ჟოზე მოურინიო რაიან ბერტრანს არ ენდობა

"ჩელსი" მზად არის, 24 წლის ინგლისელი მარცხენა მცველი რაიან ბერტრანი ტრანსფერზე დააყენოს. დასავლეთლონდონელები დასაშვებად მიიჩნევენ ფეხბურთელის 6-თვიან იჯარასაც. ბერტრანით დაინტერესებული კლუბების სახელები უკვე ცნობილია: "ფულჰემი", "ლივერპული", "ევერტონი" და "საუთჰემპტონი".

პირველები იონ არნე რიისესთან გამოთხოვებას გეგმავენ. ნორვეგიელი სამშობლოში აპირებს კარიერის დასრულებას. "წითლებს" ორი მარცხენა მცველი ჰყავთ ტრავმირებული: ხოსე ენრიკე და ჯონ ფლენაგანი. ასე რომ, მათი მოტივაციაც გასაგებია. "ევერტონში" შიშობენ, რომ ლეიტონ ბეინსის შენარჩუნება გაუჭირდებათ. "საუთჰემპტონს" კი 18 წლის ამომავალ ვარსკვლავ ლუკ შოუს ეცილებიან.

თავის მხრივ, "სტემფორდ ბრიჯზე" დარჩენა აღარ სურს თავად ბერტრანსაც, ვინც ტრავმის მორჩენის შემდეგაც კი მთელ დროს სკამზე ატარებს (ჩემპიონატში მხოლოდ ერთხელ ითამაშა ძირითადში). ჟოზე მოურინიო მის პოზიციაზე სესარ ასპილიკუეტას უფრო ენდობა. არადა, ესპანელი ნომინალურად მარჯვენა მცველია. ბერტრანს კონტრაქტი 2017 წლის ზაფხულამდე აქვს გაფორმებული, ასე რომ, მსურველებს ფეხბურთელის გადაბირება იაფი ნამდვილად არ დაუჯდებათ.

ვერსიები სამეულზე და არამარტო
"ჩელსის" საკადრო პრობლემები მხოლოდ რაიან ბერტრანის წასვლა-არწასვლით არ შემოიფარგლება. ერთ-ერთი ბრიტანული ვებგვერდის ცნობით, "განსაკუთრებული კაცი" მზადაა, მიკაელ ესიენით (4 თამაში პრემიერლიგაში), დემბა ბათი (8 თ, 1 გ) და ფერნანდო ტორესით (15 თ. 3 გ) დაინტერესებული კლუბების შეთავაზებები მოისმინოს.

თუკი "ჩელსიმ" სამივე ფეხბურთელი სარფიანად გაყიდა, მას ახალი თავდამსხმელის ყიდვის შანსი გაუჩნდება. არა და არ ცხრება ჭორები უეინ რუნის შესაძლო ტრანსფერზე, თუმცა ხმები ჯერჯერობით ხმებად რჩება. აი, კევინ დე ბრუინის თაობაზე კი, როგორც ამბობენ, შეთანხმება პრაქტიკულად მიღწეულია. გერმანული "ვოლფსბურგი" ბელგიელი ფეხბურთელის 1.5-წლიან იჯარაში 3 მილიონ ფუნტს იხდის.

ყოველდღიური სპორტული გაზეთი "ლელო"