გამოხმაურება: ქარიშხალი ჭიქაში, ანუ აურზაური ნაკრების კაპიტნის გამო...

AutoSharing Option
ცხოვრებამ ასე მოიტანა: გვინდა თუ არა, დღეს "ფეისბუქი" მძლავრი საშუალებაა ყველა იდეისა თუ წამოწყების, აზრისა თუ ჩანაფიქრის რეკლამისა და "გაპიარებისთვის". ასეა დღეს და ასე იქნება მანამ, სანამ ვიღაც უკეთეს საშუალებას არ მოიგონებს იდეებით მდიდარ ჩვენს დროში.

დღეს უნდა შევეხოთ თემას, რომელიც ძალიან აქტუალურია. სხვანაირად რომ ვთქვათ, დრო აღარ ითმენს და იმათ, ვინც ის კამპანია წამოიწყო, რომელზეც ახლა უნდა დავწეროთ, სერიოზული დაფიქრება მართებთ.

...ბოლო ორი-სამი დღის განმავლობაში "ფეისბუქის" საკუთარ გვერდს უსიამოვნო მოლოდინით ვხსნიდი და ვხსნი. ჟურნალისტი ყოველთვის მზად უნდა იყოს კრიტიკის
მოსასმენად და მისაღებად. ასე ვარ მეც. ნეტავ, ვინმეს გავეკრიტიკებინე.

რამდენიმე ჯგუფი მთავაზობდა და მთავაზობს, მონაწილეობა მივიღო გამოკითხვაში, რომლის მიზანიცაა, გაარკვიოს, ვინ იქნება უკეთესი კაპიტანი საქართველოს ნაკრებისთვის - ჯაბა კანკავა თუ გურამ კაშია?

რა თქმა უნდა, ამ პროვოკაციულ გამოკითხვაში მონაწილეობა არ მიმიღია, თუმცა ჩვენი საზოგადოების მოზრდილმა ნაწილმა კი დააფიქსირა საკუთარი პოზიცია. სანამ მთავარზე გადავიდოდე, უნდა ვთქვათ: ვინც ეს კამპანია წამოიწყო, მისი მიზანია საქართველოს ნაკრებში განხეთქილების შეტანა და მას ეს არამც და არამც არ უნდა გამოუვიდეს.

ჩვენ ვერა და ვერ გავიგეთ, რომ როცა საქართველოს ნაკრებს ეხება საქმე, ძალიან ფრთხილად უნდა ვიყოთ, რადგან ეს ეხება ქვეყანასაც. ცოდვა გამხელილი სჯობს და, ეს ბევრმა ფეხბურთელმა არ იცის ბოლომდე და ჩვენ კი ჩვენსას ვამატებთ.

ახლა ზამთარია. სანაკრებო ასპარეზზე სიჩუმეა. საქართველოს ნაკრებს მოლდოვასთან მატჩი ვერ გამოუვიდა ისეთი, როგორსაც ველოდით. როგორც ჩანს, მავანმა სიტუაცია მომწიფებულად ჩათვალა იმისთვის, რომ თავისი მზაკვრული აზრებისთვის გასაქანი მიეცა.

ამ დროს კი დუმილი უბრალოდ დანაშაულია და, რა თქმა უნდა, არც ჩვენ ვაპირებთ, რაკი მედია მხოლოდ მომხდარი ფაქტების აღნუსხვით ვერ შემოიფარგლება - მან კარგ თუ ცუდ ტენდენციებზე, მოსალოდნელ სიკეთეებსა და საფრთხეებზეც უნდა წეროს...

საქართველოს ეროვნულ ნაკრებს ჰყავს ღირსეული კაპიტანი და ეყოლება მანამ, სანამ გუნდის მთავარი მწვრთნელი, ნაკრების ფეხბურთელები ან თავად ჯაბა კანკავა არ ჩათვლიან საჭიროდ, რომ სხვანაირად უნდა იყოს.

