გერმანია. ბუნდესლიგა. XIV ტური: გვარდიოლამ რევანში აიღო [VIDEO]

* "ვოლფსბურგს" არასოდეს ჰქონდა 29 ქულა 14 ტურის შემდეგ.

* "აუგსბურგმა" არსებობის ისტორიაში პირველად მოიგო ზედიზედ ოთხი მატჩი.

* ფრანკ რიბერის "ბაიერნში" 100 გოლი დაუგროვდა.

* "დორტმუნდმა" პირველად მოიგო შინ ზედიზედ ორი შეხვედრა.

* რობერტო დი მატეომ პირველი ქულები აიღო სტუმრად.

"ბაიერნისა" და "ლევერკუზენის" შეხვედრას ყველა მოუთმენლად ელოდა, მაგრამ წინასწარ გამოცხადებული სუპერმატჩის ნაცვლად, საკმაოდ უსუსური სანახაობა მივიღეთ...

არადა, ტურის ცენტრალურ მატჩს ძალიან კარგი დასაწყისი ჰქონდა. ხოსეპ გვარდიოლას, სავარაუდოდ, მესამე წუთზე გაახსენდებოდა გასულ ზამთარს როჯერ შმიდტის "ზალცბურგთან" 0:3 წაგება.

სტუმრების აქტიური პრესინგით დაბნეულმა ბოატენგმა მოგერიებისას ბურთი ჩაბი ალონსოს გაარტყა. ესპანელისგან ბურთი ბელარაბის მიუვიდა, რომელიც ნოიერთან პირისპირ გავიდა და დარტყმა მოასწრო. გოლი? არა... ბერნატმა ბოლო მომენტში ცარიელი კარიდან გამოიტანა ბურთი. მალე მასპინძლების კართან კიდევ ერთი მომენტი შეიქმნა - მარჯვნიდან ჰეონ-მინ სონმა ჩააწოდა, მაგრამ კისლინგმა ბურთს ფეხი ვერ მოარტყა.

მიუნხენელები მხოლოდ მეათე წუთისთვის მოვიდნენ გონს, მაგრამ ბურთის ხანგრძლივი ფლობის გარდა, განსაკუთრებულ ხიფათს ვერ ქმნიდნენ ლენოს კართან. საქმე ისაა, რომ ლევერკუზენელები თავდაუზოგავად იცავდნენ თავს და მუდმივ პრესინგში ჰყავდათ მეტოქე.

"ბაიერნისთვის" ასეთი მდგომარეობა იმდენად უჩვეულო აღმოჩნდა, რომ პირველ ტაიმში ერთი ზუსტი დარტყმაც კი არ შეუსრულებია. რთული გასახსენებელია, ბოლოს როდის მოხდა ასეთი რამ რეკორდმაისტერის თამაშში. სტუმრები კი ბედს კონტრშეტევებში ეძებდნენ და ბელარაბის, კისლინგსა და სხვებს პერიოდულად შანსები ექმნებოდათ. მოკლედ, პირველ ტაიმში აშკარად შმიდტის ტაქტიკამ გაამართლა.

მაგრამ შესვენებაზე გვარდიოლამ ბრწყინვალე სვლა გააკეთა. გიოტცეს ნაცვლად მოედანზე როდე შეუშვა. ამ უკანასკნელმა ორთაბრძოლების 81 პროცენტი მოიგო და ერთადერთ გოლშიც მიიღო მონაწილეობა. ექსაინტრახტელმა ერთ-ერთ ეპიზოდში ბოლომდე იბრძოლა და კუთხური მოუტანა თავის გუნდს. ბავარიელებმა სტანდარტული გაითამაშეს: რაფინიას ჩაწოდების შემდეგ ჩაბი ალონსომ თავით ბურთი დაუგდო რიბერის. ფრანგმა ცაციათი ძლიერად და ზუსტად დაარტყა და "ბაიერნის" მაისურით კარიერაში მე-100 გოლი გაიტანა.

