დავით სირაძე კიშინიოვის "დაჩიაში" ჯაბა დვალთან ერთად ითამაშებს

მოლდოვური ინტერნეტტელევიზია Sports.md-ის ცნობით, დავით სირაძე კარიერას კიშინიოვის "დაჩიაში" გააგრძელებს. მეტიც - სათაურში პირდაპირ იყო მითითებული, რომ საქართველოს ნაკრების ყოფილი თავდამსხმელი ამ გუნდის ფეხბურთელი გახდა.

"კიშინიოველთა შემადგენლობას დავით სირაძე გააძლიერებს. ჩვენი ინფორმაციით, კონტრაქტის ყველა დეტალი უკვე შეთანხმებულია, ხელშეკრულება კი მალე გაფორმდება", - წერს Sports.md.

შეგახსენებთ, რომ მცირე ხნის წინ "დაჩიაში" "ზესტაფონის" ყოფილი თავდამსხმელი ჯაბა დვალი ჩაირიცხა.

კომენტარისთვის თავად სირაძეს დავუკავშირდით. 33 წლის ფორვარდმა მოლდოველთა ინტერესი არ უარყო, თუმცა ამ თემაზე ლაპარაკი ჯერ არ ისურვა და მოკლე კომენტარით შემოიფარგლა:

"რამდენიმე დღეში ყველაფერს გეტყვით. მეტის თქმის უფლება ახლა არ მაქვს".

ჩვენთვის ცნობილი იყო, რომ დეკემბერში სირაძე მოლაპარაკებას აწარმოებდა პერმის "ამკართან":

"ამ გუნდს ინტერესი ნამდვილად ჰქონდა, მაგრამ ახლახან "ამკარის" მთავარ მწვრთნელად გაჯი გაჯიევი დაინიშნა, რომელმაც საკუთარი შეხედულებით დაიწყო გუნდის დაკომპლექტება და ჩვენ შორის მოლაპარაკებაც შეწყდა".

სირაძე ბოლოს ბოლნისის "სიონში" თამაშობდა. მან ეროვნულ ნაკრებში გამართულ 29 მატჩში 8 გოლი გაიტანა.

(იბეჭდება მცირე ცვლილებით)
ყოველდღიური სპორტული გაზეთი "ლელო"