ფოტოზე: სალუქვაძეს "რუბინის" მაისურით ლიონელ მესის წინააღმდეგაც უთამაშია33 წლის ლაშა სალუქვაძე ჯერაც უგუნდოდაა. გამოცდილი უკანახაზელი სასურველ ვარიანტს ელის და წესით, მალე ყველაფერი უნდა გაირკვეს.
შესაძლოა, მან ისევ რუსეთში გააგრძელოს კარიერა, სადაც ერთ დროს წარმატებით თამაშობდა ყაზანის "რუბინში".
"ლელო" სალუქვაძეს აქტუალურ თემებზე ესაუბრა...
- არის რამე ახალი თქვენს კარიერაში?
- ამ ეტაპზე სასურველი შეთავაზების მოლოდინში ვარ. არის რაღაც ვარიანტები, მაგრამ ისეთი არაფერია, ასპროცენტიანი რომ ეთქმის. ჩამოყალიბებულ სახეს რომ მიიღებს ყველაფერი, მერე ვილაპარაკოთ. მერწმუნეთ, არაფერს დავმალავ.
- ქართული კლუბებისგან თუ არის
- საქართველოში მხოლოდ ერთია ისეთი გუნდი, სადაც ყველანაირი პირობაა შექმნილი, ფეხბურთელად რომ იგრძნო თავი - ეს არის თბილისის "დინამო". ყველა ქართულ გუნდს უდიდეს პატივს ვცემ, მაგრამ რაც ვთქვი, იმაში დარწმუნებული ვარ.
- "დინამოსგან" თუ იყო ინტერესი?
- არ დავმალავ, იყო, მაგრამ ბოლო დროს აღარაფერი ისმის.
- ხომ არ არის შესაძლებელი, რომ ბაქოს "ინტერს" დაუბრუნდეთ?
- ბატონმა ზაურ სვანაძემ დამირეკა და დიდი მადლობა მას ამისთვის! თავი შევიკავე. როგორც იცით, გარკვეული ფინანსური პრობლემები იყო კლუბში. ამის მიუხედავად, "ინტერი" ღირსეულად თამაშობს ევროპალიგაზე. "ბილბაოს" სახით გუნდს უძლიერესი მეტოქე ჰყავს და ვნახოთ, იქნებ სასწაულიც მოხდეს...
- ევროპული ქვეყნებიდან გაქვთ შემოთავაზებები?
- უფრო რუსეთიდან, თუმცა ჯერჯერობით გადაწყვეტილი არაფერია.
- უგუნდოდ ხართ და ფორმას როგორ ინარჩუნებთ?
- წონის პრობლემა არ მაქვს. საღამოობით მეგობრებთან ერთად ვთამაშობ ფეხბურთს. ახლა ოჯახთან ერთად ვისვენებ კვარიათში.
- ლაშა, ელოდით, რომ ყველა ქართული გუნდი გამოეთიშებოდა ასპარეზობას ასე ნაადრევად ევროპულ ტურნირებზე?
- ძალიან გულდაწყვეტილი ვარ ამის გამო, მაგრამ, სიმართლე გითხრათ, ველოდი, რომ ასე მოხდებოდა... ჩვენს კლუბებს ძლიერი მეტოქეები შეხვდათ, ოღონდ ძლიერები - ისევ და ისევ ჩვენი დონის გათვალისწინებით. კი, ჩვენ გვაქვს ტრადიცია, მაგრამ ეს დღეს ბევრს არაფერს ნიშნავს. უცხოური კლუბები იხდიან ფულს და ჩაჰყავთ ლეგიონერები.
ავიღოთ, მაგალითად, "გაბალა". თუ არ ვცდები, ეს გუნდი მეორედ თამაშობს ევროთასებზე თავის ისტორიაში, მაგრამ, მიუხედავად ამისა, მოახერხა და მოუგო თბილისის "დინამოს". თუ ჩვენ გვინდა, რომ ევროთასებზე წარმატებით ვითამაშოთ, ქართულ გუნდებში აუცილებლად უნდა გამოჩნდნენ ლეგიონერები, რა თქმა უნდა, მაღალი დონის.
