რობერტ ლევანდოვსკი: ვბრუნდები დორტმუნდში სამი ქულისთვის

მომავალი სუპერმატჩის ერთ-ერთი მთავარი ინტრიგაა რობერტ ლევანდოვსკის დაბრუნება დორტმუნდში, სადაც მან ოთხი წელი გაატარა.

პოლონელი ფორვარდი პირველ სეზონს ატარებს "ბაიერნის" რიგებში და ოფიციალურ მატჩებში 17 გოლი დაუგროვდა. ეს კარგი შედეგია, თუმცა თავად ლევანდოვსკი ამტკიცებს, რომ "ყოველთვის არსებობს ზრდის საშუალება და საჭიროა უფრო მეტის გოლის გატანა".

Stdstern-თან ინტერვიუში ლევანდოვსკიმ მომავალი მატჩის შესახებ საკუთარი აზრი გაგვიზიარა...

- ალბათ, მღელვარებით ელოდებით დორტმუნდში დაბრუნებას?
- რა თქმა უნდა! "დორტმუნდში" ოთხი შესანიშნავი და წარმატებული წელი გავატარე. კონტაქტი მაქვს ბევრ ყოფილ თანაგუნდელთან. მიუხედავად ამისა, ვბრუნდები იქ იმისთვის, რათა ბოლომდე დავიხარჯო და სამი ქულა ავიღო.

- ამ სეზონში ბუნდელიგის 24 მატჩში 13 გოლი გაიტანეთ. კმაყოფილი ხართ ამ შედეგით?
- დიახ. საერთო ჯამში, ახალ კლუბსა და ქალაქში თავს შესანიშნავად ვგრძნობ. რა თქმა უნდა, უკეთ თამაში და მეტი გოლის გატანა შეიძლება, მაგრამ მე იმ ტიპის მოთამაშეებს მივეკუთვნები, რომლებიც ბევრს ფიქრობენ გუნდზე. თუ ვხედავ, რომ შემიძლია ჩემსკენ გადავიყვანო მცველი და ამით თანაგუნდელს თავისუფალი სივრცე მივცე, ამას აუცილებლად ვაკეთებ.

- რამდენად მოგიწიათ თამაშის სტილის შეცვლა ახალ გუნდში გადასვლის შემდეგ?
- "ბორუსიაში" ოთხი წელი ვთამაშობდი. რა თქმა უნდა, დრო იყო საჭირო ახალ სისტემასთან ადაპტირებისთვის. აქ ყველა ცდილობს მოკლე პასით თამაშს, პრიორიტეტულია ბურთის ფლობა. "დორტმუნდში" ხშირად ვიღები ბურთს გრძელი პასის შემდეგ. "ბაიერნში" ასეთი რამ იშვიათად ხდება.

- პრესაში ძალიან ბევრს მსჯელობდნენ კლუბში თქვენს როლზე. როგორ აღიქვამდით ამას?
- ჩემთვის მნიშვნელოვანია მხოლოდ ის, რასაც მწვრთნელი და თანაგუნდელები ამბობენ. თანამედროვე ფეხბურთში ვერც ერთი თავდამსხმელი თავს უფლებას ვერ მისცემს საჯარიმოში იდგეს და ბურთს ელოდოს.

"ბაიერნში" ნახევარი წელია ვთამაშობ და ვგრძნობ, რომ ჩემი ტექნიკა უკეთესი გახდა. ყოველდღე ბრწყინვალე ფეხბურთელებთან ერთად ვვარჯიშობ. ამ მომენტისთვის თავს ძალიან კარგად ვგრძნობ და მოუთმენლად ველოდები ყველა შეხვედრას.

ყოველდღიური სპორტული გაზეთი "ლელო"