გერმანია. ბუნდესლიგა. XX ტური: ჯანყი ჰამბურგში [VIDEO]

ჯერ კიდევ ერთი კვირის წინ ვწერდით, რომ თუ "ჰამბურგი" "ჰერტასთანაც" დამარცხდებოდა, გერმანიის ერთ-ერთ ყველაზე საამაყო ქალაქში ცუდი ამბები დატრიალდებოდა და ყველაფერი სწორედ ასე მოხდა. უმძიმეს კრიზისში მყოფი "ბუნდესლიგის უკანასკნელი დინო" საკუთარ მოედანზე "ჰერტასთან" 0:3 შერცხვა, რაც იმას ნიშნავს, რომ "ჰამბურგი" მეორე ბუნდესლიგისკენ ელვის სისწრაფით მიექანება, ამან კი კლუბის ქომაგებს მოთმინების ფიალა აუვსო!

მატჩის შემდეგ "ჰამბურგის" 300-ზე მეტმა ფანმა მთავარი ტრიბუნის წინ მოიყარა თავი და დირექტორთა საბჭოს გადაყენება მოითხოვა. საბჭოს თავმჯდომარე კარლ ედგარ იარხოვმა კი ფანებთან მისვლა და მათთან დალაპარაკება გადაწყვიტა - ეგონა, ამით ვითარებას განმუხტავდა, მაგრამ ცეცხლზე ნავთის დასხმა გამოუვიდა.

სწორედ მისი გამოჩენის დროს გამძაფრდა ფანების აგრესია - მათ ფეხბურთელებს ესროლეს ყველაფერი, რაც ხელში მოხვდათ. ისროდნენ კვერცხებსაც - როგორც ჩანს, წინასწარ ჰქონდათ მომარაგებული. კულმინაცია ის იყო, რომ თავდამსხმელ ჟაკ ზუას ერთ-ერთი საგანი თავში მოხვდა და დაეცა. კამერუნელი სტადიონის მომსახურე პერსონალმა და თანაგუნდელებმა გაიყვანეს - ზუა ცრემლებს ვერ იკავებდა. აბობოქრებული გულშემატკივრები ახალწვეული ოლა ჯონის ავტომობილს არ უშვებდნენ და სანამ საქმეში პოლიცია არ ჩაერია, ფეხბურთელმა განრისხებულ ფანებს თავი ვერ დააღწია.

დაძაბული მდგომარეობა იყო მატჩისშემდგომ პრესკონფერენციაზეც, სადაც სამეთვალყურეო საბჭოს წევრებმაც მოიყარეს თავი. ისინი მთავარი მწვრთნელის, ბერტ ვან მარვეიკის გაგდებას მოითხოვდნენ. თუმცა ეს მხოლოდ დირექტორთა საბჭოს შეუძლია და საქმე იმაშია, რომ იარხოვი და კომპანია ჰოლანდიელი მწვრთნელის გაშვებას არ აპირებენ.

სამეთვალყურეო საბჭო კი, იმ შემთხვევაში, თუ ვან მარვეიკს არ გაათავისუფლებენ, დირექტორთა საბჭოს იმპიჩმენტით იმუქრება.

ერთი სიტყვით, "ჰამბურგში", როგორც ყოველთვის, სრული ქაოსია. რაც შეეხება "ჰერტას" - ბერლინელებმა უსუსურ მეტოქესთან ისე ითამაშეს, როგორც საჭირო იყო. სამიდან ორი გოლი ადრიან რამოსის ანგარიშზეა, რომელმაც თავიდან პენალტი ვერ გამოიყენა.

