ლევან მჭედლიძე: ირლანდიაში თამაშიც კარგი უნდა ვაჩვენოთ და შედეგიც

ევრო 2016-ის საკვალიფიკაციო ეტაპის მატჩში საქართველოს ნაკრებმა შოტლანდია 1:0 დაამარცხა და გულშემატკივარი უზომოდ გაახარა.

BBC-მ მატჩის საუკეთესო ფეხბურთელად ლევან მჭედლიძე დაასახელა. მან სქოთებს უამრავი საჰაერო ბრძოლა მოუგო, რამდენჯერმე სახიფათოდ დაარტყა და, რაც მთავარია, ვაკო ყაზაიშვილსაც დაეხმარა გამარჯვების გოლის გატანაში.

25 წლის თავდამსხმელს მატჩის შემდეგ მცირე ინტერვიუ ჩამოვართვით:

- ძალიან რთული თამაში იყო, მაგრამ ჩვენც კარგად მოვემზადეთ და ყველა ის დავალება შევასრულეთ, რასაც ამ დღეებში ვამუშავებდით. ეს გამარჯვება უნდა იყოს უმნიშვნელოვანესი ფაქტორი, უფრო თავდაჯერებულები რომ გავხდეთ.

- ფაქტია, რომ ეს მოგება

ნაკრებსაც სჭირდებოდა და გულშემატკივარსაც, რომელმაც ფეხბურთზე გული აიცრუა. ამას შეთხელებული ტრიბუნებიც მოწმობს...
- გეთანხმებით და ამიტომაც იყო ეს ჩვენთვის უმნიშვნელოვანესი გამარჯვება. ჯერ იმიტომ, რომ დაგვბრუნებოდა თავდაჯერება. რწმენა გვქონდა, თორემ ამ გამარჯვებას სხვაგვარად ვერ მივაღწევდით. ვცდილობთ, მწვრთნელის დავალებები და ვარჯიშებზე დამუშავებული კომბინაციები თამაშში გადავიტანოთ.

ვეთანხმები კახა ცხადაძეს - გამარჯვების მნიშვნელობის მიუხედავად, ეს მატჩი უნდა დავივიწყოთ და ირლანდიაში კარგი შედეგიც ვაჩვენოთ და თამაშიც.

- მოგება მართლაც მნიშვნელოვანი იყო, მაგრამ არანაკლებ სასიამოვნოა, რომ, როგორც იქნა, მუდმივად პერსპექტიული თავდამსხმელი გუნდის ერთ-ერთ ლიდერად გიხილეთ...
- 2007 წელთან შედარებით ნამდვილად განსხვავებული ფეხბურთელი ვარ. ვცდილობ, დღითიდღე, ყოველ თვე და ყოველ წელს ჩემი შესაძლებლობების ფარგლებში წინ წავიდე. ჩემი სურვილია, კლუბსაც გამოვადგე და ნაკრებსაც, ჩემი კარგი თამაში ხომ ორივეზე აისახება.

- საკლუბო სიტუაციაზე რას გვეტყვით?
- ალბათ, კონტრაქტს გავაფორმებ და თამაშს დავიწყებ. გუნდში სწორედ ამას ელოდებიან და ამის შემდეგ მათამაშებენ. თუ გავაფორმე, თამაშის უფლებას აუცილებლად მოვიპოვებ. მაგრამ, ჯერჯერობით, კონტრაქტს ხელს არ ვაწერ - უთამაშებლობის მიზეზიც სწორედ ეს არის. ეს საკითხი, რომ იტყვიან, ჯერაც დაპაუზებულია.

- ანუ ეს იმას ნიშნავს, რომ სხვა წინადადებაც გაქვთ?
- არის ვარიანტი როგორც იტალიაში, ისე მის გარეთ. გერმანულ ბუნდესლიგაშიც მიწვევენ და წინადადებები სერია A-ს გუნდებიდანაც მივიღე. ვნახოთ, რა იქნება.

- გადაწყვეტილებას როდის მიიღებთ?
- უახლოეს დღეებში.

(იბეჭდება მცირე ცვლილებით)
ყოველდღიური სპორტული გაზეთი "ლელო"