"კრისტალ პალასის" ფეხბურთელები ცოტათი გაკვირვებულნიც დარჩნენ იმით, რომ სემ ელარდაისმა გუნდიდან წასვლა გადაწყვიტა. "დიდმა სემმა" "არწივები" პრემიერლიგაში დატოვა და საკმაოდ კარგად აათამაშა, მაგრამ, როგორც ჩანს, მან ერთიც "დაამტკიცა" და ხელი დაგვიქნია. 62 წლის გამოცდილი სპეციალისტის თქმით, იგი მწვრთნელად მუშაობას აღარ აპირებს. როგორც ჩანს, მისი საოცნებო პოსტიდან - ინგლისის ნაკრების თავკაცობიდან გათავისუფლებამ და იმ სკანდალმა მას მოუშუშებელი იარა მიაყენა. თუმცა დიდი სემი ფეხბურთის კაცია და, ვინ იცის, საქმე ისევ მოენატროს...
ელარდაისმა "პალასს" 21 მატჩიდან 8 მოაგებინა და აქედან იყო საგარეო გამარჯვებები
"დიდი ამბიცია და სურვილი ახალი სამსახურისა და სხვა გუნდში მუშაობის არ მაქვს. სანამ შედარებით ახალგაზრდა ვარ, ჯანმრთელი მეთქმის და გარკვეული აქტიურობა შემიძლია, მინდა ჩემს ცხოვრებას მივხედო. მსურს ვიმოგზაურო, ოჯახთან ერთად მეტი დრო გავატარო, შვილიშვილებს ყურადღება დავუთმო… ეს ყველაფერი მწვრთნელობისას თითქმის შეუძლებელია, ძალიან ცოტა დრო გრჩება, რადგან 24 საათი დაკავებული ხარ და სტრესში ხარ. "კრისტალ პალასსა" და მის პრეზიდენტს, სტივ პერიშს კი დიდი მადლობა იმისთვის, რომ რთული პერიოდის მერე პრემიერლიგას დავუბრუნდი და ამ გუნდში მუშაობის საშუალება მომეცა" - აღნიშნა ელარდაისმა.
"დიდ სემის" გიჟური ერთწლიანი პერიოდი:
2016 წლის 11 მაისი - "სანდერლენდი" დატოვა უმაღლეს ლიგაში
2016 წლის 22 ივლისი - დატოვა "სანდერლენდი" და გახდა ინგლისის ნაკრების მთავარი მწვრთნელი
2016 წლის 4 სექტემბერი - ჩაატარა პირველი სანაკრებო მატჩი და გუნდს სლოვაკეთთან მოაგებინა
2016 წლის 27 სექტემბერი - ორმხრივი შეთანხმების შემდეგ დატოვა ინგლისის ნაკრები. მან ამ პოსტზე სულ რაღაც 64 დღე გაატარა…
2016 წლის 23 დეკემბერი - დაინიშნა "კრისტალ პალასში"
2016 წლის 26 დეკემბერი - ფრედ ითამაშა "უოტფორდთან"
2017 წლის 31 იანვარი - მოიგო პირველი მატჩი "პალასთან" ერთად
2017 წლის 21 მაისი - "არწივებმა" სეზონი მე-14 ადგილზე დაასრულეს
2017 წლის 23 მისი - ელარდაისმა განცხადება გააკეთა წასვლის შესახებ.
ყოველდღიური სპორტული გაზეთი "ლელო"
