გორდონ სტრაჩანი: ეს არ ნიშნავს იმას, რომ ვნერვიულობთ

შოტლანდიის ნაკრების მთავარმა მწვრთნელმა გორდონ სტრაჩანმა განაცხადა, რომ საქართველოს ნაკრებისგან ბევრს ელის. ლეგენდარულმა ფეხბურთელმა ისიც აღნიშნა, რომ რთული დილემის წინაშე იდგა...

პრესკონფერენციაზე მობრძანდა სქოთების კაპიტანი სკოტ ბრაუნიც, რომელიც ერთობ ენაწყლიანი მოსაუბრე აღმოჩნდა. მან საქართველოსა და შოტლანდიის ნაკრებთა დღევანდელი მატჩის წინ ერთობ გახსნილად ილაპარაკა.


- ჯგუფიდან გასვლის პერსპექტივაზე გათვლით, რამდენად მნიშვნელოვანია ხვალინდელი თამაში შოტლანდიის ნაკრებისთვის?
გორდონ სტრაჩანი:
- ახლა ამას ვერ ვიტყვი. შეიძლება, ძალიან მნიშვნელოვანი იყოს ან არანაირი მნიშვნელობა აღარ ჰქონდეს. უკვე მეოთხე თამაშიდან მოყოლებული, მისვამენ ამ კითხვას და ბედნიერი ვიქნები, თუ ბოლო ტურის წინაც დამისვამენ. დიდი იმედი მაქვს, რომ შოტლანდიის ნაკრები ევროპის ჩემპიონატზე ითამაშებს. ჩვენ ყველა თამაშზე მოსაგებად გავდივართ და ეს მხოლოდ სიტყვები არ არის.

- ბევრი მიიჩნევს, რომ თბილისში გამარჯვება აუცილებელია და არ შეიძლება, სხვანაირად მოხდეს...
- არა, მე ასეთ შეფასებას ვერ დავეთანხმები.

- იცით თუ არა ის სასტარტო თერთმეტეული, რომელიც ხვალ გამოვა მინდორზე?
- უკვე ვიცი, თუმცა ჩემს გადაწყვეტილებას ფეხბურთელებს ცოტა მოგვიანებით გავაცნობ. უკვე შეიძლება იმის თქმა, რომ რამდენიმე კარგი ფეხბურთელი იქნება სათადარიგოთა სკამზე.

- თბილისური სიცხე ხომ არ შეგაფერხებთ?
- თამაშისთვის მომზადებაში ეს ფაქტი გავითვალისწინეთ. უშუალოდ თამაშის მსვლელობის დროსაც გავითვალისწინებთ.

- საქართველოს ნაკრებმა შესარჩევ ციკლში, ახალი მწვრთნელის ხელმძღვანელობით, ორი მატჩი ჩაატარა და იმ შეხვედრებში ქართველი ქომაგი, ასე თუ ისე, ელოდა მარცხს. სხვანაირად იქნება შოტლანდიასთან - ხალხი საქართველოს ნაკრებისგან დადებით შედეგს ელის...
- გლაზგოში ქართველებმა კარგად ითამაშეს. მათ გუნდური თამაშის შესანიშნავი მაგალითი აჩვენეს.

- თბილისში ჩამოსული შოტლანდიელი ქომაგები ნერვიულობენ. როგორია თქვენი წინასამატჩო მოლოდინი?
- ჩვენც მათნაირი ემოციები გვაქვს, თუმცა ეს არ ნიშნავს იმას, რომ ვნერვიულობთ.

- 2007 წელს საქართველომ შოტლანდია დაამარცხა და ევროპის ჩემპიონატზე გასვლის შანსი მოუსპო. გჯერათ ისტორიის გამეორების?
- 2007 წლის მერე ძალიან დიდი დრო გავიდა. მაშინ ვერავინ იფიქრებდა, რომ მე დღეს "აიფონი" მექნებოდა...

- რამდენად მნიშვნელოვანი იქნება ჯგუფიდან გასვლისთვის თბილისში გამარჯვება?
სკოტ ბრაუნი:
- შოტლანდიის ნაკრებისთვის ყველა შეხვედრა მნიშვნელოვანია. შემიძლია დავდო პირობა, რომ თბილისში მოსაგებად ვითამაშებთ.

- D ჯგუფის ყველა გუნდმა, რომელიც თბილისში ჩამოვიდა, 3 ქულა აიღო. აქედან გამომდინარე, თქვენც გამარჯვებას მოგთხოვენ...
- ჩვენ ვიცით, რა უნდა გავაკეთოთ იმისთვის, რომ 3 ქულა ავიღოთ.

- თბილისში ძალიან ცხელა. ეს ფაქტორი რამდენად იქნება ხელის შემშლელი თქვენთვის?
- არ მგონია, ეს დიდი პრობლემა იყოს. შოტლანდიის ნაკრებში "სელტიკის" რამდენიმე ფეხბურთელია. მათ მონაწილეობა მიიღეს "ყარაბაღთან" ამასწინანდელ შეხვედრაში. აზერბაიჯანშიც დაახლოებით ისეთივე კლიმატია, როგორიც საქართველოში. სიცხიდან გამომდინარე, შესაძლოა, მაღალი პრესინგით არ ვითამაშოთ, მაგრამ... ვნახოთ... ამას მთავარი მწვრთნელი გადაწყვეტს.

- როგორ ფიქრობთ, ვინ ითამაშებს თავდასხმაში - დარენ ფლეტჩერი თუ ლი გრიფიტსი?
- ამას მწვრთნელი გადაწყვეტს. ორივე ძალიან კარგი ფეხბურთელია, თუმცა განსხვავებული სტილის. გრიფიტსი სწრაფია და კარგად იყენებს მარცხენა ფეხს. რაც შეეხება ფლეტჩერს, ის უფრო საჯარიმოს ფორვარდია. ფლეტჩერი წლების განმავლობაში თამაშობს ინგლისურ პრემიერლიგაში და ამას მხოლოდ უმაღლესი კლასის ოსტატი თუ შეძლებს.

- საქართველოს მიერ დაკავებული ადგილიდან გამომდინარე, შოტლანდიისგან უეჭველ გამარჯვებას უნდა ველოდოთ?
- მე ასე არ ვიტყოდი. გასვლაზე ვთამაშობთ და ასეთ მატჩს ყოველთვის თან ახლავს სირთულეები, არის მოულოდნელობებიც. მაგალითად, წინა შესარჩევ ციკლში ჩვენ გასვლაზე მოვუგეთ ხორვატიას... საქართველოს ნაკრებს ჰყავს ახალი მწვრთნელი. ისინი ყველაფერს გააკეთებენ 3 ქულის მოსაპოვებლად.

- საქართველოს ნაკრებს ჰყავს ახალი მწვრთნელი, ვინც უპირატესობას შემტევ ფეხბურთს ანიჭებს. ეს ერთგვარი შვება არ არის შოტლანდიის ნაკრებისათვის? პირველ, გასვლით მატჩში საქართველოს ნაკრები "უკნიდან" თამაშობდა...
- ვნახოთ, რა ტაქტიკით ითამაშებს მეტოქე...

- ფიქრობთ, რომ შოტლანდიის ნაკრებში მაღალი კონკურენციაა?
- ასეა. ჩვენ გვყავს ინგლისური ჩემპიონშიფისა და პრემიერლიგის ფეხბურთელები. მიმაჩნია, რომ შოტლანდიის ნაკრებში ძალიან დიდი კონკურენციაა.

(იბეჭდება მცირე ცვლილებით)
ყოველდღიური სპორტული გაზეთი "ლელო"