გერმანია. ბუნდესლიგა. XIV ტურის შეჯამება და სიმბოლური: პენალტების ტური

ბუნდესლიგის მე-14 ტურში იმდენი პენალტი დაინიშნა, რამდენიც ბოლო 14 წლის განმავლობაში გერმანიის ჩემპიონატის არცერთ ტურში არ დანიშნულა. მსაჯებმა თერთმეტმეტრიანის ნიშნულისკენ, ჯამში, რვაჯერ მიუთითეს - სწორედ ამდენი პენალტი დაინიშნა 1999/2000 წლების სეზონის მეორე ტურშიც. ყველაზე მეტი პენალტი კი ბუნდესლიგის ისტორიაში 1971/72 წლების სეზონის ერთ-ერთ ტურში დაფიქსირდა - 12.

პოზიტივები
- მარტო "მაინცისა" და "დორტმუნდის" მატჩში, რომელიც "ბორუსიამ" 3:1 მოიგო, მსაჯმა დენიზ აითექინმა სამი პენალტი დანიშნა. სამივე თერთმეტმეტრიანი - აბსოლუტურად სამართლიანად. დორტმუნდელებმა სწორედ დასკვნით ფაზაში, რობერტ ლევანდოვსკის მიერ გატანილი ორი პენალტით მოიგეს.

- ბუნდესლიგის მიმდინარე სეზონში მეოთხედ მოხდა ისე, რომ ლევანდოვსკიმ ერთ მატჩში მინიმუმ ორი გოლი გაიტანა. საერთო ჯამში კი, პოლონელის ანგარიშზე 11 გოლია, რითაც რობერტი ბომბარდირთა დავაში პირველ ადგილზეა.

- "ჰოფენჰაიმისა" და "ვერდერის" მატჩი შესანიშნავი საფეხბურთო სპექტაკლი იყო, რომელიც 4:4 დამთავრდა და იქაც სამი თერთმეტმეტრიანი ვიხილეთ. სეიად სალიჰოვიჩმა დუბლი სწორედ პენალტებით შეასრულა (მეორე პანენკას სტილში დაარტყა). აქვე ისიც აღვნიშნოთ, რომ სალიჰოვიჩმა გოლი კევინ ფოლანდსაც გაატანინა.

- ბრემენელები "ჰოფენჰაიმთან" ორჯერ ორბურთიანი სხვაობით აგებდნენ და მაინც მოახერხეს ანგარიშის გათანაბრება, რისთვისაც, ცხადია, ქებას იმსახურებენ. "მუსიკოსებისგან" საუკეთესო აარონ ჰანტი გახლდათ, რომელმაც პირველი ტაიმის მიწურულს ჯერ (ასევე პენალტით) სხვაობა შეამცირა, მერე კი, მსაჯის მიერ დამატებულ წუთებზე ელჯერო ელიასაც გაატანინა.

- ამ ტურში გოლი ასევე პენალტით გაიტანა ჯეფერსონ ფარფანმაც - "შალკემ" "შტუტგარტს" 3:0 მოუგო, ფარფანის პენალტი კი მეორე გახლდათ. მანამდე სწორედ ჯეფერსონმა გახსნა ანგარიში.

- "ბრაუნშვაიგთან" 2:0-ზე მოგებულ მატჩში ტიაგო ალკანტარამ "ბაიერნის" ფორმით მოედანზე 90 წუთი პირველად გაატარა და ერთ-ერთი საუკეთესო იყო. გვარდიოლას ერთ-ერთი უსაყვარლესი ფეხბურთელი ბურთს 154-ჯერ შეეხო და რეკორდმაისტერის თითქმის ყველა შეტევაში მონაწილეობდა.

- მატჩის გმირი კი არიენ რობენი გახლდათ, რომელმაც ბუნდესლიგის მიმდინარე სეზონში მეხუთე და მეექვსე გოლები გაიტანა. ეს რობენის კარიერაში საიუბილეო, რიგით მე-500 ოფიციალური მატჩი იყო.

- "მანჩესტერ იუნაიტედთან" გადატანილი შოკის (0:5) შემდეგ "ლევერკუზენის" წინა ხაზი ისევ ამოქმედდა. სიდნი სემის არყოფნაში, ჰეონ-მინ სონმა დუბლი შეასრულა (მეხუთე და მეექვსე გოლები ამ სეზონში), შტეფან კისლინგმა კი მე-9 გოლი გაიტანა.

- მიონხენგლადბახის "ბორუსია" საკუთარ მოედანზე ისევ აუღებელ ციხესიმაგრედ რჩება და პირადი რეკორდიც დაამყარა. "ფრაიბურგთან" რაფაელის გოლით მოპოვებული გამარჯვება (1:0) "გლადბახისთვის" ამ სეზონის მეშვიდე საშინაო მატჩში მეშვიდე მოგება გახლდათ, რაც თავის დროზე (70-იან წლებში) თვით ლეგენდარულმა "გლადბახმაც" კი ვერ შეძლო.

- ჰანოვერელებმა და მათმა თავკაცმა მირკო სლომკამ შვებით ამოისუნთქეს: "აინტრახტთან" მოპოვებული გამარჯვება (2:0) "ჰანოვერისთვის" მეექვსე ტურის შემდეგ პირველი მოგება გახლდათ.

