გიორგი ჭანტურია: "კლუჟიდან" მივდივარ, ბევრი კარგი შემოთავაზება მაქვს!

საქართველოს ეროვნული ნაკრების შემტევმა გიორგი ჭანტურიამ რუმინეთის თასის გათამაშების მეოთხედფინალში შორეული დარტყმით გაიტანა და სოლიდური წვლილი შეიტანა ქვედალიგელი "მიოვენის" სტუმრად დამარცხებაში (4:3), მაშინ, როცა ქართველი შემტევის გუნდი 61-ე წუთამდე 0:3-ს აგებდა.

3 დეკემბერს ჭანტურიას რუმინეთში შევეხმიანეთ. ცხადია, თავდაპირველად საუბარი "მიოვენთან" მატჩით დავიწყეთ, მერე კი უფრო საინტერესო თემას გადავწვდით.

- რთული თამაში გამოვიდა, - გვითხრა ჭანტურიამ საუბრის დასაწყისში, - მეტოქეს სამი ბურთით ჩამოვრჩით. თან მძიმე კლიმატური პირობები იყო, თოვლიანი მოედანი... გახარებული ვარ, რომ მოვიგეთ და ამაში ჩემი წვლილიც შევიტანე - გოლი გავიტანე და საგოლე პასიც გავაკეთე.

- ეს გასაგებია, მაგრამ "კლუჟზე" ცალკე უნდა გკითხოთ. როგორც წერენ, კლუბს ფინანსურად არ ულხინს. სწორედ ამიტომ წავიდა "დიორში" მთავარი მწვრთნელი ვასილე მირიუცა...
- "კლუჟში" მართლაც მძიმე ფინანსური პრობლემებია. იანვარში ნახევარ გუნდზე მეტი წავა, მათ შორის - მეც.

- სად შეიძლება გააგრძელოთ კარიერა?
- ჯერ არ ვიცი, სად გავაგრძელებ თამაშს. მაქვს შემოთავაზებები და ჩემს ოჯახთან ერთად ავირჩევ საუკეთესო ვარიანტს.

- რა ხდება "ვერონასთან" დაკავშირებით?
- ჩემი და "ვერონას" ამბავი არ არის გარკვეული. ოფიციალურად ხელი არაფერზე მომიწერია, მხოლოდ ორმხრივი სიტყვიერი შეთანხმება გვაქვს. ვნახოთ, რა და როგორ იქნება. ჯერ არის დრო და გადაწყვეტილების მიღებას არ ვჩქარობ.

ერთს კი დანამდვილებით გეტყვით: ძალიან ბევრი კარგი შემოთავაზება მაქვს სხვადასხვა ქვეყნიდან. დანარჩენს მომავალი გვიჩვენებს.

- საინტერესოა თქვენი აზრი საქართველოს ნაკრების დღევანდელობასთან დაკავშირებით. ყველა ახალი მწვრთნელის მოლოდინშია...
- პრინციპში, ჩვენ ამ თემაზე უკვე ვისაუბრეთ. მხოლოდ ერთი შემიძლია გითხრათ - მოუთმენლად ველი ახალი მწვრთნელის დანიშვნას და მერე უფრო მეტის თქმა შემეძლება.

ყოველდღიური სპორტული გაზეთი "ლელო"