ლეგიონი: თორნიკე ოქრიაშვილმა "ჩერნომორეცის" მაისურით გაიტანა [VIDEO]

სიახლეები ქართველ ლეგიონერებზე ჯერჯერობით ისევ მწირია - ჩვენებურთა უმრავლესობა ხომ ისეთ ქვეყნებში თამაშობს (რუსეთი, უკრაინა), სადაც ჩემპიონატები კიდევ კარგა ხანს არ განახლდება.

ჩვენთვის მთავარი მოვლენა "ვიტესის" პირველი გამარჯვება იყო 2014 წლის პირველივე მატჩში.

აღმოჩნდება თუ არა "ზვოლესთან" შეხვედრა უკანასკნელი გიორგი ჭანტურიას ჰოლანდიურ კარიერაში, სულ მალე შევიტყობთ.

კაშიას მწარე გამარჯვება
არნემის "ვიტესი", სადაც ერთბაშად სამი ქართველი ფეხბურთელი ასპარეზობს, ზამთრის პაუზისას საკმაოდ გაძლიერდა, შესანიშნავი შეკრება გაატარა აბუ დაბიში და ჰოლანდიის ჩემპიონატსაც გამარჯვებით დაუბრუნდა - 2:1.

"ვიტესმა" სტუმრად ბოლო წამებზე გატანილი გოლის წყალობით იმარჯვა. აღსანიშნავია, რომ გურამ კაშიამ შეუცვლელად ითამაშა. მეორე ტაიმში მან ყვითელი ბარათი მიიღო, რის გამოც მომავალ ტურს გამოტოვებს. არადა, მომდევნო უქმეებზე "ვიტესს" დერბი ელის "ნაიმეგენთან"...

გიორგი ჭანტურია სასტარტოში, ცენტრფორვარდის პოზიციაზე თამაშობდა. ის ერთადერთი ფეხბურთელი იყო, რომელიც პეტერ ბოშმა შეცვალა - 64-ე წუთზე ახალწვეული ზაქარია ლაბიადით ჩაანაცვლა.

არ გამოვრიცხავთ, რომ ეს ჭანტურიას ბოლო მატჩი იყოს "ვიტესის" მაისურით. ის შეიძლება "ბოლონიაში" გადავიდეს. რაც შეეხება ვალერი ყაზაიშვილს, ის სათადარიგო იყო.

მოგების მიუხედავად, კაშიას დანა პირს არ უხსნიდა: "ძალიან გულდაწყვეტილი ვარ. დერბი უნდა გამოვტოვო - ეს ჩემთვის დიდი სტრესია. მეორე მხრივ, ძალიან მიხარია, რომ მოვიგეთ. ეს პირველად არ ხდება, რომ გამარჯვება ბოლო წუთზე მოვიპოვეთ. ადრეც ვიმსახურებდით ხოლმე მოგებას, ახლა კი ცოტა გაგვიმართლა".

ვინაიდან კვირას "აიაქსმაც" იმარჯვა (პსვ დაამარცხა), "ვიტესი" ისევ მეორეა, თუმცა, ამსტერდამული გრანდის დარად, 40 ქულა აქვს.

გრიგალაშვილის საგოლე პასი
შოთა გრიგალაშვილის "ანორთოსისმა" სეზონის საუკეთესო მატჩი ითამაშა - "დოხა" სტუმრად 6:1 დაამარცხა. ჩვენებური 66-ე წუთზე შეცვალეს. მანამდე, 53-ე წუთზე, მან საგოლე პასი გააკეთა.

"შუთ ენდ გოლმა" გრიგალაშვილი მატჩის სამ საუკეთესო ფეხბურთელს შორის დაასახელა.

"აკადემიკასთან" საგარეო მატჩში ავთო ებრალიძე კვლავ არ იყო "ჟილ ვისენტეს" სასტარტო შემადგენლობაში. ის 78-ე წუთზე გამოჩნდა. ზედ საფინალო სასტვენის წინ კი "ჟილ ვისენტემ" გოლი გაუშვა და დამარცხდა - 0:1.

