დაუსვი კითხვა ლევან კობიაშვილს და მოიგე მაისური

Sportall.ge-ს რუბრიკის, "ინტერნეტკონფერენციის" მორიგი სტუმარი საქართველოს ფეხბურთის ფედერაციის პრეზიდენტი ლევან კობიაშვილია.

კობიაშვილი მკითხველთა კითხვებს უპასუხებს, მათგან საუკეთესოს ავტორს კი თავად შეარჩევს და თავის ერთ-ერთ მაისურს უსახსოვრებს.

კითხვების მიღება 23 აპრილის ჩათვლით მიმდინარეობს. ლევან კობიაშვილი მკითხველთა კითხვებს, სავარაუდოდ, 24 აპრილს უპასუხებს.

გაითვალისწინეთ: კითხვის გამოგზავნისას აუცილებლად მიუთითეთ საკონტაქტო ინფორმაცია (ვინაობა, ტელეფონი ან ელ.ფოსტა), რათა გამარჯვების შემთხვევაში, რედაქციამ შეძლოს თქვენთან დაკავშირება. კითხვა არ უნდა აღემატებოდეს 30 სიტყვას, წინააღმდეგ შემთხვევაში, ის შემოკლდება. კითხვის დასმა აქ შეგიძლიათ - დაუსვი კითხვა ლევან კობიაშვილს.

საფეხბურთო კარიერის დიდი ნაწილი კობიაშვილმა გერმანიის ბუნდესლიგაში გაატარა. ლევანი გერმანიაში 1998 წელს გადაბარგდა და მას მერე, 2014 წლის ჩათვლით, "ფრაიბურგის", "შალკეს" და "ჰერტას" მაისური მოირგო. ამ ხნის მანძილზე ბუნდესლიგაში მან 351 მატჩი ჩაატარა, სადაც 32 გოლი გაიტანა. კობიაშვილი გერმანულ ლიგაში ნათამაშები შეხვედრების რაოდენობით ლეგიონერებს შორის ისტორიაში მეორე ადგილზეა. საქართველოს ეროვნული ნაკრების მაისური ლევანმა 100 შეხვედრაში მოირგო, რაც ასევე რეკორდული შედეგია - ის ასიანთა კლუბის ერთადერთი წევრია.

2014 წლის მაისში კობიაშვილმა საფეხბურთო კარიერა დაასრულა, 2015 წლის ოქტომბერში კი საქართველოს ფეხბურთის ფედერაციის საპრეზიდენტო არჩევნებში მიიღო მონაწილეობა.