ლეგიონი გუშინ: სანდრო კობახიძის დუბლი უკრაინის თასზე [VIDEO]

გუშინ, 28 ოქტომბერს, ქართველთა გუნდებმა სათასო და ჩემპიონატის მატჩები ჩაატარეს.

უკრაინის თასზე საპასუხო მერვედფინალური მატჩები გაიმართა. ლუცკის "ვოლინმა" შინ 5:0 (პირველი მატჩი - 2:0) მოუგო "მიკოლაივს". დუბლი შეასრულა სანდრო კობახიძემ და სრულადაც ითამაშა.

დავით თარგამაძის "ოლეკსანდრიამ" 2:0 მოუგო "ზირკას" და მეოთხედფინალში გავიდა (პირველი მატჩი - 1:1). თარგამაძის აქტივში საგოლე პასია. ის 72-ე წუთზე შეცვალეს.

პირველ მატჩში 2:0 გამარჯვების შემდეგ, "დნიპრო" დონეცკის "ოლიმპიკს" დაუხვდა და ეს თამაშიც მოიგო - 3:2. "ოლიმპიკში" ითამაშა თემურ ფარცვანიამ.

რუსეთის თასის მერვედფინალში ხაბაროვსკის "სკა ენერგია" გასვლაზე "უფასთან" დამარცხდა - 0:1. ხაბაროვსკელთა რიგებში კახა ალადაშვილმა 90 წუთი ითამაშა. "სკა ენერგია" თასის გათამაშებას გამოეთიშა.

გროზნოში "ტერეკმა" დამატებით დროში 2:1 მოუგო "ხიმკის". არ უთამაშია გროზნოელთა ქართველ ლეგიონერ თედო გრიგალაშვილს, ვინც თბილისშია და სავიზო პრობლემებს აგვარებს.

კრასნოდარში "ყუბანი" მოსკოვის "სპარტაკს" დაუპირისპირდა, 1:0 მოუგო და თასიდან გამოთიშა. ჯანო ანანიძემ ახლახან განაახლა ვარჯიში და, ცხადია, არ უთამაშია.

გერმანიის თასზე "ფრაიბურგმა" შინ 0:3 წააგო "აუგსბურგთან" და ტურნირს დაემშვიდობა. წაგებულთა შორის 77-ე წუთიდან ითამაშა ლუკა ჰუფნაგელმა.

საბერძნეთის თასი ჯგუფური სისტემით მიმდინარეობს. გიორგი მერებაშვილის "ვერია" შინ დაუპირისპირდა "ატრომიტოსს" და 2:2 ითამაშა. მერებაშვილმა მინდორზე 90 წუთი გაატარა.

თურქეთის ჩემპიონატში დაზავდნენ "ქაისერისფორი" და "რიზესფორი". სტუმართა შორის არ უთამაშია ნიკა ძალამიძეს.

შოთა არველაძის "ტრაბზონსფორმა" საკუთარ მოედანზე ვერ დაძლია "გაზიანთეფის" წინააღმდეგობა - 2:2. აღსანიშნავია, რომ მეორე ტაიმის დასაწყისში შოთას შეგირდები 0:2-ს აგებდნენ.

აზერბაიჯანის ჩემპიონატის მორიგ ტურში აზალ-ი სტუმრად დაუპირისპირდა "გაბალას". შეხვედრა 0:0 დასრულდა. აზალ-ის ძირითად შემადგენლობაში ითამაშეს ქართველებმა - სანდრო გურულმა და ნუგზარ კვირტიამ. გურული 24-ე წუთზე შეცვალეს, კვირტიამ კი თავიდან ბოლომდე ითამაშა და ყვითელი ბარათიც მიიღო.

ბაქოს დერბიში "ნეფთჩი" და "ინტერი" დაზავდნენ - 1:1. "ინტერში" სრულად ითამაშეს ნიკა კვეკვესკირმა და ლაშა სალუქვაძემ, გიორგი ლომაია სათადარიგო იყო, ლაშა კასრაძე განაცხადში არ ყოფილა, ზურაბ ხიზანიშვილმა კი დისკვალიფიკაციის გამო იუქმა.

ფინეთის ჩემპიონატის პლეი ოფში, უმაღლეს ლიგაში ადგილის შენარჩუნებისთვის მებრძოლი "კოოტეპე" გასვლაზე შეხვდა "ვანტაას"და უგოლოდ დაშორდა. სტუმართა რიგებში სათადარიგო იყო გიორგი ოსიტაშვილი.

(იბეჭდება მცირე ცვლილებით)
ყოველდღიური სპორტული გაზეთი "ლელო"