ოთარ ხიზანეიშვილი: სუფთა ვარ და ყველაფერს კანონიერად, ფუტსალისთვის ვაკეთებ

საქართველოს ფუტსალის ასოციაციის პრეზიდენტმა ოთარ ხიზანეიშვილმა Sportall.ge-სთან იმ პრობლემებზე ისაუბრა, რომლებიც მას ასოციაციაში მოსვლისთანავე დახვდა. გარდა ამისა, ასოციაციის პრეზიდენტმა სამომავლო გეგმებიც გაგვიმხილა.

- მოდი, ყველაფერი თავიდან დავიწყოთ. რა სახის პრობლემები დაგხგდა ასოციაციაში, რა გაკეთდა და რა იგეგმება უახლოეს მომავალში?
- პრობლემები იყო, მაგრამ ყველაფერი დალაგდა. აღარ არის არეულობა - ერთი ორგანიზმივით ვმუშაობთ. ყველანი ერთ დონეზე ვართ და თავს არავისზე მაღლა არ ვაყენებ. უბრალოდ, მიყვარს ფეხბურთი, ვხედავდი, რომ სპორტის ამ სახეობაში ძალიან დიდი არეულობა იყო და ის ერთსულოვნება, რომელიც ამ პატარა წრეშია საჭირო, წლების განმავლობაში აღარ იყო.

დიდი სურვილი მაქვს, რომ დაძაბულობა ერთხელ და სამუდამოდ დასრულდეს, ფუტსალი კი წინ წავიდეს და განვითარდეს.

რამდენიმე დღის წინ 2-წლიანი პროგრამა წარვადგინეთ, რომელიც მალე საზოგადოებისთვისაც სრულად იქნება ცნობილი. ამ პროგრამის მიზანი ფუტსალის მასობრიობაა.

ერთ-ერთი ნაწილი სკოლებს ეხება, რაშიც განათლების სამინისტრო ძალიან გვეხმარება. მოვიკითხეთ სკოლებში და მართალია, ფიზკულტურის გაკვეთილები ტარდება, მაგრამ ფეხბურთს დიდი ყურადღება არ ექცევა. ჩვენი სურვილია, უკვე მე-6 კლასიდან სკოლებში ვასწავლოთ ბავშვებს ფუტსალის ელემენტები... ეს იმას არ ნიშნავს, რომ ბავშვმა მომავალშიც აუცილებლად ფუტსალი უნდა ითამაშოს - ბევრ დიდ ფეხბურთელს სწორედ აქედან დაუწყია დიდი ფეხბურთის თამაში და ჩემი გუნდის ამოცანაც სწორედ ესაა, რომ რაც შეიძლება მეტი ბავშვი დაკავდეს და ისწავლოს ის, რაც მომავალში აუცილებლად გამოადგება.

ძალიან დიდ პოტენციალს ვხედავ და დარწმუნებული ვარ, ეს პროექტი არა მხოლოდ თბილისში, არამედ რეგიონებშიც გაამართლებს, რადგან არის ამის სურვილი და მოთხოვნა. ეს ყველაფერი სტარტს ახალი სასწავლო წლიდან აიღებს. ასევე მოხდება მასწავლებლების გადამზადებაც.

გარდა ამისა, გვსურს ჩამოვაყალიბოთ 17, 19 და 21-წლამდელთა ნაკრებები, რათა ეროვნულ ნაკრებს ჰქონდეს კარგი შევსება. ეროვნულში მოთამაშე ფეხბურთელებიდან დღეს რამდენიმე უკვე ასაკშია და ნაკრები შევსებას საჭიროებს.

გვსურს მწვრთნელთა გადამზადებაც, რომ რამდენიმე კვალიფიური სპეციალისტი გვყავდეს. ეს წაადგება როგორც ნაკრებს, ისე ჩემპიონატს. უკრაინელებთან და ყაზახებთან ვმეგობრობთ ამ კუთხით და უახლოეს პერიოდში უკრაინელები ჩამოვლენ და მწვრთნელებისთვის სემინარებს ჩაატარებენ.

