტამდე გამართოს.
"რაც შეეხება ამხანაგურ მატჩს, ამ შემთხვევაში გადამწყვეტი იქნება საქართველოს ნაკრების ახალი მწვრთნელის აზრი. შეიძლება, გერმანიასთან თამაშამდე რამდენიმე დღით ადრე ის მოერიდოს ტრავმებს და ამხანაგურ შეხვედრაზე უარი თქვას.
ამ ეტაპზე შემიძლია გითხრათ, რომ ჩვენთან ამხანაგური შეხვედრის ჩატარება მალტას სურს, თუმცა, ვიდრე ახალი მწვრთნელი არ დაინიშნება, ალბათ, შეუძლებელი იქნება მალტელებისთვის პასუხის გაცემა", - ესეც არჩილის სიტყვებია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