"ბაიერნმა" წარმატების განვრცობა სცადა და ზედიზედ სამი მომენტი შექმნა: მიულერის დარტყმა ლენოს გავლით ძელს მოხვდა, რობენს მეკარემ აუღო, ხოლო ლევანდოვსკიმ სამი მეტრიდან ცარიელ კარს ააცილა ბურთი. ამის შემდეგ მიუნხენელებმა თამაში ბოლომდე გააკონტროლეს, სტუმრებს კი მეორე ტაიმში საერთოდ არაფერი გამოუვიდათ და ნული დარტყმით დაასრულეს მეორე ნახევარი.

მოკლედ, "ბაიერნმა" სრულიად დამსახურებულად მოიგო ზედიზედ მეხუთე მატჩი და ვადაზე ადრე შემოდგომის არაოფიციალური ჩემპიონიც გახდებოდა, რომ არა "ვოლფსბურგის" მოგება სტუმრად "ჰანოვერთან".


"მგლებმა" ძალიან მალე გახსნეს ანგარიში, მაგრამ პირველი ტაიმის ბოლოს ხოსელუსგან გაუშვეს და ყველაფრის თავიდან დაწყება მოუწიათ. პირველი ნახევარი აშკარად "ჰანოვერისა" იყო, რომელმაც 13:4 მოუგო დარტყმებში მეტოქეს და ბევრჯერ შეაწუხა ბენალიო, მეორეში კი სურათი შეიცვალა - დარტყმების შეფარდება 11:3 იყო "ვოლფსბურგის" სასარგებლოდ. მატჩის გმირად კი სტუმრების მთავარი მწვრთნელი დიტერ ჰეკინგი უნდა დავასახელოთ, რომელმაც ორი შეცვლა გამოიცნო: დოსტი და არნოლდი მოედანზე წესიერად გასულები არ იყვნენ, რომ იქვე ორჯერ შეცვალეს ანგარიში საკუთარი გუნდის სასარგებლოდ.

"ვოლფსბურგს" თავისი არსებობის ისტორიაში არასოდეს ჰქონია 14 ტურის შემდეგ 29 ქულა. 2008-09 წლებში, როცა "მგლები" ჩემპიონები გახდნენ, მონაგარი მხოლოდ 19 ქულა იყო და ჩამორჩენა ლიდერთან შვიდ ქულას აღწევდა. ასეთი სხვაობაა ახლაც "ბაიერნთან". სხვათა შორის, "ვოლფსბურგი" ერთადერთი გუნდია ისტორიაში, რომელსაც 7-ქულიანი ჩამორჩენის შემდეგ (14 ტურის შემდეგ) აქვს მოგებული ჩემპიონატი.

ტური გაიხსნა "დორტმუნდისა" და "ჰოფენჰაიმის" შეხვედრით. ბოლოადგილოსანი გუნდის მთავარმა მწვრთნელმა იურგენ კლოპმა ამ მატჩს "გადამწყვეტი" უწოდა და წინა თამაშთან შედარებით, ძირითად შემადგენლობაში ხუთი ცვლილება განახორციელა:

პირველივე წუთებიდან გავიდნენ მინდორზე ლანგერაკი, ჰუმელსი, შმელცერი, გიუნდოგანი და რამოსი. საინტერესოა, რომ პირველად 2013 წლის ჩემპიონთა ლიგის ფინალის შემდეგ, დაცვაში ძველი, საჩემპიონო ოთხეული ვიხილეთ: პიშჩეკი, სუბოტიჩი, ჰუმელსი და შმელცერი. ძალიან მნიშვნელოვანი იყო ჰუმელსის დაბრუნება, რომელმაც ძალიან საიმედოდ ითამაშა და ორთაბრძოლების 71 პროცენტი მოიგო.