ლამმაც გაიტანა
მიუნხენის "ბაიერნისთვის" ვერც გამოცოცხლებული "ნიურნბერგი" გამოდგა ხეირიანი მეტოქე. მეტიც: მიუნხენელთაგან გოლი ახლა თვით ფილიპ ლამმაც კი გაიტანა - ეს გახლდათ კაპიტნის პირველი გოლი 2010 წლის შემდეგ. არადა, "ნიურნბერგმა" თავიდან ძალიან კარგად დაიწყო: ფრანკებმა 17 წუთში მიუნხენელთა კარისკენ 6-ჯერ დაარტყეს, მაგრამ ანგარიში მაინც რეკორდმაისტერმა გახსნა. მე-18 წუთზე გიოტცემ მარცხენა ფრთაზე ბურთი დავიდ ალაბას გაატანა, ამ უკანასკნელმა კი მარიო მანჯუკიჩისკენ ჩააწოდა, რომელმაც ბურთი კარში ვარდნაში გადაგზავნა.

ეს გახლდათ ხორვატის მე-12 გოლი ბუნდესლიგის მიმდინარე სეზონში და აქვე ისიც უნდა ვთქვათ, რომ მანჯუკიჩის საყვარელი მეტოქე სწორედ "ნიურნბერგია" - მე-6 შეხვედრაში მან ფრანკების კარი მეშვიდედ დალაშქრა.

ნიურნბერგელები კი იმის გამოც დამწუხრდნენ, რომ ჩენდლერი და გინჩეკი მალევე გახდნენ შესაცვლელები. მიუნხენელები ამასობაში დალაგდნენ და თავიანთი ფეხბურთის თამაშს შეუდგნენ. აღსანიშნავია, რომ რობენი და მიულერი ხშირად ცვლიდნენ ფლანგებს. პირველივე ტაიმში რობენის საჯარიმო დარტყმის შემდეგ ბურთი ძელს მოხვდა, მოგვიანებით კი ძელი მიულერმაც (თავური დარტყმის შემდეგ) მოიკითხა.

რაც შეეხება ლამის გოლს: 49-ე წუთზე ფილიპი ცენტრფორვარდის პოზიციაზე აღმოჩნდა და მანჯუკიჩს კარგი პასი დაუფასა.


"დორტმუნდი" ფორმაში შევიდა
თუმცა "ბაიერნის" უპირატესობა ამჯერად აღარ გაიზარდა, რადგან მოიგო "ლევერკუზენმაც". ფარმაცევტებმა პარასკევს ძალიან რთული გამარჯვების მოპოვება მოახერხეს: სამი ჰიიპიას გუნდმა მიონხენგლადბახში სონის გოლით იმარჯვა და სამი ქულის წაღება შეძლო. აი, მესამე ადგილზე კი ისევ დორტმუნდის "ბორუსია" აღზევდა - იურგენ კლოპის გუნდმა ბრემენის "ვერდერი" 5:1 გაანადგურა.

"ჰამბურგისა" არ იყოს, "ვერდერის" უსუსურობაც არავის უკვირს და ლოგიკურია ისიც, რომ "დორტმუნდმა" ფორმის აკრეფა სწორედ "მუსიკოსებთან" დიდი ანგარიშით გამარჯვებით დაიწყო. ანგარიში რობერტ ლევანდოვსკიმ გახსნა, რომელსაც 475-წუთიანი უგოლო სერია ჰქონდა. ჰენრიხ მხითარიანმა დუბლი შეასრულა და აქვე ისიც ვთქვათ, რომ 25 მილიონ ევროდ ნაყიდ სომეხს მანამდე 1066 წუთის (!) განმავლობაში არ გაეტანა.

გაუბედურებულ ბრემენელთა რიგებში დაკვირვების ობიექტი ახალწვეული ობრანიაკი გახლდათ, რომელმაც მხოლოდ ის დაამტკიცა, რომ ფეხბურთის თამაში შეუძლია.

ზედიზედ ორი მარცხის შემდეგ კრიზისიდან გამოსვლის გზას დაადგა "ვოლფსბურგიც", რომელმაც შაბათს "მაინცის" გამწარება (3:0) მოახერხა. "მგლების" დამრიგებელმა დიტერ ჰეკინგმა ძირითადი შემადგენლობა ოდნავ შეცვალა და თავდასხმაში ივიცა ოლიჩის ნაცვლად ბას დოსტი ვიხილეთ - მეორე გოლი სწორედ ამ უკანასკნელის ანგარიშზეა.

