12 ნოემბერს "დინამო არენაზე" 2018 წლის მუნდიალის შესარჩევი მატჩი გაიმართება, საქართველოს ნაკრები მოლდოვას მასპინძლობს (მატჩი 21:00 საათზე დაიწყება). მოლდოვის ნაკრები იგორ დობროვოლსკის ხელმძღვანელობით საქართველოში დღეს ჩამოდის. დობროვოლსკის საკმაოდ დიდი საკადრო პრობლემები აქვს. თუკი ვლადიმირ ვაისის გუნდში ტრავმის გამო მხოლოდ ჯანო ანანიძე ვერ ითამაშებს (ესეც ბოლომდე გამორიცხული არ არის), სტუმრებს მნიშვნელოვან ფეხბურთელთა ჯგუფი დააკლდება.
რაც მთავარია, არ იქნება ნაკრების ლიდერი, იტალიური "კალიარის" ნახევარმცველი, 26 წლის არტურ იონიცე. იგი ტრავმირებულია. იონიცემ სერია A-ში ბოლოს სექტემბერში ითამაშა. ამ ზაფხულს "კალიარიმ" იონიცეში 4,5 მილიონი
არ იქნება არც დაცვის ერთ-ერთი ლიდერი იგორ არმაში (ყუბანი, რუსეთი), რომელიც ირლანდიასთან მატჩში დაიმტვრა პირველ ტაიმში და მას მერე არ უთამაშია. სხვათა შორის, არმაშმა კაპიტანი ალექსანდრ ეპურიანუ ამოაგდო შემადგენლობიდან და ახლა ეპურიანუ ძირითადს დაუბრუნდება.
ტრავმირებულია ეუგენ ჩებოტარუც (სიბირი, რუსეთი), რომელიც ირლანდიასთან შეცვლაზე შევიდა.
დისკვალიფიცირებულები არიან ნახევარმცველი ანდრეი კოჟოკარი (მილსამი) და ფორვარდი ალექსანდრ დედოვი (მილსამი). ირლანდიასთან მატჩში ორივე ძირითადში იყო.
სულ ბოლოს მოლდოვას ძირითადის მეკარე ნიკოლაე კალანჩეა (კრაიოვა, რუმინეთი) გამოაკლდა.
"ასეა, ვერავინ გადადებს ან გააუქმებს მატჩს, სამწუხაროდ, ბევრი გვაკლია ტრავმისა და დისკვალიფიკაციის გამო, მაგრამ უნდა გავიდეთ და ვითამაშოთ", - აცხადებს "ტრიკოლორის" თავკაცი დობროვოლსკი.
მოკლედ, მოლდოვას 5 მნიშვნელოვანი ფეხბურთელი აკლია და აქედან 4 ირლანდიაში ძირითადში იყო, ერთი კი შეცვლაზე შევიდა. გუნდი გამოცდილი ეპურიანუსა და ალექსანდრ გაცკანის (როსტოვი, რუსეთი) იმედად რჩება. დანარჩენები მოლდოვის (ერთი ლიტვის) სუსტ ჩემპიონატში მოთამაშე ფეხბურთელები არიან.
მოლდოვის ნაკრები ამჟამად მსოფლიო რეიტინგში 173-ე პოზიციაზეა, რაც 51 საფეხურით უარესია საქართველოს რეიტინგზე. მოლდოვამ ბოლოს მარტში მოიგო ამხანაგური მატჩი ანდორასთან (0:1).
ოფიციალურ მატჩში მოლდოვამ ბოლოს 2013 წლის ოქტომბერში მოიგო! მას მერე მოლდოვამ ორის გარდა ყველა ოფიციალური მატჩი წააგო (ფრეები რუსეთთან და ლიხტენშტაინთან).
აი, ასეთი ნაკრები ითამაშებს თბილისში და თანაც განახევრებული შემადგენლობით.
