არსად ისეთ პატივს არ სცემენ სათასო ფინალებს, როგორც ინგლისში. ჩვენც გავიხსენოთ ასოციაციის თასის 7 ყველაზე დაუვიწყარი და შთამბეჭდავი დაპირისპირება ბოლო 40 წლის განმავლობაში...7. ლივერპული-ევერტონი 3:2 (1989)
მერსისაიდული დერბი ასოციაციის თასის ფინალში - ალბათ, აქ სხვა კომენტარი ზედმეტი უნდა იყოს, მაგრამ მაინც ვთქვათ რამდენიმე მნიშვნელოვან დეტალზე.
ეს ფინალი ჩატარდა 35 დღის თავზე "ჰილსბოროს" ცნობილი ტრაგედიიდან, რომელსაც "ლივერპულის" 96 გულშემატკივარი შეეწირა. "წითლებმაც" სწორედ მათ ხსოვნას მიუძღვნეს გამარჯვება...
"ევერტონმა" ძირითადი დროის ბოლო წუთზე გაათანაბრა ანგარიში (1:1) და ბრძოლა დამატებით დროში გაგრძელდა. გამარჯვების
6. არსენალი-მანჩესტერ იუნ. 3:2 (1979)
ამ დაპირისპირებას ინგლისური ფეხბურთის ისტორია იცნობს, როგორც "5 წუთის ფინალს".
...86-ე წუთზე "იუნაიტედის" მცველმა გორდონ მაკქუინმა გაიტანა გოლი, რომელმაც "არსენალის" ორბურთიანი უპირატესობა მინიმუმამდე დაიყვანა, ხოლო ორ წუთში ტაბლოზე უკვე 2:2 ენთო.
მაგრამ "არსენალმა" მაინც მოიგო ბოლო წუთზე, "მანჩესტერის" მეკარე გარი ბეილის უხეში შეცდომის წყალობით. ეს იყო "მეთოფეთა" პირველი ტიტული ტერი ნილის 7-წლიანი მწვრთნელობის პერიოდში.
5. უიმბლდონი-ლივერპული 1:0 (1988)
"ფსიქოპატთა ბანდის ტრიუმფი" - ამ სახელწოდებით შევიდა ისტორიაში ფინალი, რომელშიც უპირობო ფავორიტი იყო ჩემპიონატში გამარჯვებული "ლივერპული". "წითლებს" შანსი ჰქონდათ, ბოლო სამ წელიწადში მეორე დუბლი მოეგოთ, მაგრამ...
ფინალის წინ ინგლისური მედი წერდა: "წარმოიდგინეთ, რამდენ დიდი ფეხბურთელს არ აღუმართავს ინგლისის თასი. ახლა კი, "უიმბლდონის" გამარჯვების შემთხვევაში, გუნდისა, რომელსაც ჰყავს ასეთი მოთამაშე - ვინი ჯონსი (ვინც ქართველებსაც უნდა გვახსოვდეს უელსის ნაკრებთან კარდიფული დაპირისპირებიდან - რედ), ეს იქნება ფეხბურთის დაცინვა".
მატჩის პირველივე წუთზე ვინი ჯონსმა ისე მოცელა ლივერპულელი სტივ მაკმაჰონი, ამ უკანასკნელს შიშისგან მთელი თამაშის განმავლობაში ფეხი არ გაუნძრევია...
პირველი ტაიმის განმავლობაში ძირითადად "ლივერპული" უტევდა და გოლიც გაიტანა მაგრამ არ ჩაუთვალეს. სამაგიეროდ, წესების სრული დაცვით გავიდა "უიმბლდონის" გოლი - დენის უაიზის (მომავალში "ჩელსის" ყველაზე წარმატებული კაპიტანი) ჩაწოდების შემდეგ ლორი სანჩესმა თავურით გაგზავნა ბურთი შორეულ კუთხეში.
მეორე ტაიმში "უიმბლდონი" დაცვაში ჩაჯდა და 61-ე წუთზე გატყდებოდა კიდეც, რომ არა მეკარე დეივ ბიზენტი - პენალტი აუღო ჯონ ოლდრიჯს. ეს იყო პირველი შემთხვევა, როცა ასოციაციის თასის ფინალში ფეხბურთელმა ვერ გამოიყენა 11-მეტრიანი. ბიზენტი კი, გარდა იმისა, რომ ამ მოგერიებული პენალტით ისტორიაში შევიდა, პირველი მეკარეც გახდა, ვინც კაპიტნის რანგში აღმართა ასოციაციის თასი.
4. ტოტენჰემი-ნოტინგემი 2:1 (1991)
შეიძლებოდა, ეს მატჩი პოლ გასკოინის ბენეფისადაც ქცეულიყო, მაგრამ... მე-17 წუთზე მან ისე მაგრად მოუქნია ფეხი "ნოტინგემის" მოთამაშეს, თავად დაშავდა მძიმედ და შესაცვლელი გახდა.
თან ამ ეპიზოდში "ტოტენჰემი" ორმაგად დაზარალდა - გასკოინმა რომ "გამოიჩინა" თავი, იმ ადგილიდან დანიშნული ჯარიმით სტიუარტ პირსმა "ცხრიანში" დააჭედა ბურთი და "მეტყევეები" დააწინაურა...