"დორტმუნდს" დიდი ანგარიშით მოგება შეეძლო, მაგრამ ილქაი გიუნდოგანის გოლით დაკმაყოფილდა. მან ვარდნაში თავით გაიტანა ობამეიანგის ჩაწოდების შემდეგ - ეს იყო ნახევარმცველის პირველი გოლი 2013 წლის ივლისის შემდეგ. ჩანს, რომ გიუნდოგანი ფორმაში შედის, რადგან "დორტმუნდი" ძალიან კარგად ათამაშებდა ბურთს.

ვერ ვიტყვით, რომ "ჰოფენჰაიმი" უშანსოდ იყო ამ მატჩში. მაგალითად, ერთხელ ჰუმელსმა ცარიელი კარიდან გამოიტანა ბურთი რუდის დარტყმის შემდეგ, თუმცა "ბორუსიას" უდიდეს უპირატესობაზე მეტყველებს ის, რომ ლანგერაკს მთელი 90 წუთის განმავლობაში ერთი დარტყმის მოგერიებაც არ მოუწია.

როგორც ჩანს, წინა ტურში "შტუტგარტის" სტუმრად 4:1 მოგება "ფრაიბურგთან" შემთხვევითობას უნდა მივაწეროთ. "შვაბებს" ჯერ ბევრი სჭირდებათ კრიზისიდან გამოსასვლელად და ეს კარგად გამოჩნდა "შალკესთან" საშინაო მატჩში.

რობერტო დი მატეოს თავისი ახალი გუნდით სტუმრად ქულა არ ჰქონდა აღებული და უნდა გვევარაუდა, რომ ნავსის გატეხვას სწორედ აუტსაიდერთან მატჩში ეცდებოდა. და შეხვედრის დებიუტში ეს საკითხი მოგვარებული იყო. თუ "ვოლფსბურგთან" მატჩში "შალკეს" პირველ ნახევარ საათში ჰქონდა სამი გოლი გატანილი, ამჯერად, ასეთი შედეგიანობისთვის 21 წუთი იკმარა.

შეხვედრას ორი გმირი ჰყავდა - ჩუპო-მოტინგი, რომელმაც სამი გოლი გაიტანა და ბარნეტა, რომელმაც სამი საგოლე პასი შეასრულა. სხვათა შორის, შვეიცარიელი წელს პირველად მოხვდა "შალკეს" ძირითად შემადგენლობაში. რაც შეეხება ჩუპო-მოტინგს, ის ლიდერობს ბუნდესლიგას "გოლი+პასი" სისტემით - 13 ქულა (8 გოლი+5 პასი).

ასე რომ, "შალკემ" წელს პირველად მოიგო ზედიზედ სამი მატჩი და თითქმის ჩემპიონთა ლიგის ზონაშია. "შტუტგარტი" კი კვლავ ბოლო ადგილზე დაეშვა - ჰუუბ სტევენსის გუნდმა ზედიზედ მესამე მატჩი წააგო შინ ისე, რომ გოლი არ გაუტანია.

ძალიან მნიშვნელოვან გამარჯვებას მიაღწია "გლადბახმა" და შეწყვიტა სამმატჩიანი წაგებათა სერია. წარმატებული აღმოჩნდა ლუსიენ ფავრის არჩევანი - ტორგან აზარი ძირითადში დააყენა და ბელგიელმა ნდობა გოლითა და შედეგიანი გადაცემით გაამართლა. "ბორუსია" დაბრუნდა ჩემპიონთა ლიგის საგზურისთვის ბრძოლაში, "ჰერტამ" კი სასწრაფოდ უნდა იზრუნოს სიტუაციის გამოსწორებაზე. ამ გუნდს 14 ტურის შემდეგ რვა წაგება დაუგროვდა. ასეთი მდგომარეობა მას ორჯერ ჰქონდა ისტორიაში და ორივეჯერ გავარდა...