მოგეხსენებათ, კანკავამ საქართველოს ნაკრების რამდენიმე მატჩი გამოტოვა ჯანმრთელობის მდგომარეობის გამო. როგორც ჩანს, ქართული ფეხბურთის ავის მოსურნეების წისქვილზე წყალი ამანაც დაასხა. ვინც ჯაბას იცნობს, იცის: მას თავის დაზოგვა არ სჩვევია. კლუბში იქნება თუ ნაკრებში, ის ყოველთვის ბოლომდე იბრძვის და მინდორზე მაქსიმუმს დებს.

შეუძლოდ ყოფნის უფლება კი ყველა ადამიანს აქვს და, მათ შორის, ჯაბა კანკავასაც. სხვისი არ ვიცი და, მის საუკეთესო ადამიანურ თვისებებში დარწმუნებული, ერთხელაც მივესალმე მის პოზიციას - ბოლომდე კარგად ვერ ვგრძნობ თავს და სანამ 100 პროცენტით არ ვიქნები მზად, მანამდე ეროვნულ გუნდში სათამაშოდ არ ჩამოვალ, ქვეყნის მთავარ გუნდს ამას არ ვაკადრებო...

- "ნაკრებში თამაში დიდი პასუხისმგებლობაა, ასეთ ფორმაში მყოფი მოედანზე ვერ გავალ"

ეს რომ გულწრფელი სიტყვები იყო, მალევე დადასტურდა - კანკავა მინდორზე მოლდოვის ნაკრებთან მატჩში გამოჩნდა. მისი პოზიცია და გულწრფელობა კი ორმაგად დასაფასებელი გახდა. განა, ბევრი ქართველი ფეხბურთელი დაიკავებს ასეთ პოზიციას? ნაკრებში თამაშების რაოდენობა ხომ (პირდაპირ თუ ირიბად) უკეთეს კლუბში კარიერის გაგრძელების წინაპირობაა...

კიდევ ერთი: დარწმუნებული ვარ, პირველი ამ კამპანიას გურამ კაშია ემიჯნება, ვინც კანკავას არყოფნაში ღირსეულად უკაპიტნა საქართველოს ნაკრებს. კაშია ისეთი პიროვნებაა, იმხელა შეგნების პროფესიონალია, ვერც კი წარმომიდგენია, სხვანაირად ფიქრობდეს.

საერთოდ, როცა საქმე ეროვნული ან ნებისმიერი გუნდის კაპიტნის არჩევას ეხება, გასათვალისწინებელია მხოლოდ მწვრთნელის და ფეხბურთელების აზრი. ცხადია, მნიშვნელოვანია საზოგადოებრივი აზრიც, მაგრამ არა - გადამწყვეტი.

საქართველოს ნაკრების არცერთი ფეხბურთელისგან არასოდეს, თუნდაც არაფორმალურ საუბარში, არ გამიგია, რომ კანკავა არ არის ღირსეული კაპიტანი. მერწმუნეთ, ვინმე ასე რომ ფიქრობდეს, ინფორმაცია აუცილებლად გამოჟონავდა...

ქართულ ფეხბურთს ისედაც არ აკლია პრობლემები და ვფიქრობთ, არ არის საჭირო ჭიქაში ქარიშხლის გამოწვევა მაშინ, როცა ამის არანაირი საფუძველი არ არსებობს. ცდება ის, ვინც ამ კამპანიას მხოლოდ კანკავას წინააღმდეგ აგორებულ "პიარად" მიიჩნევს.