რომ ვუყურებ, არც 16-გუნდიანმა ჩემპიონატმა გაამართლა. ფეხბურთელების გადანაწილება მოხდა და სწორედ აქ გამოჩნდა, რომ ჩვენ არ გვყოფნის რესურსი. დონე კი გათანაბრდა, მაგრამ, განა, ეს საქმეს შველის? ევროთასებმა ბევრ კითხვას გასცა პასუხი.
- წეღან "დინამოს" ინტერესი ახსენეთ და პირადად ჩემი აზრია - საქართველოს ჩემპიონატს სჭირდება სალუქვაძის დარი გამოცდილი ფეხბურთელები. იქნებ გავხსნათ ფრჩხილები - რა მოხდა? როგორ ფიქრობთ, რატომ აღარ შეგეხმიანათ "დინამო"?
- ინტერესი იყო გუნდში გია გეგუჩაძის მისვლამდე. მას შემდეგ აღარაფერი ისმის. ხანდახან იმასაც ვფიქრობ - გეგუჩაძე ჩემზე ნაწყენი ხომ არ არის? ჩვენ ერთად ნაყოფიერად ვიმუშავეთ. "დინამომ" უეფას თასის ჯგუფურ ეტაპზე რომ ითამაშა, ყველა შეხვედრა ჩავატარე... მერე გამოჩნდა "რუბინის" ვარიანტი და წავედი. გუნდს არ უნდოდა ჩემი გაშვება, მაგრამ მაღალ დონეზე თამაშის შანსი მქონდა. არანაირი კონფლიქტი გეგუჩაძესთან არ მქონია...
რეალურად, "დინამოში" სიამოვნებით ვითამაშებდი. ჯერ ერთი, ზემოთაც ვთქვი "დინამოში" არსებულ პირობებზე და მეორეც - ყველა ქართველი ფეხბურთელისთვის ის განსაკუთრებული გუნდია.
- უგუნდოდ კი ხართ, მაგრამ ცხადია, ეროვნულ ნაკრებში დაბრუნების იმედი არ გექნებათ გადაწურული...
- სანამ ფეხბურთს ვითამაშებ, სულ მექნება ამის იმედი. თუ ფორმაში ვიქნები, მჯერა, კახა ცხადაძესთან არაფერი დამეკარგება...
- საქართველოს ნაკრებს პროგრესს თუ ატყობთ?
- მე ვიცი, რა შეუძლია ცხადაძეს, როგორც მწვრთნელს. ჩვენ ერთად ვიმუშავეთ თბილისის "ლოკომოტივსა" და ბაქოს "ინტერში". ახლა საქართველოს ნაკრებში ყველამ იცის, სად უნდა მიიღოს ბურთი, როგორ გაიხსნას...
უკრაინასთან მატჩი ავიღოთ. ბურთი გვქონდა და მომენტებიც შევქმენით. პოლონეთთან 0:4 ცუდად ჩანს, მაგრამ ეს არ იყო ამ ანგარიშით წასაგები თამაში. 0:1-ზე პოლონელებმა ძალიან ინერვიულეს...
ბოლოს და ბოლოს, ჩვენს ნაკრებს მეტწილად სწორედ მაშინ გამოსდიოდა თამაში, როცა ვუტევდით, როცა ბურთი გვქონდა... დაარტყი და გაიქეცი - ამ სტილით არაფერი გამოდის. კახას ძალიან უყვარს შეტევა. ჩვენც ისეთი თაობა მოგვდის, რომ აქცენტი სწორედ შეტევაზე, ბურთის ფლობაზე უნდა გავაკეთოთ...
(იბეჭდება მცირე ცვლილებით)
ყოველდღიური სპორტული გაზეთი "ლელო"
