საქართველოს ეროვნული ნაკრების მთავარმა მწვრთნელმა ვლადიმირ ვაისმა დღეს, 21 ოქტომბერს, სასტუმრო "ჰუალინგში" პრესკონფერენცია გამართა, სადაც ირლანდიისა და უელსის ნაკრებებთან განვლილი მატჩები შეაფასა.- ირლანდია-საქართველო 1:0 - ტრადიციულად, ქართულად... [VIDEO+PHOTO]
- უელსი-საქართველო 1:1 - ჩვენი იმედის თამაში და კითხვა: ვინ დაგვწყევლა? [VIDEO+PHOTO]
"ვფიქრობ, ორივე თამაშში განსხვავებული ტაიმები ჩავატარეთ. ირლანდიაში პირველ ტაიმში უფრო მეტად ვუტევდით, უელსში კი - მეორე ნახევარში. ეს ყველაფერი მეტოქის სიძლიერიდანაც გამომდინარეობდა.
ირლანდიაში რამდენიმე რეალური მომენტი შეგვექმნა, მაგრამ გოლი ვერ გავიტანეთ და ეს არა იღბლის, არამედ ფეხბურთელთა კლასის ბრალია.
კიდევ ერთხელ ვიტყვი, რომ ეს ახალგაზრდული გუნდია... აქ ბევრი ფეხბურთელია 23-24 წლამდე, რომელიც სწავლობს და მომავალი კარიერისთვის ემზადება. ისეთი ფეხბურთელები, როგორებიც ჯანო ანანიძე, თორნიკე ოქრიაშვილი, ვაკო გვილია, ოთარ კაკაბაძე, საბა კვირკველია არიან, 1-2 წელიწადში ბევრად უკეთესები და გამოცდილები იქნებიან და ნაკრებს ძალიან გამოადგებიან.
გვქონდა პრობლემები სტანდარტულებზე... სტანდარტულების დროს დაცვის თამაში შევცვალეთ. ჩემს მოსვლამდე დაცვა 1-1-ზე თამაშობდა, მე კი ზონური დაცვა დავნერგე. ვერავის დავუმტკიცებ, რომ ერთი სისტემა მეორეს სჯობს, მაგრამ პირადად მე ზონური დაცვა მომწონს, ამას ვანიჭებ უპირატესობას...
არ ვფიქრობ, რომ ფორვარდების პრობლემები გვაქვს. პრობლემა მათი უთამაშებლობა და ფიზიკური მომზადებაა. იგივე ლევან მჭედლიძე კარგი ფორვარდია, მაგრამ ფიზიკურად 100%-ით მზად რომ ყოფილიყო, მეკარესთან პირისპირ გასული ალბათ გაიტანდა. ჩვენ სწორედ ამაზე ვმუშაობთ, რომ ფეხბურთელები ნაკრებში 100%-ით იყვნენ მზად.
მოგება მეც მინდა, მაგრამ ასეთი ფიზიკური მომზადებით ჯერ გვიჭირს. რამდენიმე ფეხბურთელმა კლუბი გამოიცვალა და ნაკრებისთვის დიდი პრობლემაა, რომ მათ კლუბებში არ ეძლევათ სათანადო სათამაშო დრო.
ეს ყველა ფეხბურთელს ეხება - თუ ნაკრებში კარგ ფიზიკურ მდგომარეობაში ჩამოვლენ, საწადელ შედეგს აუცილებლად მივაღწევთ.
ტრავმები ფეხბურთში ჩვეულებრივი ამბავია. უჩა ლობჟანიძემ, რომელიც ძირითადი შემადგენლობის ფეხბურთელია, ტრავმა მიიღო და კაკაბაძეს მიეცა შანსი, რომელმაც საკმაოდ კარგად წარმოაჩინა თავი. ის და გვილია ნამდვილი სიურპრიზები არიან - ორივე ქართული ფეხბურთის მომავალია. მათ დაგვანახეს, რომ მწვრთნელის ნდობის შემთხვევაში, მზად არიან ნაკრებს გამოადგნენ. მომავალში მხოლოდ მათზეა დამოკიდებული, იქნებიან თუ არა ძირითადში.
საქართველოს ნაკრების შეტევაში კონკურენცია დიდია და ეს მახარებს. მცველებში გვიჭირს - რთული წარმოსადგენია, რას გავაკეთებთ იგივე კვირკველია ან კაშია რომ არ გვყავდნენ.
გუშინ ჯაბა კანკავასთან სატელეფონო საუბარი მქონდა. მითხრა. რომ გამოკეთდა და შაბათს უკვე გუნდის შემადგენლობაში იქნება... ეს ძალიან მახარებს. ახლა მას 3-კვირიანი სათამაშო პრაქტიკა სჭირდება და დარწმუნებული ვარ, შემდეგ ნაკრებსაც დაეხმარება.
ჩვენს ჯგუფში გამოკვეთილი ფავორიტი არ არის და ჩვენ სიურპრიზების გაკეთება შეგვიძლია. ყველაფერი ჩვენზეა დამოკიდებული. ამ ტურში ფავორიტები ერთმანეთში თამაშობენ, ჩვენ კი მოლდოვას ვხვდებით, სადაც ფავორიტის სტატუსი გვექნება, მაგრამ ეს არ ნიშნავს, რომ იოლი მატჩი გველის. მიხარია, რომ ამ მატჩისთვის გუნდის მოსამზადებლად საკმაო დრო მაქვს. იმედია, მომენტების რეალიზებას უკეთ შევძლებთ მომდევნო შეხვედრებში.
ვნახე მოლდოვას ნაკრები. ეს გუნდი დაცვაში საკმაოდ კომპაქტურად თამაშობს, გოლები კი ინდივიდუალური შეცდომების გამო გაუშვეს. ფიფას რეიტინგში მოლდოვასთან ახლოს ვართ. ვფიქრობ, ისინი აქცენტს კონტრშეტევაზე გააკეთებენ. ყველა მეტოქეს პატივს ვცემ და იოლ მატჩს არ ველი.
გასულ თამაშებში ხუთმა ფეხბურთელმა უკვე მიიღო ყვითელი ბარათი და მოლდოვასთან მატჩისთვის ამაზეც უნდა ვიფიქროთ", - განაცხადა ვაისმა.
- ვაისი ჭანტურიაზე: გასახდელში მოხდა ის, რის გამოც აღარ გამოვიძახე
- ვლადიმირ ვაისი: ჯაბა ლიპარტია მოლდოვასთან გაფართოებულ შემადგენლობაში იქნება
