ესპანეთის ჩემპიონატის მესამე ტურში რამდენიმე ძალიან საინტერესო მატჩი უნდა გაიმართოს. ცენტრალურად ტურის ორი დაპირისპირება უნდა მივიჩნიოთ - კვირას, ჩვენი დროით 14 საათზე "სანტიაგო ბერნაბეუზე" "რეალი" და ბილბაოს "ატლეტიკი" ითამაშებენ, 23 საათზე კი "მესტალიას" "ბარსელონა" ესტუმრება...რეალი - ატლეტიკი
იმ სამი გუნდიდან, რომელთაც პრიმერა არასდროს დაუტოვებიათ, ორი ერთმანეთს მადრიდში შეხვდება. "სამეფო კლუბის" და ბასკების დაპირისპირება, მიუხედავად იმისა თუ რა მდგომარეობაშია ეს უკანასკნელი, ყოველთვის ძალიან საინტერესოა. 1 სექტემბერს გასამართი შეხვედრა კი მართლაც გამორჩეული უნდა გამოდგეს, რადგან ჯერ ვერც "რეალი" უჩვენებს ისეთ თამაშს
ერნესტო ვალვერდეს შეგირდებმა ორივე შეხვედრაში იმარჯვეს და ახლა ერთ-ერთ ყველაზე საძულველ მეტოქესთან არსებული ხანგრძლივი მოუგებელი სერიის დასრულებას ეცდებიან. ბასკებს შესაძლოა გორკა ირაისოსი და ეკისა არ ჰყავდეთ - ეკისამ ტრავმა პირველ ტურში მიიღო, ირაისოსი კი ვარჯიშზე დაშავდა და წინა ტურში მის ნაცვლად იაგომ ითამაშა, ვინც კარი მშრალად შეინახა.
კარლო ანჩელოტის პრობლემა ისევ ნახევარდაცვის ცენტრია - ჩაბი ალონსოს, სამი ხედირას და ასიერ ილიარამენდის კვლავ ტრავმები აწუხებთ. ესპანელი ჟურნალისტების აზრით, მათ ადგილზე ისევ ლუკა მოდრიჩს და ისკოს ვიხილათ, წინ კი დი მარია, იოზილი, რონალდო და ბენზემა იმოქმედებენ.
ცალკე სალაპარაკო თემაა რონალდოს არადამაჯერებელი თამაში - პორტუგალიელმა ორ შეხვედრაში გოლი ვერ გაიტანა და თავიც დიდად არ გამოუჩენია.
ბასკების მოუგებელი სერია ვახსენეთ და გეტყვით, რომ "რეალმა" მეტოქეს ბოლო 7 მატჩი მოუგო (ბურთები: 28:4) და თითოეულ ამ შეხვედრაში მინიმუმ სამი გოლი გაუტანა. "სანტიაგო ბერნაბეუზე" კი "ატლეტიკს" უკანასკნელი 9 მატჩი აქვს წაგებული - ბოლოს ამ სტადიონზე 2005 წელს, 2:0 იმარჯვა.
სავარაუდო შემადგენლობები:
რეალი (4-2-3-1): დიეგო ლოპესი - არბელოა, პეპე, სერხიო რამოსი, მარსელო - მოდრიჩი, ისკო - დი მარია, იოზილი, კ. რონალდო - ბენზემა
ატლეტიკი (4-2-3-1): იაგო - ირაოლა, გურპეგი, სან ხოსე, ბალენსიაგა - ბენიატი, იტურასპე - სუსაეტა, ანდერ ერერა, მუნიაინი - კიკე სოლა
ვალენსია - ბარსელონა
ესპანეთის სუპერთასის მოგების შემდეგ, კატალონიის "ბარსელონა" ვალენსიას ესტუმრება. მასპინძელთა თავკაცი მიროსლავ ჯუკიჩი ხვდება გუნდს, რომელმაც 1994 წელს, მის მიერ გაფუჭებული პენალტის გამო ("დეპორტივოს" რიგებში, "ვალენსიას" წინააღმდეგ, მატჩის ბოლო წუთზე) ჩემპიონის ტიტული მოიპოვა.
