საქართველოს ნაკრები 12 ნოემბერს თბილისში მოლდოვას უმასპინძლებს. მოდით, თავიდანვე შევთანხმდეთ: დღეს ჩვენი გუნდისთვის არ არსებობს იოლი მოწინააღმდეგე და თუნდაც ჯგუფის აუტსაიდერთან მატჩში გამარჯვების მოსაპოვებლად ძალების მაქსიმალური მობილიზაცია დაგვჭირდება.დღევანდელი ჩვენი წერილის მიზანი საქართველოს ნაკრების თითოეული ფეხბურთელის მდგომარეობის შეფასებაა. დავწერთ როგორც ნაკრების ძირითად, ისე გაფართოებულ შემადგენლობაზე.
ეს წერილი კიდევ ერთხელ დაგვაფიქრებს საქართველოს ნაკრების მთავარ პრობლემაზე - ჩვენი ქვეყნის უპირველესი გუნდის ფეხბურთელები იმდენს არ თამაშობენ ევროპულ კლუბებში, რამდენიც სასურველია და არ შეიძლება, ეს არ გვაღელვებდეს...
მეკარეები
გიორგი ლორია - სტაბილურად თამაშობს "კრილია სოვეტოვში".
ნუკრი რევიშვილი
- სტაბილურად თამაშობს თბილისის "დინამოში". მთლად ოპტიმალურ ფორმაში ვერ არის, რადგან ბოლო დროს ძალიან ბევრი გაუცდა. ამის მიუხედავად, მეკარის პოზიციაზე კონკურენციას აუცილებლად შექმნის.
როინ კვასხვაძე
- "ტორპედოს" ერთ-ერთი ლიდერი. კიდევ ერთი კარგი მეკარე საქართველოს ეროვნული ჩემპიონატიდან, რომელსაც ნებისმიერ წამს შეუძლია კოლეგის შეცვლა.
მცველები
უჩა ლობჟანიძე - სათამაშო პრაქტიკის ნაკლებობას არ უჩივის. მარჯვენა მცველის პოზიციაზე საქართველოს ნაკრებში უკვე შეიმჩნევა კონკურენცია და ეს ლობჟანიძის დამსახურებაცაა.
ოთარ კაკაბაძე
- სეგუნდა დივიზიონის "ჟიმნასტიკის" შემადგენლობაში სულ უფრო მყარად იკიდებს ფეხს. საქართველოს ნაკრების ბოლო მატჩებშიც ძალიან კარგად წარმოაჩინა თავი.
საბა კვირკველია
- "რუბინში" კვლავ არ ენდობიან, ეროვნული გუნდისთვის კი მაინც შეუცვლელ ფეხბურთელად მოჩანს. კვირკველიამ ერთხელაც უნდა მოახდინოს პატარა სასწაული და ეროვნულ გუნდში კარგი მატჩი ჩაატაროს კლუბში უნდობლობის ფონზე.
გურამ კაშია
- საქართველოს ნაკრების ერთ-ერთი გამორჩეული წევრისგან მუდამ დამაჯერებელ თამაშს და დაცვის ლიდერობას ველით. "ვიტესის" ერთ-ერთი ლიდერია და სისტემატურად თამაშობს.
დავით ხოჭოლავა
- ოდესის "ჩერნომორეცის" დაცვის ლიდერი შესანიშნავ ფორმაშია. ხოჭოლავა უკრაინის ჩემპიონატის პირველი წრის სიმბოლურ ნაკრებშიც მოხვდა. შემთხვევითი არ არის, რომ მისი გადაბირება რამდენიმე სოლიდურ კლუბს სურს.
გიორგი ნავალოვსკი
- მარცხენა მცველის პოზიციაზე თითქმის არ ჰყავს ალტერნატივა. ალბათ, უკეთეს კლუბს ვისურვებდით მისთვის. "ვერიაში" დამაჯერებლად თამაშობს და ამას წინათ, საგოლე გადაცემაც მიითვალა "პანათინაიკოსთან" მატჩში.
ნახევარმცველები
ჯაბა კანკავა - საქართველოს ნაკრების კაპიტანმა "რეიმსში" თამაში დაიწყო და ეროვნულ გუნდსაც დაუბრუნდა. ის ქვეყნის უმთავრესი გუნდის ერთ-ერთი ლიდერია და ნაკრებში მისი ყოფნა თავისთავად ძალიან კარგია. უნდა ვივარაუდოთ, რომ ოპტიმალურ ფორმასთან ახლოსაა, რაკი "რეიმსის" ბოლო ორ მატჩში ძირითად შემადგენლობაში იყო. წინააღმდეგ შემთხვევაში, თავად იტყოდა უარს, როგორც ბოლო პერიოდში ამბობდა - სასურველ კონდიციებში არ ვარ და ნაკრებში ვერ ჩამოვალო.