აუცილებლად უნდა ვთქვათ "აუგსბურგის" შესახებ, რომელიც ისტორიული შედეგებით იწონებს თავს: პირველად მოიგო ზედიზედ ოთხი მატჩი და პირველად იმყოფება მესამე ადგილზე. ვაინცირლის გუნდს უკვე იმდენი ქულა აქვს მოპოვებული, რამდენიც შარშან მთლიანად პირველ წრეში ჰქონდა. შთამბეჭდავია ამ გუნდის ბრძოლისუნარიანობა - "აუგსბურგმა" 0:1-დან მესამე მოიგო.

5 დეკემბერი
დორტმუნდი-ჰოფენჰაიმი 1:0
გოლი: 1:0 გიუნდოგანი (17)
დორტმუნდი: ლანგერაკი, პიშჩეკი, სუბოტიჩი, ჰუმელსი, შმელცერი, ს. ბენდერი, კელი, გიუნდოგანი (90+1. გინტერი), მხითარიანი, ობამეიანგი (90+2. იმობილე), რამოსი (83. გროსკროიტცი).
ჰოფენჰაიმი: ბაუმანი, ბეკი, ზიულე, ბიჩაკჩიჩი, კიმი, შვეგლერი (78. სალიჰოვიჩი), პოლანსკი, რუდი (78. ელიუნუსი), ფოლანდი, რობერტო ფირმინო, შიპლოკი (46. მოდესტე).
გაფრთხილება: კელი - ზიულე, შვეგლერი, სალიჰოვიჩი, პოლანსკი
კუთხური: 8-3 ჯარიმა: 19-16 თამაშგარე: 6-3 კარში დარტყმა: 19(13)-6(0) ბურთის ფლობა: 52%-48%
მაყურებელი: 80 000

6 დეკემბერი
გლადბახი-ჰერტა 3:2
გოლები: 1:0 იანტჩკე (9), 1:1 შიბერი (45), 2:1 რაფაელი (53), 3:1 აზარი (83), 3:2 კალუ (90+2-პენ)
გლადბახი: ზომერი, კორბი, იანტჩკე, ბროუერსი, ალვარო დომინგესი, კრამერი, ჯაკა, ჰერმანი, აზარი (84. ჯონსონი), რაფაელი (65. ტრაორე), მ. კრუზე (88. ჰანი).
ჰერტა: კრაფტი, პეკარიკი, ჰეგელერი, ბრუქსი, ვან დენ ბერგი, ჰოსოგაი (72. ჰოსოგაი), ბენ-ჰატირა (72. კალუ), სკიელბრედი, ბეერენსი, შულცი (29. რონი), შიბერი.
გაფრთხილება: ჯაკა, იანტჩკე - ჰეგელერი, ჰოსოგაი, სკეილბრედი
კუთხური: 4-3 ჯარიმა: 19-18 თამაშგარე: 3-3 კარში დარტყმა: 13(8)-11(3) ბურთის ფლობა: 54%-46%
მაყურებელი: 50 190

ჰანოვერი-ვოლფსბურგი 1:3
გოლები: 0:1 დე ბრუინი (4), 1:1 ხოსელუ (45+1), 1:2 დოსტი (69), 1:3 არნოლდი (85)
ჰანოვერი: ცილერი, ჰ. საკაი, მარსელო, კ. შულცი, ალბორნოსი, შმიდებახი, გიულსელამი (75. ა. ზობიხი), ბრიანი (68. ბიტენკურტი), შტინდლი, კიიოტეკე (67. პრიბი), ხოსელუ.
ვოლფსბურგი: ბენალიო, იუნგი, ნალდო, კნოხე, როდრიგესი, ლუის გუსტავო, გილავოგი, ვიერინია (82. არნოლდი), პერიშიჩი (88. შეფერი), დე ბრუინი, ოლიჩი (67. დოსტი).
გაფრთხილება: მარსელო, ჰ. საკაი - დე ბრუინი
კუთხური: 11-9 ჯარიმა: 15-19 თამაშგარე: 2-2 კარში დარტყმა: 16(9)-15(9) ბურთის ფლობა: 50%-50%
მაყურებელი: 41 400

