მერაბ ჟორდანია: ახლა "ვიტესში" იდიოტები არიან

10 დეკემბერს ერთი წელიწადი გახდა, რაც მერაბ ჟორდანია, რომელიც მანამდე "ვიტესის" მეპატრონე იყო, ჰოლანდიური კლუბიდან საერთოდ გაუშვეს.

ამასთან დაკავშირებით ჟორდანიას მოსკოვში Omroep Gelderland-ი დაუკავშირდა.

ქართველმა კლუბი მაშინ დატოვა, როცა ის ჩემპიონატის ლიდერი იყო და ახალი მოგებული ჰქონდა "პსვ ეინდჰოვენთან" 6:2.

"მე დავტოვე კლუბი იმ ადგილზე, რომელზეც დაპირებული ვიყავი - პირველზე, მოვუგეთ პსვ-ს 6:2. ეს იყო ნამდვილი შოკი ჰოლანდიურ ფეხბურთში. გუნდთან პირნათელი ვარ", - განუცხადა გამოცემას ქართველმა ბიზნესმენმა".

ჟორდანიას ხშირად ადანაშაულებდნენ, რომ მიუხედავად 100-მილიონიანი ინვესტიციისა, 3 წლის განმავლობაში "ვიტესმა" ჩემპიონთა ლიგაზე ვერ ითამაშა.

"ვიტესმა" ჟორდანიასთან ერთად პირველ წელს ძლივს დაიძვრინა თავი გავარდნისგან, მე-15 ადგილზე გავიდა. მეორე წელს კლუბი მე-7 იყო და პლეი ოფის წყალობით, ევროპალიგაზე გააღწია. მესამე წელს ჩემპიონობისთვის იბრძოდა, მაგრამ დამარცხდა და მე-4 ადგილზე დაასრულა ტურნირი.

2013 წლის ზაფხულში, შიდა გამოძიების შემდეგ უკვე გაირკვა, რომ ჟორდანია უნდა გადამდგარიყო პრეზიდენტობიდან.

ოქტომბერში იძულებული გახდა, კლუბის წილი ალექსანდრ ჩიგირინსკისთვის გადაეცა. 10 დეკემბერს პრეზიდენტობიდან მოხსნეს და ის ბერტ როეტერტმა შეცვალა.

მარტში კლუბის დირექტორმა იოსტ დე ვიტმა სარჩელი შეიტანა ჟორდანიას წინააღმდეგ, რომელიც მას თითების მოჭრით დაემუქრა.

"ვიტესს" სხვა დავაც ჰქონდა ჟორდანიას წინააღმდეგ, ისინი მილიონებს ითხოვდნენ, მაგრამ ჟორდანიასთან სასამართლო პროცესი წააგეს.

მაგრამ დე ვიტის დამუქრებისთვის ჟორდანიას იძულებითი სამუშაოები დაევალა და კლუბთან მიახლოება აეკრძალა.

ასე მოუწია "ვიტესის" ყოფილ ბოსს ავეჯის შეღებვა. მაშინ ჟორდანიამ იხუმრა კიდევაც, რომ ძლივს მოხვდა პროფესიონალებთან და არა კლოუნებთან.

"მერაბ ჟორდანია ამჟამად მოგზაურობს ქვეყნიდან ქვეყანაში, მრავალი საქმის გამო რუსეთსა და აზერბაიჯანში, მაგრამ ის კვლავ შაარსბერგენში ცხოვრობს, რადგან მისი შვილი ისევ ჰოლანდიაშია.

ლევან ჟორდანია "ვიტესის" აკადემიაში თამაშობდა, მაგრამ ახლა "აქილევს-29"-ში ვარჯიშობს.

"სიტყვები არ მყოფნის იმის გამო, რაც კლუბში ხდება. ახლაც შოკში ვარ, ისევე, როგორც გუნდის ნამდვილი ფანები.

ერთი წლის წინ ჩვენ კენწეროზე ვიყავით. ახლა "ვიტესს" "დორდრეხტთან" თანაბრად თამაში უხარია. ჰოლანდიის ერთ-ერთი საუკეთესო კლუბი დაანგრიეს.

ჩემი აზრით, ახლა კლუბში არიან ისეთი ფუნქციონერები, რომლებიც უგულოდ აკეთებენ საქმეს და ისეთი იდიოტები, რომლებიც ფეხბურთის მტრები არიან. ერთადერთი, გუნდის ფანებზე მწყდება გული", - ამბობს ჟორდანია.

"ვიტესის" წარმომადგენლები ჟორდანიას ბოლო გამონათქვამებზე კომენტარის გაკეთებას არ ეშურებიან. აი, რა თქვა კლუბის ამჟამინდელმა შეფმა ბერტ როეტერტმა:

"კლუბს კარგად ესმის ჟორდანიას უკმაყოფილების მიზეზი, ეს მისი მეტისმეტი პერსონალური ამბიციების ბრალია".