ფრანკფურტის "აინტრახტმა" ბრაუნშვაიგული სეხნია იოლად დაამარცხა (3:0), "ფრაიბურგმა" და "ჰოფენჰაიმმა" კი ქულები გაიყვეს (1:1).


ბუნდესლიგა. XX ტური

გლადბახი-ლევერკუზენი 0:1
გოლი: 0:1 სონი (62)
გლადბახი (4-2-2-1-1): ტერ შტეგენი - ნორდტვეიტი, იანჩკე, შტრანცლი, ვენდტი - კრამერი, ჯაკა (83. მლაპა) - ჰერმანი (67. ჰრგოტა), არანგო (83. იუნესი) - რაფაელი - მ. კრუზე.
ლევერკუზენი (4-1-2-2-1): ლენო - ჰილბერტი, თოფრაქი, სპაჰიჩი, ჩანი - როლფესი - ლ. ბენდერი, კასტრო - სემი (69. დერდიოკი), სონი (81. ჰეგელერი) - კისლინგი (94. ვოლშაიდი).
გაფრთხილება: ჰერმანი, მ. კრუზე - ვოლშაიდი, ჩანი, კისლინგი, დონატი
კუთხური: 4-3; ჯარიმა: 11-15; თამაშგარე: 0-2; კარში დარტყმა: 14(3)-12(3); ბურთის ფლობა: 50%-50%.
მაყურებელი: 53 379

ვოლფსბურგი-მაინცი 3:0
გოლები: 1:0 როდრიგესი (59-პენ), 2:0 დოსტი (66), 3:0 ლუის გუსტავო (75)
ვოლფსბურგი (4-2-3-1): ბენალიო - ოხსი, ნალდო, კნოხე, როდრიგესი - ლუის გუსტავო, ტრეში (82. მალანდა) - არნოლდი, დე ბრუინი, პერიშიჩი (63. ოლიჩი) - დოსტი (78. მ. შეფერი).
მაინცი (4-1-2-1-2): კარიუსი - პოსპეხი, ბუნგერტი, ბელი, პარკი - გაისი - კოხი (71. პარკერი), მორიტცი (6. ჟუნიორ დიასი) - კოო (71. ნ. მიულერი) - ოკაზაკი, ჩუპო-მოტინგი.
გაფრთხილება: ლუის გუსტავო, ნალდო - კოხი, ბელი
კუთხური: 4-1; ჯარიმა: 22-14; თამაშგარე: 0-7; კარში დარტყმა: 17(7)-8(2); ბურთის ფლობა: 64%-36%.
მაყურებელი: 23 520

ვერდერი-დორტმუნდი 1:5
გოლები: 0:1 ლევანდოვსკი (26), 0:2 მხითარიანი (41), 0:3 მ. ფრიდრიხი (48), 0:4 მხითარიანი (62), 0:5 ლევანდოვსკი (85), 1:5 აიჩიჩეკი (89)
ვერდერი (4-2-3-1): ვოლფი - გებრე სელასიე, პრიოდლი, ლუკიმია, კალდიროლა - ბარგფრედე, იუნუზოვიჩი - ელია (55. კობილანსკი), ჰანტი (79. აიჩიჩეკი), ობრანიაკი - დი სანტო (55. პეტერსენი).
დორტმუნდი (4-2-3-1): ვაიდენფელერი - პიშჩეკი, მ. ფრიდრიხი, სოკრატისი, შმელცერი - ს. ბენდერი (65. კელი), ნ. შაჰინი - ობამეიანგი (77. ი. ჰოფმანი), მხითარიანი, როისი (65. გროსკროიტცი) - ლევანდოვსკი.
გაფრთხილება: დი სანტო, კობილანსკი - მ. ფრიდრიხი, სოკრატისი
კუთხური: 5-9; ჯარიმა: 18-12; თამაშგარე: 3-1; კარში დარტყმა: 11(5)-15(8); ბურთის ფლობა: 46%-54%.
მაყურებელი: 42 100

