იურგენ კლოპი "ლივერპულის" ბოსების სიტყვას ელის

იურგენ კლოპი "ლივერპულის" უფროსობისგან შემხვედრ ნაბიჯებს ელის და იმედი აქვს, რომ ხელმძღვანელობა ტრანსფერებისთვის გარკვეულ თანხას გამოჰყოფს. "კლოპოს" ესმის, რომ მისი გუნდი ცუდად არ გამოიყურება, მაგრამ მაინც სერიოზულ გაძლიერებას საჭიროებს.

"ენფილდზე" "მიდლსბროსთან" მოგებით "ლივერპულმა" ჩემპიონთა ლიგის საკვალიფიკაცი ეტაპის საგზური მოიპოვა და კლოპის თქმით, ახლა "მოლაპარაკებებისა და ტრანსფერებზე მუშაობის" დროა. მერსისაიდელთა უფროსობას ჯერ თავისი პოზიცია არ დაუფიქსირებია, თუ რა ბიუჯეტის გამოყოფას აპირებენ ტრანსფერებისთვის. კლოპი მათ სიტყვას ელოდება და იმასაც გვახსენებს, რომ ახლა, როდესაც გუნდი ოთხეულში მოხვდა, სასურველი ფეხბურთელების დაყოლიება უფრო ადვილი იქნება, მაგრამ დროულად მოქმედებაა საჭირო.

ამასობაში, ახლო წარსულში კარგად ცნობილ მსაჯს, გრემ პოლს მიაჩნია, რომ ნახსენები მატჩის მთავარი არბიტრი მარტინ ატკინსონი შეცდა, როდესაც 0:0-ზე "ბოროს" სასარგებლოდ პენალტი არ დანიშნა.

პატრიკ ბამფორდი დეიან ლოვრენთან ბრძოლისას დაეცა და პოლის აზრით, ეს თერთმეტმეტრიანი იყო. რადგან "მიდლსბროზეც" ამდენი ვისაუბრეთ, ისიც ვთქვათ, რომ რივერსაიდელთა 24 წლის მცველის, ბენ გიბსონისთვის ბრძოლას "ლესტერი" და "ვესტ ბრომვიჩი" აპირებენ. ეს სიამოვნება 20 მილიონ ფუნტამდე უნდა დაჯდეს.

ყოველდღიური სპორტული გაზეთი "ლელო"