[დღის თემა] საქართველოს ნაკრები - ვინ როგორ ითამაშა ირლანდიასა და უელსთან

საქართველოს ეროვნულმა ნაკრებმა მსოფლიოს ჩემპიონატის შესარჩევი ციკლის საოქტომბრო მატჩები მოითავა. წავაგეთ ირლანდიასთან და ფრედ ვითამაშეთ უელსთან.

- უელსი-საქართველო 1:1 - ჩვენი იმედის თამაში და კითხვა: ვინ დაგვწყევლა? [VIDEO+PHOTO]
- ირლანდია-საქართველო 1:0 - ტრადიციულად, ქართულად... [VIDEO+PHOTO]

ახლა ის დროა, წიწილები დავითვალოთ.

მოდით, 10-ბალიანი სისტემით შევაფასოთ ჩვენი ფეხბურთელების ნაღვაწი ამ ორ შეხვედრაში (ფრჩხილებში პირველი შეფასება ირლანდიის მატჩისაა, მეორე კი უელსისა)...

გიორგი ლორია (6.5) (7) - ირლანდიასთან მატჩში გაშვებულ გოლს მას ვერ დავაბრალებთ. ჩვენდა გასაკვირად, უელსთან შეხვედრაში ბევრი საქმე არ ჰქონია. რამდენიმე ეპიზოდში ძალიან დამაჯერებლად ითამაშა. თუნდაც ბოლო წუთებზე, როცა ქართველთა დაცვამ იშვიათი შეცდომა დაუშვა.

ოთარ კაკაბაძე (6.5) (7) - ორივე შეხვედრაში კარგი იყო. ეგაა, დუბლინური მატჩის დასაწყისში ცოტა ნერვიულობდა, რაც გასაკვირი სულაც არ არის. კარდიფში ძალიან დამაჯერებელი იყო. ჩვენი აზრით, მალე მისი პოზიციები კიდევ უფრო გამყარდება.

საბა კვირკველია (6) (7.5) - "რუბინის" ცენტრალურ მცველს სათამაშო პრაქტიკა არ აქვს. ირლანდიურ მატჩში სიმუს კოულმენს ბოლო ბარიერი ვერ შეუქმნა. უელსთან გარეთ ბეილმა მას დაასწრო და საგოლე თავური შემოგვთავაზა, მაგრამ სამართლიანობა მოითხოვს აღინიშნოს, რომ იმ მომენტში ბეილი "მისი კაცი" არ იყო. უელსთან მატჩის დანარჩენ ეპიზოდებში იდეალურად ითამაშა.

გურამ კაშია (6.5) (8.5) - საქართველოს ნაკრებს ორივე მატჩში უკაპიტნა. პირველ შეხვედრაში, სხვების დარად, ვერც მან შეაჩერა კოულმენის რეიდი. მეორე თამაშში კი მისი გარჯა იდეალურთან მიახლოებული იყო. კაშია გაუვალ კედლად იდგა უელსელი შემტევების წინ. იყო ერთი მინი-შეცდომა, თუმცა რობსონ-კანუს თავადვე არ გაატანინა, ბურთს გადაეღობა და ლორიას საქმე გაუადვილა.

გიორგი ნავალოვსკი (5.5) (6.5) - დუბლინურ მატჩში სიმუს კოულმენმა საგოლე შეტევისას სწორედ მას ჩაუდრიბლინგა. კარდიფში ვლადიმირ ვაისი ნავალოვსკის მაინც ენდო და მანაც მწვრთნელის ნდობა გაამართლა. დაცვაშიც და შეტევაშიც საიმედო იყო.

ბუბა დაუშვილი (7.5) (7.5) - ორივე შეხვედრაში დამაჯერებლად ასრულებდა მასზე დაკისრებულ მოვალეობას. უელსთან მატჩში სწორედ მან წამოიწყო ჩვენი უმწვავესი კონტრშეტევა, რომელიც კინაღამ ლევან მჭედლიძის გოლით დასრულდა.