ეს არის საქართველოს ნაკრებისა და ქართული ფეხბურთის წინააღმდეგ მიზანმიმართულად აგორებული ტალღა და ძალიან კარგი იქნება, თუ ის არამკითხე მოამბეები, ვინც ეს აჟიოტაჟი ხელოვნურად გამოიწვია, არ ჩაყოფენ ცხვირს იქ, სადაც მათი ადგილი არ არის.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 13 /
ეს ყველაფერი არის დაბალი ცოდნის მანიშნებელი გულშემატკივრებში და საერთოდ ყველა სფეროში ასეა. უცოდინარი ხალხითაა სავსე მთელი ქვეყანა. ,,ძაღლს რა ჰქონდა ბუზს გაჰქონდაო" ასეა ეს ყველაფერი. ჯერ რა არის გასაყოფი და დასაპირისპირებელი ის ვერ გამიგია?! ამ ბოლო დროს იმედები ჩაგვესახა ჩვენი ნაკრების თამაშებით,მარა საერთო მდგომარეობით ხომ ჩვენ ფეხბურთი არ გვაქვს საბჭოეთის დაშლიდან მოყოლებული. რას იყოფენ რა კაპიტანი რის კაპიტანი. ეს ყველაფერი პაკაზუხა ხალხის მოგონილია ყველაფერი. იმის არ იყოს ელ-კლასიკოდ,რომ ნათლავენ ,, დინამო-ტორპედოს თამაშს" სირცხვილი არ არის ასეთი რამ როგორ უნდა მოგივიდეს თავში.ან გლადიატორებიო და რეებს აღარ იგონებენ. თქვე კაი ხალხო რაც არ არის რას ფანტაზიორობთ. ჯერ იმდენი ქენით,რომ მინდორზე ფეხბურთელი ნახოთ გაქცეული და მერე დაარქვით სახელები. მეტიჩრობა გვღუპავს ჩვენ ყოველთვის და ამპარტავნება.ერთმანეთს თავ-პირს უმტვრევენ გულშემატკივრებს უწოდებენ საკუთარ თავს,ვაი თქვენს პატრონს. სადღაც უნახიათ კინოში,თურმე როგორი უნდა იყოს ,,ბალეშჩიკი" ლივერპულის ფანები და მსგავსი. ნეტა ვინმე მანახა აქ ევროპული დონის მოთამაშე მინდორზე და ფეხებს დავუკოცნი.სადაურიც არ უნდა იყოს და რომელ გუნდშიც არ უნდა თამაშობდეს. ეგეთი რამე მარაზმი კი არა გულის ამრევია,ასეთი აზროვნების ხალხი. რაც არ არის იმის ქომაგებად მოაქვთ თავი და სტუმარ მასპიძელს თავ-პირს უმტვრევენ. ქვით მანტიროვკით და ასე შემდეგ. რა კაპიტანი რის კაპიტანი. ჯერ მივიდეს იქამდე ნაკრები,რომ საპატიო იყოს მართლა მისი წევრობაც და ქომაგობაც და აი ყველაფერი,რომ უმაღლეს საფეხურზე იქნება,მერე დაჯექით და გაარკვიეთ თუ ასე ძალიან გინდათ ვინ უნდა იყოს კაპიტანი და ვინ არა. საშინელებაა ეს ყველაფერი.
oto777
06 დეკემბერი 2016 18:09
0
Es gundis da phekhburtelebis asarchevia da ara khalkhis, qomagma unda uqomagos Gunda da ara uuphrosos!!
David
06 დეკემბერი 2016 18:02
0
საზიზღრობაა ამ თემის წამოწევა,მითუმეტეს რო არც წესიერი ნაკრები გვყავს და არც ძლიერი ფეხბურთელები,სხვა საფიქრალი არაფერია ვითომ-ნაცვლად იმისა რო ფეხბურთელებმა და ყველამ იფიქრონ იმაზე--თუ როგორ გააუმჯობესონ თამასი--აქ არებმიცემობა და შეკვეთილი სტატიები გააშანშალეს,სულაც არ მაინტერესებს ვინ იქნება კაპიტანი-ოღონდ გუნდმა ისწავლოს ფეხბურტი,ეგ აინტერესებს იმას ვისაც უნდა რო კაპიტნად დარჩეს ან აირჩიონ.დაბლოკეთ თქვენ იცით--არ გაუშვათ ეს კომენტარი
Malkhaz
06 დეკემბერი 2016 17:54
0

ასევე დაგაინტერესებთ
სიახლეები პოპულარული