შტუტგარტი-შალკე 0:4
გოლები: 0:1 ჩუპო-მოტინგი (1), 0:2 მაიერი (10), 0:3 ჩუპო-მოტინგი (21), 0:4 ჩუპო-მოტინგი (61)
შტუტგარტი: ულრაიხი, კლაინი (59. გინჩეკი), ბაუმგარტლი, რიუდიგერი, ჰლუშეკი, ლაიტნერი (31. შვააბი), გრუესო, სარარერი (46. ორიოლ რომეუ), გენტნერი, ტიმო ვერნერი, ჰარნიკი.
შალკე: ფერმანი, ნოიშტედტერი, კირხოფი, ჰიოვედესი, უჩიდა, ფუხსი, აოგო, მაიერი (69. კლემენსი), ბარნეტა (79. აიჰანი), ჩუპო-მოტინგი (86. ლ. სანე), ჰუნტელაარი.
კუთხური: 4-6 ჯარიმა: 14-13 თამაშგარე: 3-3 კარში დარტყმა: 13(7)-13(10) ბურთის ფლობა: 50%-50%
მაყურებელი: 44 700

კიოლნი-აუგსბურგი 1:2
გოლები: 1:0 უჯა (13), 1:1 ჯურჯიჩი (53), 1:2 ესვაინი (90)
კიოლნი: ჰორნი, ბრეჩკო, მავრაი, ვიმერი, ჰექტორი, გერჰარტი, ოლკოვსკი, ფოგტი, რისე (71. ბრიოკერი), შვენტო (56. მატუშიკი), უჯა.
აუგსბურგი: მანინგერი, ვერჰაეგი, კალსენ-ბრაკერი, კლავანი, ბაბა, ბაიერი, ბობადილია, კორი (90. ჰონგი), ჰალილ ალთინთოფი, ტობიას ვერნერი (85. ესვაინი), ჯურჯიჩი (76. მიოლდერსი).
გაფრთხილება: - კორი
კუთხური: 5-9 ჯარიმა: 10-13 თამაშგარე: 0-3 კარში დარტყმა: 12(8)-14(7) ბურთის ფლობა: 39%-61%
მაყურებელი: 48 500

პადერბორნი-ფრაიბურგი 1:1
გოლები: 0:1 დარიდა (18-პენ), 1:1 კაჩუნგა (89)
პადერბორნი: ლ. კრუზე, ვემერი (79. კუტჩკე), შტროდიკი, ჰიუნემაიერი, ბრიოკნერი, ციგლერი (46. კაჩუნგა), რუპი, ქოჩი, ბაკალორცი (69. ვრანჩიჩი), მეჰა, ზაგლიკი.
ფრაიბურგი: ბიურკი, ზორგი, ტორეხონი, კრმაში (85. კემპფი), გიუნტერი, ჰიოფლერი, დარიდა, კლაუსი, შმიდი, მეჰმედი (79. ფრანცი), ფრაისი (76. გუედე).
გაფრთხილება: კაჩუნგა, ზაგლიკი - ჰიოფლერი, დარიდა, მეჰმედი, გუედე
კუთხური: 6-1 ჯარიმა: 15-28 თამაშგარე: 0-1 კარში დარტყმა: 24(13)-4(3) ბურთის ფლობა: 63%-37%
მაყურებელი: 14 738