"ღამურებმა" ერთ კატალონიურ გუნდთან უკვე ითამაშეს და წინა ტურში "ესპანიოლთან" წააგეს (1:3). "ბარსასთან" კი "ვალენსიას" საკმაოდ დიდი ხანი, 2007 წლის შემდეგ არ მოუგია და ჩემპიონატში ჩატარებული ბოლო 12 მატჩიდან მხოლოდ 4 არ წააგო.
ხერარდო მარტინოს გუნდი ერთადერთია, რომელსაც ჯერ გოლი არ გაუშვია. კატალონიელებმა სეზონი ტიტულის მოგებით კი გახსნეს, მაგრამ სუპერთასზე ისე იმარჯვეს, რომ "ატლეტიკო" ერთხელაც ვერ დაამარცხეს. ამ ორ შეხვედრას შორის იყო "მალაგასთან" გამართული მატჩიც, სადაც "ბარსამ" მინიმალური სხვაობით, 1:0 მოიგო, ანუ ბოლო სამ ოფიციალურ შეხვედრაში "ტატას" გუნდმა მხოლოდ 2 გოლი გაიტანა.
მიუხედავად იმისა, რომ ოთხშაბათს ნეიმარი ძირითადში იყო, ესპანელი ჟურნალისტების აზრით, ბრაზილიელი ამჯერად სათადარიგოთა სკამზე იქნება, მესისთან ერთად კი ალექსის სანჩესი და პედრო შეუტევენ.
სავარაუდო შემადგენლობები:
ვალენსია (4-2-3-1): დიეგო ალვეში - ჟოაო პერეირა, რამი, რ. კოშტა, ბერნატი - ხავი ფუეგო, პარეხო - ფეგული, ბანეგა, ვიერა - ელდერ პოშტიგა
ბარსელონა (4-3-3): ვალდესი - დანი ალვეში, პიკე, მასკერანო, ალბა - ბუსკეტსი, ჩავი, ინიესტა - ა. სანჩესი, მესი, პედრო
მცირე ანდალუსიური დერბი
"სანჩეს პისხუანზე" მცირე ანდალუსიური დერბი გაიმართება. ევროპა ლიგის ჯგუფში მოხვედრილი "სევილია" იმ "მალაგას" უმასპინძლებს, რომელმაც პირველ ორ ტურში წააგო, მისმა მთავარმა მწვრთნელმა ბერნდ შუსტერმა კი სეზონის წინ განაცხადა: "შესაძლოა საწყისი სამი მატჩი წავაგოთ და ეს დიდად არც გამიკვირდება".
მართლაც, "მალაგა" ლამის ყველა ლიდერმა დატოვა, კალენდარი კი გუნდს უმძიმესი შეხვდა: "ვალენსია" (სტუმრად), "ბარსელონა" (შინ) და "სევილია" (სტუმრად). პირველ ორ ტურში ანდალუსიელებმა ბოლომდე იბრძოლეს, მაგრამ თითო გოლი მაინც გაუშვეს. დერბიში სტუმრებს ტრავმების გამო ველიგტონი და ფლავიო არ ეყოლებათ.
"სევილიას" დანაკლისი უფრო სერიოზული კი არის, მაგრამ მეტოქისგან განსხვავებით, უნაი ემერის განკარგულებაში ბევრი ფეხბურთელია და ბასკ სპეციალისტს ტრავმირებულთა შეცვლა არ უნდა გაუჭირდეს.
საინტერესოა, რომ ამ გუნდების ურთიერთშეხვედრებში უპირატესობას არა უფრო ტიტულოვანი "სევილია", არამედ "მალაგა" ფლობს. "ლა როსალედას" ბინადრებს "სევილიასთან" ბოლო 3 მატჩია არ წაუგიათ, 2003-05 წლეში კი "მალაგამ" მეტოქეს 7 მატჩიდან 6 მოუგო, ერთი ფრედ დაასრულა და საკუთარ კარში მხოლოდ 2 გოლი მიიღო.