თამაშის დარჩენილი ნაწილის გმირად სწორედ მათი მეკარე მარკ კროსლი იქცა. გარდა იმისა, რომ პირველი ტაიმის მიწურულს მან პენალტი აუღო გარი ლინეკერს, მეორე ნახევარშიც მთელ რიგ ეპიზოდებში იხსნა თავისიანები, თუმცა "ნოტინგემი" მაინც ვერ გადაურჩა მარცხს - ჯერ ძირითად დროში გაუშვა გოლი პოლ სტიუარტისგან, დამატებითში კი დეს უოკერმაც შეძლო კროსლის დამწუხრება.
ეს იყო ბოლოსწინა ფინალი "ნოტინგემის" ლეგენდარული მწვრთნელის, ბრაიან კლაფის კარიერაში. ფინალის შემდეგ კი ინგლისურმა როკ-ჯგუფმა Chas and Dave-მა "ტოტენჰემის" ფეხბურთელებთან ერთად ჩაწერა სიმღერა When the Year Ends in One, რომლის შინაარსიც ასეთია - "დეზები" აუცილებლად მოიგებენ ჯილდოს იმ წელს, რომელიც მთავრდება ციფრით - "ერთი".
3. ლივერპული-არსენალი 2:1 (2001)
ეს იყო პირველი შემთხვევა, როცა ასოციაციის თასის ფინალი ინგლისის გარეთ ჩატარდა - ტურნირის დასკვნით მატჩს კარდიფის "მილენიუმმა" უმასპინძლა...
72-ე წუთზე ანგარიში "არსენალის" შვედმა ფორვარდმა ფრედი ლიუნგბერგმა გახსნა, რასაც "ლივერპულის" მწვრთნელ ჟერარ ულიეს მხრიდან საპასუხო სვლები მოჰყვა - მან პატრიკ ბერგერსა და რობი ფაულერს უხმო მოედანზე, ხოლო სქემა 4-3-3-ზე გადააწყო.
ამ გადაადგილებებით ფრანგმა სპეციალისტმა "ათიანში" გაარტყა - მაიკლ ოუენმა სწორედ ბერგერის პასით გაიტანა გამარჯვების გოლი, მანამდე კი მარკუს ბაბელის ხელშეწყობით გაათანაბრა ანგარიში.
ეს იყო "ლივერპულის" მეორე გამარჯვება იმ წლის სათასო ჰეთ-თრიკის "ეგიდით". თებერვალში ულიეს გუნდმა ინგლისის ლიგის თასი მოიგო, ხოლო კარდიფული ფინალის შემდეგ, ერთ კვირაში, უეფას თასის გიჟურ დასკვნით მატჩში ესპანურ "ალავესს" 5:ძ4 სძლია.
2. მანჩესტერ იუნ-კრისტალ პალასი 1:0 გადათამაშებით (პირველი მატჩი 3:3, 1990)
1990 წლის იანვარში ალექს ფერგიუსონის "მანჩესტერმა" ძლივს მოუგო "ნოტინგემს" თასის მესამე რაუნდში. "ოლდ ტრაფორდის" ტრიბუნებზე კი გაჩნდა ბანერი - "მესამე წელიწადია და მხოლოდ დაპირებები გვესმის. დროა, წახვიდე, ფერგი".
ასე რომ, ინგლისის თასის ფინალში მოგება ფერგიუსონისთვის პოსტის შენარჩუნების ერთადერთი შანსი იყო. პირველ მატჩში "მანჩესტერი" მარცხს მარკ ჰიუზის მიერ დამატებით დროში გატანილი გოლის წყალობით გადაურჩა.
დაინიშნა გადათამაშება, რომლის გმირადაც "იუნაიტედის" მეორე მეკარე ლეს სილი იქცა. მან, სულ ცოტა, სამჯერ იხსნა ფერგიუსონი სირცხვილისგან. მეორე ტაიმში კი მარჯვენა მცველი ლი მარტინი მკვირცხლად ჩაერთო შეტევაში და გამარჯვებისა დასცხო - 1:0.
ეს იყო ფერგიუსონის პირველი ტრიუმფი მის გრანდიოზულ მანჩესტერულ ეპოქაში.
1. ლივერპული-ვესტ ჰემი 3:1, პენ 3:1 (2006)
ეს იყო ზუსტად ერთი წლის თავზე სტამბოლის იმ ლეგენდარული ფინალიდან, როცა "ლივერპულმა" ფანტასტიკური "ქამბექი" გააკეთა "მილანისგან" პირველი ტაიმში გაშვებული 3 უპასუხო გოლის შემდეგ...
ახლაც, უკვე 28-ე წუთზე "ლივერპული" 0:2-ს აგებდა, მაგრამ მეორე ტაიმის დასაწყისისთვის სტივენ ჯერარდმა ორივე გოლი გაქვითა. მერე "ვესტ ჰემი" კიდევ ერთხელ დაწინაურდა, მაგრამ ძირითადი დროის უკანასკნელ წუთზე ჯერარდმა მესამედაც შეარხია "ჩაქუჩების" კარის ბადე და თამაში დამატებით დროში გადაიყვანა.
ამას კი მოჰყვა პენალტების სერია, რომელშიც "ლივერპულს" ახალი გმირი გამოუჩნდა - მეკარე პეპე რეინა, ვინც ოთხიდან 3 პენალტი მოიგერია.
და მაინც, ეს ფინალი ისტორიაში შევიდა, როგორც "ჯერარდის ფინალი" - რომ არა კაპიტნის ჰეთ თრიკი, აღარც რეინას გმირობა იქნებოდა და, მით უმეტეს, აღარც - რაფა ბენიტესის გუნდის ტრიუმფი...
ყოველდღიური სპორტული გაზეთი "ლელო"