ნიურნბერგი-ბაიერნი 0:2
გოლები: 0:1 მანჯუკიჩი (18), 0:2 ლამი (49)
ნიურნბერგი (4-1-4-1): რ. შეფერი - ჩენდლერი (10. ანგა), პეტრაკი, პინოლა, პლატენჰარდტი - ფრანტცი - დრმიჩი, ფოილნერი, კიოტაკე, ჰლუშეკი (76. გებჰარტი) - გინჩეკი (22. პეკჰარტი).
ბაიერნი (4-2-3-1): ნოიერი - რაფინია, ჟ. ბოატენგი, დანტე, ალაბა - ლამი, ტიაგო ალკანტარა - თ. მიულერი (72. ხავი მარტინესი), გიოტცე, რობენი (81. შაჩირი) - მანჯუკიჩი (85. პისარო).
გაფრთხილება: ჰლუშეკი, პინოლა - ლამი, მანჯუკიჩი, თ. მიულერი
კუთხური: 3-5; ჯარიმა: 26-21; თამაშგარე: 6-1; კარში დარტყმა: 9(2)-18(6); ბურთის ფლობა: 36%-64%.
მაყურებელი: 50 000

ფრაიბურგი-ჰოფენჰაიმი 1:1
გოლები: 1:0 შმიდი (68), 1:1 მოდესტე (85)
ფრაიბურგი (4-2-2-1-1): ბაუმანი - მუიჯა, კრმასი, ჰიონი, ზორგი - გინტერი, ფერნანდესი - შმიდი, კლაუსი - დარიდა (84. ჰანკე) - მეჰმედი.
ჰოფენჰაიმი (4-2-3-1): კასტეელსი - შტრობლი, აბრაამი (76. ვესტერგაარდი), ზიულე, ბეკი - რუდი (74. მოდესტე), პოლანსკი - ფოლანდი, სალიჰოვიჩი, ჰერდლინგი (74. შიპლოკი) - რობერტო ფირმინო.
გაფრთხილება: მუიჯა, დარიდა, გინტერი - რუდი, ჰერდლინგი
კუთხური: 3-2; ჯარიმა: 21-15; თამაშგარე: 3-2; კარში დარტყმა: 11(4)-18(4); ბურთის ფლობა: 49%-51%.
მაყურებელი: 22 300

აინტრახტი-ბრაუნშვაიგი 3:0
გოლები: 1:0 ფლუმი (7), 2:0 ა. მაიერი (43), 3:0 აიგნერი (44)
აინტრახტი (4-1-2-1-2): ტრაპი - ს. იუნგი, სამბრანო, რუსი, ჯაპკა - შვეგლერი (33. მადლუნგი) - როდე, ფლუმი (46. ბარნეტა) - ა. მაიერი - აიგნერი, კადლეცი (82. ხოსელუ).
ბრაუნშვაიგი (4-2-2-2): დავარი - კესელი, ბიჩაქჩიჩი, დოგანი, რაიხელი - კრატცი (86. კორეია), თოიერკაუფი - ელაბდელაუი (46. კუმბელა), ჰოხშაიდტი (72. ბოლანდი) - ბელარაბი, ნილსენი.
გაფრთხილება: ს. იუნგი, აიგნერი - თოიერკაუფი
კუთხური: 10-2; ჯარიმა: 14-23; თამაშგარე: 2-2; კარში დარტყმა: 19(7)-10(1); ბურთის ფლობა: 58%-42%.
მაყურებელი: 40 500

ჰამბურგი-ჰერტა 0:3
გოლები: 0:1 ალაგი (15), 0:2 რამოსი (23), 0:3 რამოსი (38)
ჰამბურგი (4-2-3-1): ადლერი - ლამი, ჯურუ, ვესტერმანი, იანსენი - ბადელი, ბუი (46. არსლანი) - ჯონი, ვან დერ ვაარტი, ჩალჰანოღლუ (61. ილიჩევიჩი) - ზუა.
ჰერტა (4-2-3-1): კრაფტი - მ. ნდიენგი, ს. ლანგკამპი, კობიაშვილი, პეკარიკი - ჰოსოგაი, ჩიგერჩი (81. რონი) - ალაგი, სკიელბრედი (69. ნიმაიერი), ვან დერ ბერგი - რამოსი (86. ვაგნერი).
მე-15 წუთზე რამოსმა (ჰერტა) ვერ გამოიყენა პენალტი (მეკარე)
გაფრთხილება: არსლანი, ვესტერმანი
კუთხური: 8-3; ჯარიმა: 17-12; თამაშგარე: 1-3; კარში დარტყმა: 14(3)-10(4); ბურთის ფლობა: 63%-37%.
მაყურებელი: 48 593