საკონტროლო მატჩები
აგდამის "ყარაბაღმა" ტრავმირებული ნიკოლოზ გელაშვილის გარეშე 1:0 მოუგო ბუქარესტის "დინამოს". საბედნიეროდ, ქართველი ფორვარდის კოჭის ტრავმა არ აღმოჩნდა ისეთი მძიმე, როგორც თავიდან ეგონათ - გელაშვილმა 10 დღე უნდა დაისვენოს.

* * *
ყაზანის "რუბინმა" "ქაისერი ერჯიესს" 2:0 მოუგო. საბა კვირკველია "რუბინის" სასტარტო შემადგენლობაში იყო.

* * *
შოთა არველაძის "ქასიმფაშა" გერმანულ "ჰოფენჰაიმთან" 1:4 დამარცხდა.

* * *
უკრაინული "დნიპრო" "ბაქის" დაუზავდა - 0:0. "დნიპროს" რიგებში პირველი ტაიმი სრულად ითამაშეს უჩა ლობჟანიძემ და სანდრო კობახიძემ, მეორე ტაიმი - ჯაბა კანკავამ.

* * *
გიორგი ჩიხრაძის "სიმურგმა" 1:0 მოუგო გერმანული რეგიონალლიგის "ფელბერტს".

* * *
ლევან ყენიას "ფორტუნა" Winter Cup-ზე "ლევერკუზენთან" 0:4 შერცხვა, მეორე დღეს კი 1:1 ეთამაშა "ბრაუნშვაიგს" და პენალტების სერიაში დამარცხდა. ქართველს არ უთამაშია.

* * *
ბაქოს "ინტერი" ყაზახეთის ჩემპიონ "აქტობეს" დაუზავდა - 1:1. ბაქოელთაგან გოლი ალექსანდრე იაშვილმა გაიტანა. კახა ცხადაძის გუნდში ოთხივე ქართველმა სასტარტოში ითამაშა.


* * *
რუსულმა "მორდოვიამ" ყაზახური "ტობოლი" 2:1 დაამარცხა. გამარჯვებულთა რიგებში პირველი ტაიმი ითამაშა აკაკი ხუბუტიამ, რომელსაც ერთი აშკარა საგოლე მომენტიც ჰქონდა - მისი თავური სანტიმეტრებში ასცდა ყაზახთა კარს.

* * *
ისრაელში შეკრებაზე მყოფმა "სკა ენერგიამ" იქაურ "ირონისთან" 1:2 წააგო. რუსული გუნდის რიგებში გიორგი ნავალოვსკი 61-ე წუთიდან გამოჩნდა.

* * *
19 იანვარს "სევასტოპოლი" თურქულ შეკრებაზე გაემგზავრა. გუნდთან ერთადაა ჩვენებური მცველი მათე ღვინიანიძეც.

* * *
ლადო დვალიშვილის "ლეგია" 1:3 დამარცხდა "ტომთან". საქართველოს ნაკრების ფორვარდმა სასტარტოში ითამაშა.

* * *
დებიუტიც ასეთი უნდა - თორნიკე ოქრიაშვილი ახლახან შეუერთდა სიდეში მყოფი ოდესის "ჩერნომორეცის" საწვრთნელ შეკრებას და პირველივე საკონტროლო თამაშში ალბანურ "კუკესს" გოლიც გაუტანა. თორნიკე მოედანზე 65-ე წუთზე გამოჩნდა და შეხვედრას წერტილი 77-ე წუთზე დაუსვა - ანგარიში 4:1 გახადა.

სხვათა შორის, ოდესელთა დირექტორის თქმით, ქართველ ფეხბურთელთან ხელშეკრულება ჯერ არ გაფორმებულა.


* * *
"კრილია სოვეტოვი" ყარაღანდის "შახტიორს" დაუზავდა - 1:1. ალეკო ამისულაშვილმა რუსული გუნდის შემადგენლობაში პირველი ტაიმი ითამაშა.

ყოველდღიური სპორტული გაზეთი "ლელო"