ვაკო გვილია (8.5) (7.5) - ორივე შეხვედრაში კარგად ითამაშა, განსაკუთრებით - ირლანდიასთან. მეორე თამაშში ერთი-ორჯერ გადაწყვეტილების მიღება დაუგვიანდა. სახიფათო ჯარიმა "აიკიდა", მაგრამ მთლიანობაში კარდიფშიც დამაჯერებელი იყო. საქართველოს ნაკრების აღმოჩენა, რომელსაც შეუძლია მოკლე დროში გუნდის ერთ-ერთ ლიდერად ჩამოყალიბდეს.

თორნიკე ოქრიაშვილი (7.5) (9) - ირლანდიასთან მატჩში კარგი იყო, უელსთან კი სანაკრებო კარიერაში ერთ-ერთი საუკეთესო მატჩი ჩაატარა. კარდიფში ოქრიაშვილი საუკეთესო იყო ორივე გუნდის შემადგენლობაში. ჩვენი საგოლე შეტევის დროს კარგად გაეხსნა ვაკო ყაზაიშვილს და თავურიც აუღელვებლად დაარტყა. დიდებული რეიდის შემდეგ ფილიგრანული პასი მისცა მჭედლიძეს, რომელმაც გატანა ვერ შეძლო.

ვაკო ყაზაიშვილი (6.5) (8.5) - დუბლინში მისგან აშკარად მეტს ველოდით, კარდიფში კი შესანიშნავი იყო. საგოლე პასი მისცა თორნიკე ოქრიაშვილს, ერთხელ კი კინაღამ თვითონ გაიტანა (მისი დარტყმული ხარიხას მოხვდა). საგოლე გადაცემის დროს კი დროულად და სწორად შეაფასა სიტუაცია, შენიშნა რა კარგად გახსნილი პარტნიორი.

ჯანო ანანიძე (6.5) (7) - ამ ორ შეხვედრაში მისგან ცოტა მეტს ველოდით, თუმცა მთლიანობაში ნორმალურად ითამაშა. საქართველოს ნაკრების ბევრი შეტევა სწორედ მისი გავლით ვითარდებოდა. კარში სახიფათოდ ურტყამდა დუბლინშიც და კარდიფშიც.

ლევან მჭედლიძე (6) (6) - ორივე შეხვედრაში ბევრი იმუშავა. მჭედლიძე ძალიან სასარგებლო ფეხბურთელია საქართველოს ნაკრებისთვის, მაგრამ ფაქტია, თავდამსხმელის თამაში გოლით ფასდება. უელსში, ოქრიაშვილის პასის შემდეგ, აუცილებლად უნდა გაეტანა.

ვლადიმერ დვალიშვილი (6) - უელსთან მატჩში კარგად შევიდა შეცვლაზე. ბურთის დაჭერა შეძლო და ერთ ეპიზოდში საგოლე შანსიც ჰქონდა, მაგრამ მის დარტყმულს მცველი გადაეღობა.

ვლადიმირ ვაისი (7) (9) - ირლანდიასთანაც და უელსთანაც საქართველოს ნაკრებმა შემტევი, კომბინაციური ფეხბურთი ითამაშა. გუნდს ეტყობოდა მწვრთნელის ხელი. ჩანს, რომ ჩვენი გუნდის გარჯაში სპონტანურობა ძალიან ცოტაა, ბევრი რამაა ნაფიქრ-დახაზული. ეგაა, დუბლინში მეორე ტაიმი ჩაგვივარდა. ვაისი ნაკრებს შემტევ, კომბინაციურ ფეხბურთს ათამაშებს და ეს ძალზე სასიხარულოა. ეს ის ფეხბურთია, სისხლში რომ გვაქვს ქართველებს.

ჯაბა ჯიღაურმა, დავით სხირტლაძემ, ნიკა კაჭარავამ და სანდრო კობახიძემ ძალიან ცოტა ითამაშეს და მათი შეფასება არ გაგვიკეთებია.

(იბეჭდება მცირე ცვლილებით)
ყოველდღიური სპორტული გაზეთი "ლელო"