კარგი განწყობით
"რეალ სოსიედადმა" ფრანგულ "ლიონს" ერთი თავით აჯობა და ჩემპიონთა ლიგის ჯგუფური ეტაპის საგზური ისტორიაში მეორედ მოიპოვა. ამ ტურში, კარგ ხასიათზე მყოფი ბასკები მადრიდის "ატლეტიკოს" უმასპინძლებენ, ვინც მართალია სუპერთასი ვერ მოიპოვა, მაგრამ "ბარსელონასთან" არც ამჯერად დამარცხდა, წინა ტურში კი "რაიო ვალეკანოს" კუდით ქვა ასროლინა (5:0).
ორივე გუნდი ძალიან კარგ ფორმაშია და შესაბამისად, მატჩიც დაძაბული და სანახაობრივი უნდა გამოვიდეს. მოსალოდნელია, რომ არასატეც და დიეგო სიმეონეც იმავე 11-ეულს მიენდობიან, ვინც შუა კვირაში ითამაშა. მოგეხსენებათ, "ატლეტიკოს" არდა თურანი (სათადარიგოთა სკამიდან) და ფილიპე ლუიში გაუძევეს, მაგრამ დისკვალიფიკაცია ესპანეთის ჩემპიონატზე არ ვრცელდება.
ესპანეთი. ლა ლიგა. III ტური
31 აგვისტო
სელტა-გრანადა 21:00
დისკვალიფიკაცია: ბორხა ოუბინა (სელტა)
ტრავმა: ლორკა, ბერმეხო (სელტა)
ურთიერთშეხვედრები
სულ 6 თამაში: +2 =2 -2, (6-6)
ვალიადოლიდი-ხეტაფე 23:00
დისკვალიფიკაცია: არავინ
ტრავმა: ებერტი, დ. ლარსონი, ვიქტორ პერესი - გავილანი
ურთიერთშეხვედრები
სულ 9 თამაში: +3 =2 -4, (7-6)
ოსასუნა-ვილიარეალი 01:00
დისკვალიფიკაცია: არავინ
ტრავმა: დე ლას კუევასი, სეხუდო, მიგელ ფლანიო, ლოლო, ნინო, სატრუსტეგი - იოკიჩი
ურთიერთშეხვედრები
სულ 30 თამაში: +11 =7 -12, (39-42)
1 სექტემბერი
რეალი-ატლეტიკი 14:00
დისკვალიფიკაცია: არავინ
ტრავმა: ჩაბი ალონსო, ხედირა, ილიარამენდი, ვარანი - ირაისოსი, ეკისა, სან ხოსე
ურთიერთშეხვედრები
სულ 42 თამაში: +27 =5 -10, (97-40)
ესპანიოლი-ბეტისი 19:00
დისკვალიფიკაცია: არავინ
ტრავმა: ვიქტორ ალვარესი - რუბენ კასტრო, ვილარჩაო
ურთიერთშეხვედრები
სულ 32 თამაში: +13 =13 -6, (52-35)
სოსიედადი-ატლეტიკო 21:00
დისკვალიფიკაცია: არავინ
ტრავმა: ხოსე ანხელი, აგირეჩე, მიკელ გონსალესი, იფრანი (სოსიედადი)
ურთიერთშეხვედრები
სულ 30 თამაში: +13 =7 -10, (42-46)
სევილია-მალაგა 23:00
დისკვალიფიკაცია: არავინ
ტრავმა: პარეხა, კარიკო, რეიესი, სისინიო - ველიგტონი, ფლავიო
ურთიერთშეხვედრები
სულ 26 თამაში: +9 =6 -11, (32-34)
ვალენსია-ბარსელონა 23:00
დისკვალიფიკაცია: არავინ
ტრავმა: კუენკა, აფელაი, პუიოლი (ბარსელონა)
ურთიერთშეხვედრები
სულ 44 თამაში: +10 =12 -22, (52-85)
სატურნირო მდგომარეობა
(30 აგვისტოსთვის)
ბომბარდირები: 3 - დიეგო კოშტა (ატლეტიკო), როდრი (ალმერია); 2 - ბენზემა (რეალი), ტიევი (ესპანიოლი), ბუენო (რაიო ვალეკანო), შარლესი (სელტა), ჯოვანი დოს სანტოსი (ვილიარეალი), რაულ გარსია (ატლეტიკო), მესი (ბარსელონა), პერდო (ბარსელონა), ველა (სოსიედადი)
ყოველდღიური სპორტული გაზეთი "ლელო"