- ადრეც ვთქვი და ახლაც ვამბობ: მზად ვარ, ყველა ადამიანთან ვითანამშრომლო, ვინც ფუტსალს მხარში დაუდგება და წინ წასწევს. იმავეს თქმა შემიძლია ბექა კვიციანზე. ამ დღეებში სასამართლო იყო, გვედავებოდნენ რაღაცაზე, მაგრამ სიმართლე გითხრათ, არც კი ვიცი, რა თემებთან დაკავშირებით - არ ჩავრეულვარ.

კვიციანს პირადად შევხვდი. ვიცოდი, რომ აქვს ფუტსალში რაღაც გაკეთებული, წვლილი მიუძღვნის ამ სფეროში, მაგრამ როგორც გავიგე, "შავ პიარს" მიკეთებს. ამას ყურადღებას არ ვაქცევ. თუ ადამიანს ჩემი რამე არ მოსწონს, მოვიდეს და მითხრას. არ ვარ ის ადამიანი, რომელიც ვინმეს მიწას წერილობით გაუთხრის, მით უმეტეს, მაშინ, როცა ადამიანი ამის ღირსი არ არის. საერთოდ, არც ვიცი რაზე დავობენ.

მსურს საქმე გამჭირვალედ ვაკეთო, ხოლო ვინ რას წერს და ვის რა აქვს ჩემი საწინააღმდეგო, არ ვიცი.

კიდევ ერთხელ ვიმეორებ: თუ ვინმეს რომელიმე თემაზე საუბარი სურს, მზად ვარ მოვუსმინო, თუნდაც ჟურნალისტების და თუნდაც მთელი საზოგადოების თანდასწრებით. მოვედი, სუფთა ვარ, ყველაფერს კანონიერად ვაკეთებ, რათა ჩემი საქმიანობა წაადგეს ქართულ ფუტსალს.

საერთოდ, ქართველების უარყოფითი მხარეა ეს - ერთმანეთთან დავა გვიყვარს. არ უნდა იყოს ასე. მოდით, ვისაც გესმით ეს სპორტი, დავსხდეთ, ვისაუბროთ, გვერდში დავუდგეთ ერთმანეთს და საერთო გზა გამოვნახოთ...

- საუბარი იყო მსოფლიოს ჩემპიონატის მასპინძლობაზე. იგეგმება სამისოდ მუშაობა თუ საბოლოოდ, უარი ითქვა?
- მსგავსი ღონისძიების ჩატარება სახელმწიფოსა და სფფ-ის დახმარების გარეშე არ გამოვა. განაცხადი შეტანილი გვაქვს და ვნახოთ... სახელმწიფოს უარი არ უთქვამს ამაზე და დღის წესრიგში კვლავაც არის ეს თემა.

გამომდინარე იქიდან, რომ პოტენციალი არის ჩვენს ქვეყანაში, რამდენიმე დარბაზიცაა, სავსებით შესაძლებელია ვუმასპინძლოთ ამ ტურნირს. ყოველ შემთხვევაში, ჩვენ უარს არ ვაცხადებთ.

- დასრულდა საქართველოს ფუტსალის მორიგი ჩემპიონატი. როგორ შეაფასებდით ჩემპიონატს?
- მოდით, ჯერ გამარჯვებულ გუნდ თსუ-ზე ვიტყვი. დავესწარი რამდენიმე მატჩს, ვნახე მათი თამაშები - ძალიან კარგი და ორგანიზებული გუნდია. წლებია ისინი ამ დონეზე თამაშობენ და სწორი მენეჯმენტის, სწორი მართვის და ერთად შეკრულობის დამსახურებაა ეს ყველაფერი. რამდენიმე ფეხბურთელი რომ დაიმატონ ევროტურნირებისთვის, არ იქნება ცუდი.

გუნდის უფროსს როცა ვესაუბრე, მივხვდი, რომ ამ ადამიანს ძალიან დიდი სურვილი აქვს, განვითარდეს ფუტსალი. ამ გუნდს აქვს პოტენციალი, ჩემპიონთა ლიგაზე კარგად იასპარეზოს.

თხოვნა იყო გუნდიდან, რომ პირველ 4 მატჩს თბილისმა უმასპინძლოს და ეს თხოვნა გავითვალისწინე, ვესაუბრე სფფ-ს და ვნახოთ, გამოვა თუ არა პირველი სტადიის ჩატარება საქართველოს დედაქალაქში.