შტუტგარტი-აუგსბურგი 1:4
გოლები: 0:1 მილიკი (35), 0:2 ჰანი (43), 0:3 ჰანი (56), 1:3 რაუში (62), 1:4 ტო. ვერნერი (64)
შტუტგარტი (4-2-2-1-1): ულრაიხი - გ. საკაი, შვააბი, რიუდიგერი, რაუში (91. ბოკა) - რ. ხედირა, ლაიტნერი - აბდელაუ, ტი. ვერნერი (75. იალჩინი) - მაქსიმი (63. კაკაუ) - იბიშევიჩი.
აუგსბურგი (4-2-3-1): მანინგერი - ვერჰეგი, კალსენ-ბრაკერი (84. ჰონგი), კლავანი, ოსტრცოლეკი - ბაიერი, კორი - ჰანი (77. ესვაინი), ჰალილ ალთინთოფი, ტო. ვერნერი - მილიკი (66. ჟი).
გაფრთხილება: რ. ხედირა, იალჩინი
გაძევება: იბიშევიჩი (53. შტუტგარტი)
კუთხური: 5-2; ჯარიმა: 9-8; თამაშგარე: 2-7; კარში დარტყმა: 16(1)-10(5); ბურთის ფლობა: 50%-50%.
მაყურებელი: 40 200

შალკე-ჰანოვერი 2:0
გოლები: 1:0 ფარფანი (39), 2:0 მ. მაიერი (44)
შალკე (4-2-3-1): ფერმანი - უჩიდა, მატიპი, ფელიპე სანტანა, კოლასინაცი - კ. ბოატენგი, ნოიშტედტერი (32. აიჰანი) - ფარფანი, მ. მაიერი, ობასი (84. გორეტცკა) - ჰუნტელაარი (80. სალაი).
ჰანოვერი (4-2-2-2): ცილერი - რაიტორალი, მარსელო, ჰოფმანი, კ. შულცი - შმიდებახი, შტინდლი - ჰუსტი (73. შლაუდრაფი), ბიტენკური (65. პრიბი) - რუდნევსი, მ. დიუფი.
გაფრთხილება: ჰუსტი, რუდნევსი
კუთხური: 5-0; ჯარიმა: 10-20; თამაშგარე: 3-0; კარში დარტყმა: 16(7)-6(1); ბურთის ფლობა: 57%-43%.
მაყურებელი: 61 307

მომდევნო ტური
14 თებერვალი:
მაინცი-ჰანოვერი
15 თებერვალი:
დორტმუნდი-აინტრახტი, ბაიერნი-ფრაიბურგი, ვერდერი-გლადბახი, ჰოფენჰაიმი-შტუტგარტი, ბრაუნშვაიგი-ჰამბურგი, ლევერკუზენი-შალკე
16 თებერვალი:
აუგსბურგი-ნიურნბერგი, ჰერტა-ვოლფსბურგი

ბომბარდირები: 14 - ადრიან რამოსი (ჰერტა); 13 - რობერტ ლევანდოვსკი (დორტმუნდი); 12 - მარიო მანჯუკიჩი (ბაიერნი); 11 - პიერ-ემერიკ ობამეიანგი (დორტმუნდი); 10 - იოზიპ დრმიჩი (ნიურნბერგი), ვედად იბიშევიჩი (შტუტგარტი), შტეფან კისლინგი (ლევერკუზენი).

ყოველდღიური სპორტული გაზეთი "ლელო"