ვაკო გვილია
- საქართველოს ნაკრების ახალწვეული და "აღმოჩენა". ბატე-მ გაინაღდა ბელარუსის ჩემპიონობა, თუმცა გვჯერა - გვილია კვლავაც სრულ მზადყოფნაში შეხვდება საქართველოს ნაკრების მატჩს.
ბუბა დაუშვილი
- უნგრულ "დიოშდიორში" სისტემატურად მოედანზეა. საქართველოს ნაკრების ბოლო ორ მატჩშიც კარგად ითამაშა. ვაისის გუნდის შუა ხაზში დიდი კონკურენციაა და ამის ერთ-ერთი მიზეზი დაუშვილიცაა.
თორნიკე ოქრიაშვილი
- ჯერაც ვერ იქცა "კრასნოდარის" ერთ-ერთ ლიდერად, თუმცა საქართველოს ნაკრებისთვის შეუცვლელი ფეხბურთელია. მოკლედ რომ ვთქვათ, მისგან მორიგ შთამბეჭდავ მატჩს ველით.
ჯაბა ჯიღაური
- თბილისის "დინამოს" ერთ-ერთი ლიდერი, შესანიშნავ ფორმაშია. დიდებულად ითამაშა ქუთაისის "ტორპედოსთანაც". ერთ რამედ ღირდა მისი "მაკრატელა" თბილისურ ნახევარფინალში. აუცილებლად ექნება პრეტენზია ნაკრების ძირითად შემადგენლობაში მოხვედრაზე.
გიორგი ჭანტურია
- თანდათან იმკვიდრებს ადგილს "ურალის" სასტარტო თერთმეტეულში. შეაგდო გოლი, გამოიმუშავა 11-მეტრიანი... იმედია, ბოლოს და ბოლოს, ის საქართველოს ნაკრებსაც მოუტანს დიდ სარგებლობას, რისი პოტენციალიც ნამდვილად აქვს. ამის ნათელი დასტურია ისიც, რომ ვლადიმირ ვაისმა, ორმატჩიანი პაუზის (რაც ავსტრიასთან თამაშის შემდეგ მომხდარს უკავშირდება) შემდეგ, მაინც უხმო ნაკრებში. ტრავმა, რომელიც "ტერეკთან" მატჩში მიიღო, საშიში არ არის.
ჯანო ანანიძე
- ცოტა ხნის წინ ახალი კონტრაქტი გააფორმა "სპარტაკთან" და შეუძლია, სრულად მოახდინოს კონცენტრაცია სანაკრებო მატჩზე. ჯანოს წამში შეუძლია მატჩის ბედის გადაწყვეტა. ის ნაკრების ერთ-ერთი მთავარი კაცია და აქ სხვა სიტყვები საჭირო აღარ არის (ბოლო ინფორმაციით, ჯანოს ტრავმა აქვს).
ოთარ კიტეიშვილი
- ამ შემთხვევაში, ვაისი გათვლას, ალბათ, უფრო მომავალზე აკეთებს. მოვა დრო და "დინამოს" ერთ-ერთი ლიდერი აუცილებლად გახდება ქვეყნის უპირველესი გუნდის ძირითადი შემადგენლობის მოთამაშე.
სანდრო კობახიძე
- უნივერსალი, რომელსაც ნებისმიერ წამს შეუძლია თამაშში ჩართვა და გუნდისთვის სარგებლის მოტანა. უკრაინულ "ვორსკლაში" ძირითადის ფეხბურთელია. საჭიროზე საჭირო მოთამაშეა საქართველოს ნაკრებისთვისაც.
ვაკო ყაზაიშვილი
- "ლეგიაში" სათამაშო პრაქტიკა არ აქვს. კლუბში ყაზაიშვილის მომავალი კიდევ უფრო ბუნდოვანი გახდა მას შემდეგ, რაც პოლონური გრანდი უმაყურებლო "ვოისკა პოლსკაზე" მის გარეშე დაუზავდა (3:3) თვით მადრიდის "რეალს". არადა, საქართველოს ნაკრებში ის ამ ეტაპზე უალტერნატივოა.
თავდამსხმელები
ლევან მჭედლიძე - სულ თამაშობს "ემპოლიში", ოღონდ, მეტწილად - შეცვლაზე. რაც მთავარია, ტრავმა არ აქვს და თუ მოლდოვასთან მატჩამდე არაფერი შეიცვალა, სწორედ მან უნდა დაიწყოს ეს შეხვედრა სასტარტო შემადგენლობაში.
დავით სხირტლაძე
- დიდებულ ფორმაშია და გოლი გოლზე გააქვს. ალბათ, ღირს მისთვის სანაკრებო შანსის მიცემა, უფრო მეტისაც, ვიდრე ავსტრიასთან იყო. ფაქტია, ამ ბოლო დროს დანიური "სილკებორგის" გამოკვეთილ ლიდერად ჩამოყალიბდა.
