ვიტოლო პერესი: პრემიერლიგა? რატომაც არა...

ვიტოლო პერესი 27 წლისაა და ის ესპანეთის ნაკრების შეუცვლელი ფეხბურთელი ხდება. ის კარგა ხანია, ასეთია "სევილიაში", რომელიც გამუდმებით ყიდის ლიდერებს, მაგრამ ვიტოლოს ვერ ელევა.

"ბოლო 10 წელი "სევილიას" დიდების ხანაა. ევროპულ ასპარეზზე გუნდი ძალიან წარმატებულია. ხელახლა რომ არ გადავთვალოთ გუნდის მიერ მოგებული ევროპის რანგით მეორე თასების რაოდენობა, ისედაც ცხადია - გუნდმა ევროპალიგაზე გამარჯვება ისწავლა. მიმდინარე სეზონში კი არგენტინელი სამპაოლის მიერ დამოძღვრილი გუნდი ლიდერებს მაგრად მისდევს.

"ეს ცხადია - გუნდი ყოველ ზაფხულს ყიდის წამყვან მოთამაშეებს, მაგრამ მაინც აქვს დიდი წარმატება, თუნდაც ევროპულ ასპარეზზე. მაშ, რაღაც ხდება. ამ გუნდს აქვს რაღაც საიდუმლო, რომელიც სხვებისთვის ამოუხსნელია", - ამბობს ვიტოლო.

ფეხბურთი ხანდახან ვერაგი რამაა და მეგობარსაც დაგაპირისპირებს - ხოლმე. ასე იყო ევროპალიგის ფინალში, რომელშიც "სევილიამ" ტიტულზე მონადირე "ლივერპული" დაამარცხა.

ინგლისურ კლუბში თამაშობდა მცველი ალბერტო მორენო, ვიტოლოს დიდი მეგობარი "სევილიიდან", ვინც სანუკვარ ჯილდოს ვერ შეწვდა. "მე ძალიან დამწუხრებული ვიყავი მის გამო. ჩვენ დიდი მეგობრები ვართ და მე ვიცი, რა შეუძლია მას. ჩემი აზრით, "ლივერპულს" განსაკუთრებული ფეხბურთელი ჰყავს. ოღონდ ესაა, მორენო ძალიან ახალგაზრდაა. ის მალე ბოლომდე გამოავლენს თავის პოტენციალს", - ამბობს ვიტოლო.

ხომ არ უნდა ვიტოლოს უახლოეს მეგობართან ერთად პრემიერლიგაში თამაში? "რა თქმა უნდა, "ლივერპული" უდიდესი ტრადიციების უდიდესი კლუბია. ჩემთვის მართლაც საინტერესო იქნებოდა ისეთ კლუბში თამაში, როგორიც არის ის. ამასთან ერთად, სიამოვნებით მოვსინჯავდი ძალას პრემიერლიგაში", - ამბობს ჩვენი წერილის გმირი.

ვიტოლო კანარის კუნძულებზე გაიზარდა. როგორც აღმოჩნდა, ის პატარა ბიჭობიდანვე უყურებდა პრემიერლიგას. "ჩვენთვის დიდი სანახაობა იყო პრემიერლიგა. განსაკუთრებული აღტაცებით ვუცქერდით "მანჩესტერ იუნაიტედისა" და "ლივერპულის" შეხვედრებს. დამეთანხმებით, არაერთი შესანიშნავი თამაში გამართულა სხვადასხვა დროს ამ გუნდებს შორის", - ამბობს ვიტოლო.

ინგლისური ფეხბურთის მოყვარული ვიტოლო ბავშვობაში მშობლიური "ლას პალმასის" ფანი იყო. ის გახლდათ დიდი ქომაგი ვინი სემვეიზისა, ვინც ერთ-ერთი მთავარი კაცი იყო კანარის კუნძულების მთავარ კლუბში.

"უნდა ვაღიარო, რომ მე მისი დიდი ფანი ვიყავი. ამ საკითხზე სპეციალურად ვესაუბრე "სევილიას" მწვრთნელს, ლიონელ სკალონის. მას ამ ფეხბურთელის წინააღმდეგ უთამაშია. "დიახ, ის შესანიშნავი ფეხბურთელი იყო, მითხრა მან, თუმცა ცოტა გიჟიც იყო.

ახლაც მახსოვს, რამხელა მოლოდინი მქონდა, როცა მამასთან და მეგობრებთან ერთად "ლას პალმასის" თამაშებზე მივდიოდი. ის დრო აღარ განმეორდება. ტკბილ ბავშვობას აღარავინ დააბრუნებს", - ამბობს ვიტოლო.

შერყეულ ინგლისელს, ვინც მინდორზე არაფერს ერიდებოდა, ძალიან ხშირად აძევებდნენ მინდვრიდან, თუმცა "ლას პალმასის" ფანებს ის განსაკუთრებით უყვარდათ. ვიტოლო ამბობს, რომ ის ინგლისელს ვერასოდეს დაივიწყებს.

ვიტოლო დღესაც დიდი ფანია "ლას პალმასისა". როცა გუნდი პრიმერას დაუბრუნდა, მან "სევილიას" ევროპალუგური ტრიუმფის ზეიმი შეიკვეცა და მშობლიურ გუნდთან ერთადაც შეირგო ლხინი.

"ჯერ "სევილიასთან" ერთად ვიზეიმე ევროპალიგის მოგება, მერე კი "ლას პალმასის" ბიჭებთან ერთად გავიზიარე პრიმერაში დაბრუნების ბედნიერება. ზეიმზე კლუბის პრეზიდენტმა დამპატიჟა. უნდა გითხრათ, რომ ძალიან ბედნიერი ვიყავი. ერთი სიამოვნება იყო ბიჭებთან და კლუბის ერთგულ გულშემატკივრებთან ერთად ყოფნა", - ამბობს ვიტოლო.

კანარის კუნძულების საფეხბურთო სიამაყეა დავიდ სილვა. მასთან ერთად ესპანეთის ნაკრებში დღეს ვიტოლოც თამაშობს.

"2008 წელს დავიდ სილვა უკვე მნიშვნელოვანი ფეხბურთელი იყო ესპანეთის ნაკრებისათვის. მე მაშინ "ლას პალმასში" ვიყავი. ის დიდი ფეხბურთელია. ბოლოს და ბოლოს, ამდენი მატჩი ჩაატარა ესაპანეთის ნაკრებში. ის ჩემთვის ლეგენდაა და იმის მაგალითია, რომ კანარის კუნძულებზე დაბადებულ ბიჭებსაც შეუძლიათ დიდი სიმაღლეების დაპყრობა".

თან პრემიერლიგისკენ უწევს გული და თან "სევილია" ძალიან უყვარს. "რაღაც განსაკუთრებული გუნდია. აქ მოდიან ფეხბურთელები, რომლებსაც საქმე კარგად არ მიუდით და მერე ათამაშდებიან ხოლმე. მე მხოლოდ ორ მაგალითს მოვიყვან - სტივენ ნ'ზოზი და ევერ ბანეგა".

ის ამბობს, რომ ოჯახთან ერთად ბედნიერია "სევილიაში", მაგრამ პრემიერლიგასაც უხსნის სიყვარულს. მოკლედ, დავიცადოთ...

ყოველდღიური სპორტული გაზეთი "ლელო"