მომწონს ასევე "თელასიც". ნუ ეწყინებათ სხვა გუნდის წარმომადგენლებსა და ფეხბურთელებს, მაგრამ ძირითადად ეს ორი გუნდია. სხვებთანაც ვიმეგობრებ, მოვუსმენ, უბრალოდ, მსურს ძლიერი ჩემპიონატი გვქონდეს.

ბოლო ჩემპიონატი, ორგანიზებულობის კუთხით, ძალიან კარგი იყო, მაგრამ დონეს რაც შეეხება, ძალიან დაბალია, რადგან კლუბები არ გვყავს. უნდა გაძლიერდნენ კლუბები, ინტერესი უნდა გაჩნდეს... არ შეიძლება გუნდები აგებდნენ 15-0-ს... უნდა მოიხსნას "მე" მიდგომა, ვაქციოთ "ჩვენ"-ად და მერე გვექნება ძალიან ძლიერი ჩემპიონატი, ჩემპიონი გუნდი კი უფრო ძლიერი იქნება და ევროტურნირებზე გვასახელებს.

ფუტსალის ოჯახი პატარაა და მარტივად გასაკეთებელია ეს, თუ ერთიანობა და ერთსულოვნება იქნება.

- გაიმართა 16-წლამდელთა ჩემპიონატიც...
- 52-მა სკოლამ გამოთქვა ამ ტურნირში მონაწილეობის სურვილი და დაახლოებით 650-მდე ბავშვმა მიიღო მონაწილეობა. ტურნირი მომეწონა, კარგად ჩაიარა, რამდენიმე ბავშვი ძალიან მომეწონა კიდეც, მათი ნომრები ჩავიწერე და მსურს, რამდენიმე გუნდში მივიყვანო, თუნდაც გასასინჯად. დიდი ფეხბურთისკენ ისწრაფვიან და არ ვარ წინაღმდეგი, პირიქით, მსურს ხელი შევუწყო.

მგონია, შემდეგ წელს უფრო მეტი სკოლა გამოიჩენს სურვილს - ნაკრების შევსება აქედანაც წამოვა. რა თქმა უნდა, ეს რეგიონებშიც იქნება. ვიყავით სამტრედიაში, მოვინახულეთ უნარშეზღუდული ბავშვები, ჩამოვიყვანეთ ისინი აქ, ვეტერანებთან ვათამაშეთ და ერთი ლამაზი დღე ვაჩუქეთ. პანკისიდან გვსურს ახლა კიდევ ბავშვების ჩამოყვანა და იგივენაირად ვეტერან ფეხბურთელებთან ამხანაგური მატჩი გავმართოთ.

- გამგეობაში დავით სირაძე შემოვიდა, რომელიც პროფესიონალია, ძალიან უყვარს ფეხბურთი. ამიტომ მის აზრებს ყოველთვის ვითვალისწინებ და მომავალშიც გავითვალისწინებ. ვიცე-პრეზიდენტი ზურაბ აბზიანიძეა, რომელიც, მსგავსად სირაძისა, პროფესიონალი და ძალიან მონდომებული ადამიანია.

აუცილებლად ვაპირებ გამგეობის გაზრდას, უბრალოდ, ჯერ წესდების შეცვლა მსურს. გადავხედე მას და რაღაც-რაღაცები არ მომწონს. უახლოესი 1 თვის მანძილზე შეიცვლება ის და იქნება სფფ-ის მსგავსად, რადგან მათი წესდება ძალიან მომწონს.

მსურს ნაკრებიდან და რეგიონებიდანაც შემოვიყვანო გამგეობაში რამდენიმე სუბიექტი...

განვითარების პროგრამას უახლოეს დღეებში სფფ-საც წარვუდგენთ. მოგეხსენებათ, მათ მძიმე დრო უდგათ, დიდი ვალები აქვთ, მაგრამ ასევე მინდა გითხრათ, რომ მქონდა მათთან საუბარი და დახმარება იქნება.

მალე გაირკვევა, თუ როგორ და რამდენით დაგვეხმარებიან... ჩვენ მათი წევრი ვართ და თუ სფფ თავის წევრს არ დაეხმარა, ისე არაფერი გამოვა.

პარალელურად, ვეძებ სპონსორებს. ფუტსალის მიხედვა დიდ თანხებთან არაა დაკავშირებული. გვსურს, სფფ-სთან ერთად, სპონსორმაც ჩადოს თანხა და აუცილებლად გამოვა რამე.