დღეს, 5 სექტემბერს, "დინამო არენაზე", საქართველოს და ავსტრიის ნაკრებების მატჩის დაწყებამდე ზურაბ ხიზანიშვილის ეროვნული გუნდიდან გაცილების ცერემონია გაიმართება.ამასთან დაკავშირებით, ფეხბურთელმა სოციალურ ქსელში განცხადება გაავრცელა, რომელსაც უცვლელად გთავაზობთ.
"16 წელი იმ საქმეს ვემსახურე, რომელიც ყველაზე მეტად მიყვარს და რომელშიც ყველაფერი ჩავდე.
ამ პერიოდში არაერთ სახელოვან გუნდში მომიწია თამაში, მაგრამ ჩემთვის ყველაზე მნიშვნელოვანი და საპატივცემულო საქართველოს ნაკრებში თამაში იყო. 93-ჯერ მოვირგე ეროვნული მაისური და ყოველთვის განსაკუთრებული განცდა მეუფლებოდა. იყო წარმატებებიც და წარუმატებლობაც, მაგრამ ყველაზე საპასუხისმგებლო და საამაყოა, როდესაც შენს ქვეყანას წარმოადგენ.
ხიზანიშვილის დებიუტი 1999 წელს საქართველო-საბერძნეთის დაპირისპირების დროს შედგა და მას შემდეგ, 2015 წლის ჩათვლით, მან ეროვნული ნაკრების მაისურით 93 მატჩი ითამაშა.
ხიზანიშვილს საქართველოში თბილისის "ლოკომოტივში", თბილისის "დინამოსა" და "სამტრედიაში" უთამაშია, საზღვარგარეთ კი შოტლანდიური "დანდისა" და "გლაზგო რეინჯერსის", ინგლისური "ბლექბერნის", "ნიუკასლისა" და "რედინგის", ასევე, თურქული "ქაისერისფორის" ღირსებას იცავდა. ამჟამად 34 წლის მცველი ბაქოს "ინტერში" გამოდის.
