"ბარსელონამ" ესპანეთის სუპერთასი ისტორიაში მე-11-ედ მოიგო. ხერარდო "ტატა" მარტინო კი მესამე არგენტინელი მწვრთნელი გახდა სესარ მენოტის და ექტორ რაულ კუპერის შემდეგ, ვინც ეს ტიტული მოიპოვა.
მადრიდის "ატლეტიკოსთან" გამართული საპასუხო მატჩი ფრედ, 0:0 დასრულდა და კატალონიელები ტიტულს სტუმრად გატანილი ბურთის წყალობით დაეუფლნენ. შეგახსენებთ, რომ მადრიდში გამართული შეხვედრის ანგარიში 1:1 იყო.
საინტერესოა, რომ აქამდე გოლების გარეშე სუპერთასის მხოლოდ ერთი შეხვედრა დასრულდა - 2000 წელს, "ესპანიოლის" და "დეპორტივოს" ფეხბურთელებმა მეკარეებს ვერ აჯობეს.
დიეგო სიმეონემ და მისმა "ატლეტიკომ" ძალიან კარგი შთაბეჭდილება დატოვეს. "როხიბლანკო" თავს
პირველ ტაიმში ყველაზე რეალური მომენტი სტუმრებს ჰქონდათ - საოცრად ლამაზი კომბინაცია არდა თურანის შესანიშნავი ცრუმოძრაობით და კარგი დარტყმით დასრულდა, თუმცა ვიქტორ ვალდესმა შესაშური რეაქცია გამოავლინა და ურთულესი ბურთი კუთხურზე მოიგერია.
"ბარსელონა", რომლის სასტარტო შემადგენლობაში ნეიმარი და ლიონელ მესი ერთად პირველად გამოჩნდნენ, რა თქმა უნდა, თამაშის უდიდესი ნაწილის განმავლობაში ბურთს აკონტროლებდა, მაგრამ მასპინძლებს საგოლე მომენტების შექმნამდე საქმე ვერ მიჰყავდათ. მეორე ნახევარშიც უფრო უკეთ მადრიდელები უტევდნენ და ვალდესს საკუთარი გუნდის გადარჩენა ერთხელაც მოუხდა.
შეხვედრის ბოლოს, როდესაც "ატლეტიკო" შედარებით დიდი ძალებით გადავიდა შეტევაში, "ბარსაც" უკეთ ათამაშდა, რასაც ჯერ ფილიპე ლუიშის გაძევება მოჰყვა, მატჩის ბოლო წუთზე კი სტუმართა კარში პენალტი დაინიშნა, რომელიც ლიონელ მესიმ ვერ გაიტანა - არგენტინელმა ზუსტად იმავე ხარიხას გაარტყა, რომელიც 2012 წლის მაისში, "ჩელსისთან" გამართული ჩემპიონთა ლიგის საპასუხო 1/2-ფინალური მატჩისას "მოიკითხა".
საბოლოოდ, შეხვედრა 0:0 დასრულდა, არბიტრმა დავიდ ფერნანდეს ბორბალანმა კი სათადარიგოთა სკამიდან არდა თურანის გაძევებაც მოასწრო.
"ატლეტიკომ" სუპერთასისთვის მეხუთედ ითამაშა, მეხუთედაც "ბარსას" შეხვდა და ზედიზედ მეოთხედ წააგო.
იხილეთ ვიდეო
მატჩის შემდეგ
ხერარდო მარტინო (ბარსელონა): "ძალიან ბედნიერი ვარ, მაგრამ ეს ტიტული მე არ მეკუთვნის. სუპერთასი წინა სეზონში ჩატარებული კარგი მუშაობის შედეგია.
მე აქ ცუდი ამბის გამო ვარ. ჩვენი ჩემპიონობა ფეხბურთელების და ტიტოს სამწვრთნელო შტაბის დამსახურებაა. "ატლეტიკო" იმაზე ძლიერი გუნდი აღმოჩნდა, ვიდრე ჩვენ გვეგონა.
მომავალში ხშირად მოგვიწევს მსგავს შეხვედრებში მონაწილეობა - ჩვენ ისეთი მატჩებიც უნდა მოვიგოთ, სადაც ყველაფერი იდეალურად არაა".
დიეგო სიმეონე (ატლეტიკო): "ეს მატჩი კარგი საზომი გამოდგა. ჩვენ ყოველდღიურად ვიზრდებით, რაც ძალიან მახარებს და ამავდროულად, სიამაყით მავსებს. "ბარსელონა" მსოფლიოში საუკეთესო გუნდია და ჩვენ მათ არაფერი დავუთმეთ".
მწვრთნელებს ფერნანდეს ბორბალანის გარჯაზეც ჰკითხეს. ორივე გუნდის ფეხბურთელები არბიტრთან ხშირად კამათობდნენ.
"ბარსელონას" ფეხბურთელები პრეტენზიებს გამოთქვამდნენ იმის გამო, რომ "ატლეტიკოს" მოთამაშეები თამაშის წესებს ძალიან ხშირად არღვევდნენ, მსაჯი ჯიუტად არავის აფრთხილებდა, სტუმრებმა კი მსაჯზე ფილიპეს გაძევების და მოგვიანებით, მათ კარში პენალტის დანიშვნის გამო გაიწიეს.
ხერარდო მარტინომ მსაჯზე საუბარი არ ისურვა, სიმეონემ კი შემდეგი რამ თქვა:
"ჩვენ აქ სათამაშოდ ჩამოვედით და საუბარიც მხოლოდ მატჩზე მსურს. მსაჯმა შეიძლება შეცდომა დაუშვას, ფეხბურთელიც შეიძლება შეცდეს და მწვრთნელიც შეიძლება არ იყო მართალი".
მწვრთნელებისგან განსხვავებით, ბორბალანი "ატლეტიკოს" კაპიტანმა გაბიმ გააკრიტიკა:
"მსაჯობის გამო უკმაყოფილონი ვართ. პირველ შეხვედრაში, როდესაც ბუსკეტსი იყო გასაძევებელი, მსაჯთან ვიკამათეთ და ჩვენ დავისაჯეთ. დღეს "ბარსელონას" ფეხბურთელები არბიტრს მუდამ ეკამათებოდნენ და საბოლოოდ, მაინც ჩვენ დავისაჯეთ. სუპერთასი კი დავთმეთ, მაგრამ დიდი იმედი მაქვს, რომ ეს მარცხი მომავალში კარგ სამსახურს გაგვიწევს".
აქვე აღვნიშნოთ, რომ "მარკამ" ბორბალანის გარჯა 4 ბალით (10-დან) შეაფასა.
ყოველდღიური სპორტული გაზეთი "ლელო"