ბაიერნი-ლევერკუზენი 1:0
გოლი: 1:0 რიბერი (51)
ბაიერნი: ნოიერი, რაფინია, ბენატია, ბოატენგი, ბერნატი, ჩაბი ალონსო, რობენი, გიოტცე (46. როდე), რიბერი, მიულერი (88. შვაინშტაიგერი), ლევანდოვსკი (90+2. ჰოიბერგი).
ლევერკუზენი: ლენო, იედვაი, სპაჰიჩი, თოფრაქი, ვენდელი, ლ. ბენდერი (62. როლფესი), გონსალო კასტრო, ბელარაბი, ჩალჰანოგლუ, სონი (62. დრმიჩი), კისლინგი (75. კრუსი).
გაფრთხილება: - სონი, გონსალო კასტრო, ბელარაბი
კუთხური: 8-3 ჯარიმა: 9-29 თამაშგარე: 0-4 კარში დარტყმა: 9(5)-3(1) ბურთის ფლობა: 61%-39%
მაყურებელი: 71 000

7 დეკემბერი
ჰამბურგი-მაინცი 2:1
გოლები: 1:0 კლებერი (32), 2:0 ვან დერ ვაარტი (54-პენ), 2:1 ოკაზაკი (89)
ჰამბურგი: დრობნი, დიკმაიერი, ჯურუ, კლებერი, მარკოსი, ვან დერ ვაარტი (83. არსლანი), ირაჩეკი, ნ. მიულერი, ჰოლტბი, რუდნევსი (90. კაჩარი), ლასოგა (90+4. გუაიდა).
მაინცი: კარიუსი, ბროსინსკი, ბელი, ნოვესკი, დიასი (54. სოტო), კოო (66. ხაირო), გაისი, პარკი, ალაგუი, ჯურიჩიჩი (66. მალი), ოკაზაკი.
გაფრთხილება: რუდნევსი
კუთხური: 6-6 ჯარიმა: 18-15 თამაშგარე: 2-3 კარში დარტყმა: 18(14)-16(10) ბურთის ფლობა: 43%-57%
მაყურებელი: 45 968

აინტრახტი-ვერდერი 5:2
გოლები: 1:0 მაიერი (34), 1:1 გებრესელსიე (45), 2:1 სეფეროვიჩი (52), 3:1 მაიერი (68), 4:1 აიგნერი (76), 4:2 კალდიროლა (79), 5:2 შტენდერა (80)
აინტრახტი: ვიდვალდი, ჩენდლერი, რუსი, ანდერსონი, ოშჩიპკა, ჰასებე, აიგნერი, შტენდერა (88. იგნიოვსკი), ინუი (82. კიტელი), სეფეროვიჩი, მაიერი (84. მედოიევიჩი).
ვერდერი: ვოლფი (58. შტებინგერი), გერბესელასიე, პრიოდლი (24. კალდიროლა), ლუკიმია, გარსია, კროოსი (74. ბარგფრედე), ფრიტცი, იუნუზოვიჩი, აიჩიჩექი, ზელკე, ბარტელსი.
გაფრთხილება: ინუი, ჩენდლერი - პრიოდლი, ფრიტცი
კუთხური: 9-2 ჯარიმა: 19-14 თამაშგარე: 2-5 კარში დარტყმა: 22(16)-10(6) ბურთის ფლობა: 53%-47%
მაყურებელი: 46 800

ბომბარდირები: 10 - მაიერი (აინტრახტი); 8 - ჩუპო-მოტინგი (შალკე), ოკაზაკი (მაინცი); 7 - ბელარაბი (ლევერკუზენი), ჰუნტელაარი (შალკე), გიოტცე (ბაიერნი); 6 - დი სანტო (ვერდერი), რობენი (ბაიერნი), ლევანდოვსკი (ბაიერნი), მიულერი (ბაიერნი).

12 დეკემბერი:
ჰოფენჰაიმი-აინტრახტი

13 დეკემბერი:
შალკე-კიოლნი, აუგსბურგი-ბაიერნი, ჰერტა-დორტმუნდი, ვერდერი-ჰანოვერი, ფრაიბურგი-ჰამბურგი, მაინცი-შტუტგარტი

14 დეკემბერი:
ლევერკუზენი-ბორუსია (მ), ვოლფსბურგი-პადერბორნი.

ყოველდღიური სპორტული გაზეთი "ლელო"