ლაშა სალუქვაძე: ჯერ ბოლომდე ფორმაში არა ვარ

ბაქოს "ინტერის" ოფიციალურმა ვებგვერდმა გამოაქვეყნა ინტერვიუ გუნდის 31 წლის ლეგიონერ ლაშა სალუქვაძესთან.

შეგახსენებთ, რომ ლაშამ კახა ცხადაძის გუნდთან ივლისში 2-წლიანი ხელშეკრულება გააფორმა.

მანამდე სალუქვაძეს თბილისის "ლოკომოტივში", "დინამოში", ყაზანის "რუბინში", "ვოლგაში", გორის "დილასა" და ხაბაროვსკის "სკა-ენერგიაში" უთამაშია.

ქართველმა მცველმა საიტს "ბაქისთან" დერბის (2:2) პერიპეტიები გაანდო და უპასუხა სხვა შეკითხვებსაც.

- "ბაქისთან" თამაში საკმაოდ საინტერესო და რთული გამოდგა. საინტერესოა თქვენი მოსაზრებაც.
- კარგად ვიცოდით, რომ ამ თამაშის წაგება აღარ შეიძლებოდა. გუნდი ბოლო ადგილზე იყო, ქულების დაგროვება უნდა დაგვეწყო. მსაჯობაზე ლაპარაკი არ მიყვარს, მაგრამ მომიწევს, რადგან ჩვენს კარში პენალტი სულ ტყუილად დაინიშნა. ასევე, აღსანიშნავია ეპიზოდი, როცა მეტოქემ წესი დაარღვია და მერე გოლი გაგვიტანა. ასეა თუ ისე, მატჩი ძალიან საბრძოლო გამოვიდა. დიდი ხანი მეტოქე იყო წინ, მაგრამ თამაში გადავარჩინეთ, ბოლოს კი წინ გასვლაც შეგვეძლო.

- მეორე გოლის შემთხვევა მართლაც საორჭოფოა, გვერდითი მსაჯი ანიშნებდა, რომ წესი "ბაქიმ" დაარღვია, ბურთი არბიტრმა კი მეტოქეს მისცა...
- დიახ, ასე იყო - გვერდითმა მსაჯმა კარგად დაინახა, რომ ჩემზე წესი დაარღვიეს, მაგრამ მთავარმა მსაჯმა, რომელიც გაცილებით შორს იყო ეპიზოდიდან, მე დამადანაშაულა. ახლაც კი ვერ ვხვდები, რატომ მოიქცა რეფერი ასე.

- სხვათა შორის, ეს თქვენი პირველი თამაში იყო ტრავმის მერე, რომელიც I ტურში მიიღეთ...
- ვაღიარებ, რომ გამიჭირდა. მე ჯერ კიდევ არ ვარ სათანადო ფორმაში. თამაშის დროს ტკივილს ვგრძნობდი, რამდენჯერმე ამის გამო შევცდი კიდევაც, თუნდაც, თამაშის ბოლოს. ვიმედოვნებ, რომ შემდეგ მატჩებში თავს უკეთ ვიგრძნობ და უკეთ ვითამაშებ.

- კახა ცხადაძემ სამი ცენტრალური მცველით ითამაშა. მოგწონთ ეს სისტემა?
- ცოტა უცხო იყო ჩემთვის. ჩვენ ჯერ კიდევ არ ვართ 100%-ით შეთამაშებულები. შემდეგ მატჩებში ნამდვილად უკეთ ვითამაშებთ. მწვრთნელმა ყველაფერი უკეთ იცის; რადგან ასე გადაწყვიტა, ესე იგი, ასე იყო საჭირო.

- "ინტერს" სტარტი ჩაუვარდა. შეძლებს გუნდი მდგომარეობიდან გამოსვლას და მაღალი მიზნებისთვის ბრძოლას?
- ჩვენ აუცილებლად გამოვალთ ამ რთული სიტუაციიდან. "ინტერი" მუდამ მაღალი მიზნებისთვის იბრძოდა. ასე იქნება შემდეგშიც. ასეთი უიღბლო სერიებისგან არც ერთი კლუბი არ არის დაზღვეული. ჩვენ კიდევ გავახარებთ გულშემატკივრებს.



ასევე იხილეთ:
ლაშა სალუქვაძეს ტრავმა აქვს და სამედიცინო შემოწმებას გაივლის
ლაშა სალუქვაძე - ჩინებული კარიერა და ახალი გამოწვევა
ლაშა სალუქვაძე კარიერას ბაქოს "ინტერში" გააგრძელებს