ფოტოზე: ემანუელე რიგი და ლევან სეთურიძესაქართველოს იტალიელი სელექციონერი ემანუელე რიგი ესტუმრა, რომელიც სერია B-ს კლუბ "ვერონასთან" თანამშრომლობს. ეს ვიზიტი ორგანიზაცია "თავისუფალი ფეხბურთის" თანადამფუძნებლის, ლევან სეთურიძის ორგანიზებული გახლდათ. აპენინელი მენეჯერი თბილისში საქართველო-ავსტრიის შეხვედრას დაესწრო, მეორე დღეს კი ზესტაფონში გაემგზავრა და ხორვატიასთან ჩვენი ახალგაზრდული ნაკრების მატჩი ნახა.
ემანუელე რიგი თბილისის "დინამოს" პრეზიდენტ რომან ფიფიასა და სპორტულ დირექტორს, ლევან გაბრიჭიძეს შეხვდა, უახლოეს დღეებში კი სხვა კლუბების - "საბურთალოს", "ლოკომოტივისა" და "გაგრას" თავკაცებთან მოლაპარაკებებიც შეათანხმა.
სეთურიძის თქმით, იტალიელი სტუმარი საქართველოში კიდევ რამდენიმე დღით
"ლელომ" მას ინტერვიუ სთხოვა. სტუმარმა ბევრი საინტერესო ამბავი გაგვიმხილა...
- მენეჯერები საქართველოს რომელიმე კონკრეტულ მატჩზე დასასწრებად სტუმრობენ. თქვენ კი კვირაზე მეტხანს რჩებით. ეს რა მიზეზითაა განპირობებული?
- საქართველო საფეხბურთო გრანდი არ არის. მაგრამ ამის მიუხედავად, მაინც საინტერესო ქვეყანაა. ლევანმა გარკვეული ინფორმაცია მომაწოდა თქვენი ფეხბურთის ისტორიაზე, წარმატებებზე, ცნობილ მოთამაშეებზე და დარწმუნებული ვარ, თანამშრომლობას აუცილებლად შევძლებთ.
ჩემი ჩამოსვლის ერთ-ერთი მიზეზი კლუბებთან ურთიერთობის დამყარების სურვილიც არის. ამას გარდა, კლასიკური და საზაფხულო საფეხბურთო სკოლის დაფუძნებაზეც ვფიქრობთ და ფეხბურთელების მოძიებასაც შევეცდებით.
- თანამიმდევრულად მივყვეთ და ჯერ საქართველო-ავსტრიის შეხვედრას შევეხოთ. ჯერ ამ მატჩს დაესწარით და საინტერესოა, ჩვენს ნაკრებზე რა შთაბეჭდილება დაგრჩათ?
- თქვენების თამაში ესპანეთთანაც ვნახე, სადაც საქართველო ძალიან აგრესიული, მონდომებული და, რაც მთავრია, მობილიზებული იყო.
ავსტრიასთან პირველ ტაიმში გუნდმა ასეთი თამაში ვერ აჩვენა. დამრჩა შთაბეჭდილება, რომ საქართველომ ცოტა გვიან გაიღვიძა და ფეხბურთი მხოლოდ მეორე ტაიმში აჩვენა. ეს თქვენებს თავიდანვე რომ გაეკეთებინათ, ქულას მაინც მოიპოვებდნენ. მაგრამ ეს უკვე დაგვიანებული იყო - ავსტრიელებს უკვე ორბურთიანი სხვაობა ჰქონდათ და ეს უპირატესობა ხელიდან აღარ გაუშვეს.
- საქართველოს ნაკრების თამაშის ორგანიზაციაზე რას იტყვით?
- პირველ ნახევარში, გუნდი ბურთის სწრაფ გათამაშებას ვერ ახერხებდა, საყრდენები კი - შეტევების ორგანიზებას. მეორე ტაიმში ვითარება გამოასწორეს და გუნდი ბევრად უფრო ორგანიზებულად და მოტივირებულად ათამაშდა, შეტევებსაც უფრო ორგანიზებულად და სწრაფად ავითარებდა. თქვენებმა უპირატესობა ამის ხარჯზე მოიპოვეს.
- საქართველო-ავსტრია 1:2 - ბატონო ვაის, ხანდახან თავი სიფრთხილესაც სტკივა! [VIDEO]
- ზესტაფონში იყავით და ახალგაზრდული ნაკრების თამაშზე რას იტყვით?
- ამ გუნდმა თამაში ძალიან კარგად დაიწყო და სწრაფად დაწინაურდა. შესაძლოა, გუნდი ამან ნაადრევად დაამშვიდა და რაღაც მომენტში, ეროვნული ნაკრების წევრებივით, მის ფეხბურთელებსაც "ჩაეძინათ". მეორე ნახევარში საქართველო უკეთესად გამოიყურებოდა და თამაშს აკონტროლებდა. ამ გუნდის მოძრაობა, სტილი და დინამიკური ფეხბურთი მომეწონა.