ნეგატივები
- აი, "აინტრახტი" კი უკვე სავალალო მდგომარეობაშია. არმინ ფეეს გუნდმა ევროპალიგის ჯგუფური ეტაპი კი გადალახა, მაგრამ ბუნდესლიგაში 14 ტურის შემდეგ მე-15 ადგილზეა და დღევანდელი გადასახედიდან, გადარჩენისთვის უნდა იბრძოლოს.

- "ნიურნბერგი" "ლევერკუზენთან" 0:3-ის შემდეგ ისევ მოუგებელია. გუნდს 14 ტურის შემდეგ მოგება არ ჰქონდეს, ეს ბუნდესლიგის ისტორიაში მხოლოდ მესამე შემთხვევაა. უკვე ცხადია, რომ ფრანკებს ახალი მწვრთნელის (გერტიან ვერბეეკი) დანიშვნამაც ვერ უშველათ.

- "მაინცისა" და "დორტმუნდის" შეხვედრაში, ფინალურ სასტვენამდე 12 წუთით ადრე ტაბლოზე 1:1 ენთო და მაინცელებმა ეს ანგარიში რომ ვერ შეინარჩუნეს, ეს, პირველ რიგში, ელკინ სოტოს ბრალია, რომელმაც საკუთარ საჯარიმოში ბურთი ხელით ჩამოხსნა...

- "ჰოფენჰაიმს" და "ვერდერს" დაცვის ხაზი არ უვარგათ, რაზეც მათ შორის გაჩაღებული თვალსასეირო ბურთაობის საბოლოო შედეგიც ნათლად მეტყველებს - 4:4.

- ლევერკუზენელმა გონსალო კასტრომ "ნიურნბერგთან" საკმაოდ კარგად ითამაშა, მაგრამ მარკუს ფოილნერს ისე ეუხეშა, რომ "ნეგატივებში" მოხვდა. კასტროს ძალიან გაუმართლა, მოედნიდან რომ არ გააძევეს.

- ბრაუნშვაიგელები "ბაიერნს", რა თქმა უნდა, დაცვაში ჩაუსხდნენ, მაგრამ მათი გეგმა უკვე 111-ე წამზე ჩაიშალა - რობენმა ანგარიში გახსნა.

- სამაგიეროდ, დაცვაში მთელი მატჩის განმავლობაში შესაშურად კარგად იდგნენ აუგსბურგელები. "ჰერტამ" მათი ბეტონის წინააღმდეგ ვერაფერი გააწყო - 0:0.

- "შტუტგარტი" "შალკესთან" 0:3 განადგურდა, რაც შვაბებისთვის ზედიზედ მეორე წაგება გახლდათ და ევროპის ზონას უკვე 7 ქულით ჩამორჩებიან.

XIV ტურის სიმბოლური ნაკრები, ლელოს ვერსიით
(4-2-3-1)


XIV ტურის გმირი

არიენ რობენი (ბაიერნი)

მისი უშუალო მეურვე ნორმან თოიერკაუფი მატჩის შემდეგ მართლა ცუდად იყო. თოიერკაუფისთვის ეს ბუნდესლიგაში მე-12 შეხვედრა გახლდათ და მაინცდამაინც საუკეთესო ფორმაში მყოფ არიენ რობენთან მოუხდა ჭიდილი და რა გასაკვირია, რომ მაგრად დაიჩაგრა. რობენი მას თითქმის მთელი მატჩის განმავლობაში კატა-თაგვობანას ეთამაშებოდა. ჰოლანდიელი, რომელმაც დუბლი შეასრულა, მართლაც ბრწყინვალე ფორმაშია.

საუკეთესო ფეხბურთელები
"კიკერის" შეფასებების მიხედვით

ფეხბურთელი კლუბი თამაში საშუალო შეფასება
1. არიენ რობენი ბაიერნი 12 2.19
2. ფრანკ რიბერი ბაიერნი 11 2.20
3. მარკო როისი დორტმუნდი 14 2.43
4. ფილიპ ლამი ბაიერნი 13 2.50
5. სიდნი სემი ლევერკუზენი 13 2.50
6. სვენ ულრაიხი შტუტგარტი 11 2.50
7. ტონი კროოსი ბაიერნი 14 2.55
8. ბერნდ ლენო ლევერკუზენი 14 2.57
9. პიერ-მიშელ ლასოგა ჰამბურგი 10 2.63
10. მაქს კრუზე გლადბახი 14 2.64

გოლს პლუს პასის რეიტინგი

ფეხბურთელი კლუბი თამაში გოლი პასი ქულა
1. რობერტ ლევანდოვსკი დორტმუნდი 14 11 5 16
2. შტეფან კისლინგი ლევერკუზენი 14 9 4 13
3. მაქს კრუზე გლადბახი 14 7 6 13
4. ალექსანდრუ მაქსიმი შტუტგარტი 12 4 8 12
5. მარკო როისი დორტმუნდი 14 7 5 12
6. სიდნი სემი ლევერკუზენი 13 7 5 12
7. რაფაელ ვან დერ ვაარტი ჰამბურგი 12 6 6 12
8. რაფაელი გლადბახი 14 7 4 11
9. ადრიან რამოსი ჰერტა 14 7 4 11
10. ფრანკ რიბერი ბაიერნი 11 4 7 11

ყოველდღიური სპორტული გაზეთი "ლელო"

ასევე იხილეთ:
გერმანია. ბუნდესლიგა. XIV ტური: გაუთბეთ რობენს ფეხები! [VIDEO]