არავინ დავობს, რომ თორნიკე ოქრიაშვილი საქართველოს ნაკრების საკვანძო მოთამაშეა. როცა ის ფორმაშია, "ჯვაროსნები" უკეთ თამაშობენ, რადგან ასეთი არაორდინარული და თამაშის ბედის გადამწყვეტი ფეხბურთელები თითქმის აღარ დაგვრჩა. თურქული "ესქიშეჰირიდან" წამოსულ 24 წლის შემტევ ნახევარმცველს ტრანსფერი ბელგიურ "გენკთან" აკავშირებს. ერთი ხანობა, ბელგიელებთან ერთად ვარჯიშობდა, მაგრამ კლუბის ნებართვით საქართველოში ჩამოვიდა. როგორც ჩანს, ოქრიაშვილმა რთული პერიოდი უკვე გადალახა, დაღვინდა და ახალი სეზონისთვის მონდომებული ვარჯიშობს. ეგაა, "ჯვაროსნების" ერთ-ერთი ლიდერი ჯერ მხოლოდ ინდივიდუალურად ემზადება და ეს, უპირველესად, მას ანერვიულებს, ხოლო შემდეგ - გულშემატკივრებსა და ეროვნული გუნდის
5 სექტემბერს, "დინამო არენაზე" ჩვენი ქვეყნის მთავარი გუნდი ევროპის ჩემპიონატზე გამწარებულ ავსტრიას შეხვდება. მანამდე თვეზე ნაკლებია დარჩენილი და საქართველოს ნაკრების ხილვა ოქრიაშვილის გარეშე არავის სურს. მასზე მნიშვნელოვნად იქნება დამოკიდებული, როგორ ითამაშებს ვლადიმირ ვაისის გუნდი ამ კონკრეტულ შეხვედრაში და ზოგადად, მსოფლიოს ჩემპიონატის შესარჩევ ციკლში.
"გენკშიც" მივიდნენ იმ აზრამდე, რომ კონტრაქტის გაწყვეტა აჯობებს. ახლახან კლუბმა ოფიციალურად დაადასტურა, რომ ოთხი მოთამაშის გაშვება სურს და მათ შორისაა ოქრიაშვილიც, მაგრამ ბელგიელები ქართველს სატრანსფერო ფურცლის საფასურად საკმაოდ დიდ კომპენსაციას სთხოვენ და, როგორც შევიტყვეთ, ფეხბურთელს სწორედ ეს აბრკოლებს.
ბელგიური გამოცემა vietbakrant.com ამტკიცებს, რომ ოქრიაშვილი ახალ კლუბს უშედეგოდ ეძებს. ჰოლანდიური niewsblad.be საპირისპირო ცნობას ავრცელებს - ქართველს რამდენიმე კლუბი დაუკავშირდაო.
სიმართლეს ეს უფრო ჰგავს, რადგან "ლელოსთვის" დანამდვილებით არის ცნობილი, რომ ოქრიაშვილის გადაბირება რუსეთის პრემიერლიგის კლუბ ეკატერინბურგის "ურალს" სურდა, რომელმაც ზაფხულში კონტრაქტი საქართველოს ნაკრების კიდევ ერთ შემტევს, გიორგი ჭანტურიას გაუფორმა.
მაგრამ ოქრიაშვილი ევროპულ გუნდს ეძებს, სადაც უფრო უკეთესი საფეხბურთო გარემო იქნება, რუსეთში კარიერის გაგრძელება კი არ სურს.
უახლოეს დღეებში გაირკვევა, სად გააგრძელებს კარიერას საქართველოს ეროვნული ნაკრების ერთ-ერთი ლიდერი. ადრე თუ იყო ლაპარაკი, რომ ოქრიაშვილს საფრანგეთის, გერმანიის, ესპანეთისა და ბელგიის გუნდები იწვევდნენ, ახლა გვითხრეს, რომ ახალი ვარიანტები ჰოლანდიასა და იმავე ბელგიაში გამოუჩნდა.
მან შენგენის ვიზა უკვე მიიღო და დღე-დღეზე გაემგზავრება იქ, სადაც კონტრაქტისთვის ელიან. ხოლო მანამდე თბილისში ყოველდღე ვარჯიშობს და მოსალოდნელ ტრანსფერზე კომენტარს ერიდება.
ყოველდღიური სპორტული გაზეთი "ლელო"