საერთოდ, ძალიან ეფექტური გუნდია და სანახაობრივ ფეხბურთს თამაშობს, სტილით კი ეროვნული ნაკრებისგან რადიკალურად განსხვავებულია. მის მოთამაშეებს ეტყობოდათ, რომ თავიდანვე იცოდნენ, რა უნდა გაეკეთებინათ.
- U21. საქართველო-ხორვატია 2:2 - ძალიან მწარე პერიცა... [VIDEO]
- თქვენი აზრით, ეს ეროვნული ნაკრების წევრებმა არ იცოდნენ?!
- იცოდნენ, მაგრამ გუნდი ორგანიზებულად მხოლოდ მეორე ტაიმში ათამაშდა. უბრალოდ, გუნდი შედეგზე იყო ორიენტირებული და თავიდან ნაკლები რისკით ითამაშა - ამან გუნდის თამაშსა და სტილს დაღი დაასვა. ახალგაზრდული კი ევროპის ჩემპიონატზე ვეღარ გადიოდა და შესაძლოა, ლაღი თამაში ამიტომაც აჩვენა.
- ზოგადად, ქართველების ფეხბურთზე რა შთაბეჭდილება დაგრჩათ?
- აქ საინტერესო ფეხბურთელები არიან, რომელთაც ევროპაში არ იცნობენ.
- ფეხბურთელებიდან ვინმე თუ დაგამახსოვრდათ?
- საქართველოს ეროვნულ და ახალგაზრდულ ნაკრებში ისეთი ფეხბურთელები ჩავინიშნე, რომლებიც თავს კარგად გამოავლენენ არათუ იტალიის სერია "ბ"-ში, არამედ, ადგილს სერია A-შიც დაიმკვიდრებდნენ. მაგრამ ქართველების ევროპაში წაყვანა დიდი პრობლემაა.
- პრობლემა მათი კლასია თუ სხვა რამ?
- შესაძლოა, ბევრი მაღალი კლასის მოთამაშე არ გყავთ, მაგრამ იმასაც ვერ ვიტყვი რომ ეროვნულსა და ახალგაზრდულში საინტერესო ფეხბურთელი საერთოდ არ არის-მეთქი. უბრალოდ, არაევროკავშირელებზე დაწესებული მკაცრი ლიმიტის გამო, იტალიაშიც და ევროკავშირის სხვა ქვეყნებშიც, ერთი და იმავე დონის ფეხბურთელებს შორის, უპირატესობას ამ ზონის ევროპული ქვეყნების ფეხბურთელებს ანიჭებენ. ან მოთამაშე კალაძის დონის უნდა იყოს, მას ლიმიტი რომ არ შეეხოს და ძირითად შემადგენლობაში თავი დაიმკვიდროს.
- ქართველებში ასეთი პოტენციალის ფეხბურთელი დაინახეთ?
- სწორედ მათზე დასაკვირვებლად ჩამოვედი და ეროვნულ ნაკრებშიც და ახალგაზრდულშიც რამდენიმე საინტერესო მოთამაშის გვარი ჩავინიშნე. 10 და 11 სექტემბერს საქართველოს ჩემპიონატის შეხვედრებსაც დავესწრები და ვნახოთ, აქედან რა გამოვა. მოწონებულ ფეხბურთელებს მთელი სეზონის განმავლობაში დავაკვირდები, რადგან ერთი შეხვედრის კარგად ჩატარების გამო, მოთამაშე იტალიაში არ მიჰყავთ. ბევრი რამ უნდა შევისწავლოთ - არა მხოლოდ თამაშის ხარისხი, არამედ, მისი ხასიათი და თვისებები...
- როგორც ვიცით, თბილისის "დინამოს" ხელმძღვანელებს შეხვდით...
- მე ეს კლუბი მაინტერესებს, რადგან ფეხბურთელების გაზრდაზეა ორიეტირებული და კარგი ისტორია აქვს. სიმართლე გითხრათ, თბილისის "დინამოს" ბაზაზე სტუმრობის შემდეგ გაოცებული დავრჩი. მსგავსი სპორტული ბაზა იტალიაში "იუვენტუსს", "მილანს", "რომას", "ინტერს" და "ლაციოს" თუ აქვთ. ბევრი კი ასეთი მოწესრიგებული ცენტრით თავს ვერ მოიწონებს. მაგალითად, თქვენ წარმოიდგინეთ, "ნაპოლიც" კი - არც ბაზით და არც საფეხბურთო სკოლით.
- ამ გუნდებთან თანამშრომლობას აპირებთ?
- დიახ, მათთანაც გვსურს თანამშრომლობა. "ლოკომოტივთან" შეხვედრა მქონდა, დალაპარაკებას "საბურთალოსა" და "გაგრას" ხელმძღვანელებთანაც მსურს. ქართულ ფეხბურთს უინტერესო ისტორია არ აქვს, ნიჭიერი ბავშვებიც არიან და ვფიქრობ, ეს ურთიერთობები ორივე მხარეს წაადგება.
(იბეჭდება მცირე ცვლილებით)
ყოველდღიური სპორტული გაზეთი "ლელო"