გიორგი ქვილითაია
- "რაპიდში" პირველი გოლი გაიტანა, თუმცა ჯერ მაინც არ აქვს იმხელა სათამაშო დრო, რამდენსაც ვისურვებდით. ცხადია, ისიც ელის სანაკრებო შანსს. ქვილითაია საქართველოს ნაკრების მომავალია.
ლადო დვალიშვილი
- "დინამოში" უწყვეტი სათამაშო პრაქტიკა აქვს. ეგაა, ვაისი მას გამოკვეთილ ფორვარდად არ იყენებს და, ალბათ, მართალიცაა. დვალიშვილი თავს არ ზოგავს, ოღონდ, მის გარჯას აკლია მთავარი - გოლი.
გაფართოებული შემადგენლობა
მეკარე
გიორგი მაკარიძე - "მორეირენშეს" ძირითადი მეკარეა. კიდევ ერთი წონადი კანდიდატი ნაკრებისთვის - განა, ბევრი ქართველი თამაშობს პორტუგალიის უძლიერეს ლიგაში?მეკარე
მცველები
ლაშა დვალი - "შლიონსკში" სათამაშო პრაქტიკა არ აკლია. ახალგაზრდა, პერსპექტიული მცველი, რომელიც მალე უნდა დამკვიდრდეს ეროვნულ გუნდში.
გიორგი რეხვიაშვილი
- "ჩიხურას" კარგი სეზონი აქვს და გასაკვირი არ არის, ვაისის თვალთახედვის არეში საჩხერული კლუბის ერთ-ერთი ლიდერიც რომ მოექცა.
თორნიკე გრიგალაშვილი
- კიდევ ერთი ფეხბურთელი "ჩიხურადან", რომელსაც ძალიან კარგი სეზონი აქვს. ყოველთვის სასიამოვნოა, ეროვნული ჩემპიონატიდან ფეხბურთელები ქვეყნის მთავარ გუნდში რომ ხვდებიან.
ნახევარმცველები
ნიკა კვეკვესკირი - რომ არა ხანგრძლივი ტრავმა და მისი თანმდევი სარეაბილიტაციო პერიოდი, დარწმუნებულნი ვართ, კვეკვესკირი საქართველოს ნაკრების "ძირითად" შემადგენლობაშიც მოხვდებოდა. ტრავმამ ძალიან ბევრი გააცდენინა, მათ შორის - სანაკრებო და "გაბალას" ევრომატჩები.
ლაშა პარუნაშვილი
- თბილისის "დინამოს" ნახევარდაცვის კიდევ ერთი წამყვანი ფეხბურთელი, რომელიც სისტემატურად თამაშობს დედაქალაქურ კლუბში.
ჯაბა ლიპარტია
- "ზორიას" ნახევარმცველის თაობაზე ვაისმა ცოტა ხნის წინ არაფერი იცოდა, ახლა კი გაფართოებულ სიაში ჰყავს და ესეც პროგრესია. "ზორიაში" ხან ძირითადშია, ხან - შეცვლაზე შედის. ყოჩაღი უკრაინული კლუბის მნიშვნელოვანი ფეხბურთელი სანაკრებო შანსს ნამდვილად იმსახურებს.
თავდამსხმელები
ნიკა კაჭარავა - მომკალით და, ვერ ვიხსენებ ქართველი ლეგიონერის მიერ შესრულებულ "პოკერს". ეს კაჭარავამ შეძლო კვიპროსის არცთუ ხელწამოსაკრავ ჩემპიონატში. ჩემი სუბიექტური აზრია: ამ ეტაპზე ის ნაკრების ძირითადში ყოფნასაც იმსახურებდა. ახნას "ეთნიკოსის" ერთ-ერთი ლიდერია.
ოთარ მარცვალაძე
- სამწუხაროდ, მისი ნიჭი ბოლომდე ვერა და ვერ გამოვლინდა საქართველოს ეროვნულ გუნდში. არადა, მარცვალაძეს შეუძლია, ამ ნაკრებისთვის ძალიან სასარგებლო ფეხბურთელი იყოს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
სვანო,ჭკვიანი კაცი მგონიხარ და რა ავმეხსიერი ყოფილხარ,მაგისთანები გვინახავს გინდა ნაკრებში და გინდაცხოვრებაში?კაცი რაც შეუძლია ცდილობს,იბრძვის,თავს არ ზოგავს და აპატიე არა უშავს რა.ბოლო ბოლო სვანები მოსისხლეები რიგდებიან და ლადო მხოლოდ ფეხბურთელია.თუ არადა ჩემი,ერთი უბრალო გულშემატკივრის ხათრით მაინც.მოსულა?